«Անկախութեան Շուրջ Հանրաքուէէն Կարելի Չէ Ետդարձ Կատարել» Ըսաւ Պարզանի

Հիւսիսային Իրաքի Քրտական ինքնավար մարզի նախագահ Մասուտ Պարզանի

10 ՕԳՈՍՏՈՍ 2017 – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:

Հիւսիսային Իրաքի Քրտական ինքնավար մարզի նախագահ Մասուտ Պարզանի յայտնեց, որ կարելի չէ 25 սեպտեմբերին նախատեսուած անկախութեան շուրջ հանրաքուէէն ետդարձ կատարել` ընդգծելով, որ քրտական քաղաքական ղեկավարութիւնը որոշեց, եւ «հանրաքուէն մեր ժողովուրդի օրինական իրաւունքն է, միայն ան իրաւունքը ունի ատոր ժամանակը ճշդելու»:

«Հայաթ» օրաթերթին հետ հարցազրոյցի մը ընթացքին ան յայտնեց, որ հանրաքուէն Թուրքիոյ դէմ պատերազմի յայտարարութիւն եւ ատոր նկատմամբ թշնամութիւն չի նշանակեր` աւելցնելով. «Մենք կը հաւատանք բարեկամական յարաբերութիւններու գոյացման, մասնաւորաբար Թուրքիոյ հետ»:

Պարզանի ըսաւ, որ Իրաքի հետ ազատ եւ ընտրովի գործընկերութիւնը չյաջողեցաւ վերջինիս ու սահմանադրութեան ոտնահարման պատճառով, որովհետեւ իրաքեան պետութիւնը գործնականապէս մասնատուած է, եւ գործընկերութիւնն ու սահմանադրութիւնը ոտնահարեց»:

Ան յայտնեց, որ յարանուանական պետութիւնը իրականութիւն է, պետութիւնը` գերիշխանութենէ զուրկ, եւ հաստատօրէն քրտական մարզը պատասխանատու չէ իրաքեան պետութեան ներկայ իրավիճակին:

Պարզանի նշեց, որ իրաքեան բանակը պէտք է ազատագրէ Թելաֆր շրջանը եւ ոչ թէ շիիական աշխարհազօրը: «Մենք աշխարհազօրին հետ հարց չունինք, սակայն վստահաբար աշխարհազօրին պիտի չարտօնենք մուտք գործել Քիւրտիստանի հողեր: (…) Պատերազմ պիտի չյայտարարենք եւ ատոր պիտի չնախաձեռնենք, սակայն եթէ մեզի պարտադրուի, ապա ինքնապաշտպանութեան իրաւունք ունինք», ըսաւ Մասուտ Պարզանի:

www.aztagdaily.com/archives/359684

87 Total Views 1 Views Today

Be the first to comment

Leave a Reply

Your email address will not be published.


*