Ազրպէյճանի Կողմէ Զինադադարի Միտումնաւոր Եւ Սադրիչ Խախտումները Կը Հակասեն Իր Ստանձնած Պարտաւորութիւններուն

Ըստ Հայաստանի Արտաքին Գործոց Նախարարութեան. Ազրպէյճանի Կողմէ Զինադադարի Միտումնաւոր Եւ Սադրիչ Խախտումները Կը Հակասեն Իր Ստանձնած Պարտաւորութիւններուն

30 ՅՈՒԼԻՍ 2019 – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:

27-28 յուլիսին Ազրպէյճանի զինուած ուժերը Հայաստանի Հանրապետութեան պետական սահմանի հիւսիսարեւելեան հատուածին մէջ արձակազէններու ներգրաւումով իրականացուցած են սադրիչ գործողութիւններ, որոնց պատճառով սպաննուած է Հայաստանի զինուած ուժերու

զինուոր Արման Բուլղադարեանը եւ վիրաւորուած երկու զինուոր, կը յայտնեն արտաքին գործոց նախարարութենէն:

«Ազրպէյճանի կողմէ զինադադարի միտումնաւոր եւ սադրիչ խախտումները կը հակասեն զինադադարի պահպանման եւ ամրապնդման վերաբերեալ ստանձնած պարտաւորութիւններուն, որոնք վերջին շրջանին արձանագրուած են նաեւ երկու երկիրներու ղեկավարներու մակարդակով այս տարուան մարտ 29-ին տեղի ունեցած Վիեննայի վեհաժողովի ընթացքին: Անոնք կ՛անտեսեն նաեւ արտաքին գործոց նախարարներու 20 յունիսին Ուաշինկթընի մէջ տեղի ունեցած հանդիպումին հիմամբ ԵԱՀԿ-ի Մինսքի խմբակի համանախագահներուն ընդունած յայտարարութիւնը, ուր կողմերուն կոչ ուղղուած էր խստօրէն պահպանելու զինադադարը յարգելու յանձնառութիւնը եւ ձեռնպահ մնալու շփման գիծին մէջ եւ պետական սահմանին արձակազէններու օգտագործումով սադրիչ գործողութիւններէ:

«Խստօրէն կը դատապարտենք մարդկային զոհերու յանգեցնող այս սադրանքները, որոնք կ՛ուղեկցուին Ազրպէյճանի կողմէ զինադադարի պահպանման եւ ամրապնդման ուղղուած վստահութեան եւ անվտանգութեան միջոցառումներու իրականացման մերժումով: Այս գործողութիւնները կը ստեղծեն լարուածութեան աճի վտանգ, որուն ամբողջ պատասխանատուութիւնը կ՛իյնայ ազրպէյճանական կողմին վրայ», կը նշուի Հայաստանի Հանրապետութեան արտաքին գործոց նախարարութեան հրապարակած յայտարարութեան մէջ:

aztagdaily.com/archives/447871

Facebooktwitterredditpinterestlinkedinmail