Փամուք Դարձեալ Կը Խօսի Հայոց Ցեղասպանութեան Մասին

November 7, 2019 Lousavor Avedis Աշխարհ 0

Post Views: 642

07 ՆՈՅԵՄԲԵՐ 2019 – ՀԱՅՈՑ ՑԵՂԱՍՊԱՆՈՒԹԻՒՆ – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:

ՊՈԼԻՍ, «Մարմարա».- Յայտնի թուրք վիպագիր Օրհան Փամուք, որ այս օրերուն Արաբական Միացեալ Էմիրութիւններու մէջ կը մասնակցի գիրքի տօնավաճառի մը, բազմաթիւ ընթերցասէրներու եւ լրագրողներու հետ ունեցաւ զրոյց-հանդիպում մը։ Շարք մը այլ հարցերու կողքին, Փամուք խօսեցաւ նաեւ Հայոց Ցեղասպանութեան մասին՝ յիշեցնելով, որ անոր մասին իր մէկ յայտարարութենէն ետք, իրեն դէմ հետապնդում սկսած էր Թուրքիոյ մէջ։ Գրականութեան Նոպէլեան մրցանակ ստացած հեղինակը աւելցուց, որ ինքզինք խիզախ չի նկատեր, սակայն ճիշդ կը նկատէ իր խորհածին մասին արտայայտուին։

«Գիտէ՛ք, որ ես կ՛ապրիմ այն երկրին մէջ, ուր բազմաթիւ գրողներ իրենց համոզումներուն համար բանտարկուած են։ Միակ բանը, զոր կրնամ ընել, ճշմարտութեան մասին խօսիլն է», դիտել տուաւ Փամուք։

Լրատուական աղբիւրներ կը նշեն, որ Փամուքի այդ խօսքերէն ետք դահլիճին մէջ բուռն ծափահարութիւններ հնչեցին։

Յիշեցնենք, որ 2005ին Օրհան Փամուքի դէմ սկսաւ հետապնդում, երբ հարցազրոյցի մը ընթացքին ան յայտնեց, որ Թուրքիոյ մէջ 1 միլիոն հայեր եւ 30 հազար քիւրտեր սպաննուած են։

Mush-GENOCIDE – Photo source: “Leslie’s Illustrated”, June 28, 1917

asbarez.com/arm/357099/Փամուք-Դարձեալ-Կը-Խօսի-Հայոց-Ցեղասպան/