«Ամերիկայի Ձայն»-ը Կ՛անդրադառնայ Հայաստան-Թուրքիա Յարաբերութիւններուն

13 ՅՈՒԼԻՍ 2017 – ԱՆԴՐԱԴԱՐՁ:

Թուրքիա կը փափաքի բնականոն յարաբերութիւններ հաստատել Հայաստանի հետ։ Ըստ ԱՄՆ-ի «Ասպարէզ» օրաթերթին՝ այս մասին «Ամերիկայի Ձայն»-ին յայտնած է Թուրքիոյ իշխող Արդարութիւն եւ բարգաւաճում կուսակցութեան նախագահի տեղակալ եւ խորհրդարանական Ռաւզա Քաւաքչը Քանը։

«Երկար պատմութիւն ունինք Հայաստանի հետ, եւ ինչպէս բոլոր հարեւաններուն եւ դաշնակիցներուն հետ, մենք կը փափաքէինք աւելի լաւ յարաբերութիւններ զարգացնել անոր հետ», ըսած է Քան՝ ընդունելով այն փաստը, որ յարաբերութիւններու կարգաւորման համար, պէտք է նախ կարգաւորել Հայոց Ցեղասպանութեան հարցը։ Քան, իր երկրի պաշտօնական դիրքորոշման համաձայն, կ՛ուրանայ պատմական այդ իրողութիւնը, սակայն կ՛աւելցնէ. «Կը կարծեմ, որ կարեւոր է աւելի լաւ յարաբերութիւններ հաստատել, եթէ երկու կողմերը եւ միջազգային պատմաբանները միասին կարենան կարգաւորել այս հարցը. այդ մէկը պիտի չխոչընդոտէ մեր յարաբերութիւնները եւ պիտի արտօնէ, որ աշխուժացնենք մեր համագործակցութիւնը՝ շարք մը ոլորտներու մէջ»։

Յարաբերութեանց հաստատման հաւանականութեան աւելի զգուշութեամբ մօտեցած է Թուրքիոյ եւ Իրաքի մօտ Միացեալ Նահանգներու նախկին դեսպան Ճէյմզ Ճեֆրին՝ ըսելով. «Հայ-թրքական յարաբերութիւնները սառոյցի հաստ շերտի տակ են, քանի որ Թուրքիա, որ բարդ յարաբերութիւններ ունի Ռուսիոյ հետ, Հայաստանը կը նկատէ ռուսերու եւ իրանցիներու դաշնակից»:

Ան աւելցուցած է, թէ Միացեալ Նահանգները այս հարցով կրնայ դրական դեր խաղալ, սակայն միաժամանակ ընդունած է, որ մօտիկ ապագային, Սպիտակ տունը զբաղած պիտի ըլլայ աւելի՛ հրատապ հարցերով։ «Երբ ես դեսպան էի Թուրքիոյ մէջ, Միացեալ Նահանգները սերտօրէն ներգրաւուած էր՝ փորձելով Լեռնային Ղարաբաղի մէջ կարգաւորման հասնիլ եւ բարելաւել հայ-թրքական յարաբերութիւնները»:

Դիւանագէտին համաձայն՝ Թուրքիոյ հանդէպ նախագահ Ուուտրօ Ուիլսընի որդեգրած կեցուածքէն ի վեր, Թուրքիա կասկածանքով կը մօտենայ Ամերիկային։

www.yerakouyn.com/?p=136269

109 Total Views 1 Views Today

Be the first to comment

Leave a Reply

Your email address will not be published.


*