Ֆրանսայի Դատարանը Մերժեց Պաքուի` Ատրպէյճանը Բռնապետութիւն Անուանած Լրագրողներուն Դէմ Հայցը

08 ՆՈՅԵՆԲԵՐ 2017 – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:

Ֆրանսայի Նանթեր քաղաքի դատարանը անընդունելի համարած է Պաքուի հայցը ընդդէմ France 2 հեռուստաալիքի լրագրողներ Էլիզ Լիւսենի ու Լորան Ռիչըրտի, որոնց Պաքուն կը մեղադրէր զրպարտութեան մէջ` Ատրպէյճանը բռնապետութիւն անուանելու համար, կը հաղորդէ Panorama.am-ը:

Էլիզ Լիւսեն ու Լորան Ռիչըրտ Ատրպէյճանը բնորոշած էին որպէս բռնապետութիւն «Cash Investigation» հաղորդման ժամանակ, որ հեռարձակուած էր 2015-ի Սեպտեմբեր 7-ին:

Նանթեր քաղաքի դատարանի նախագահը յայտարարած է. «Մամուլի ազատութեան մասին օրէնքը նպատակ ունի ապահովելու խօսքի ազատութիւնը ու թոյլ չտալու պետութեան քրէական հետապնդման ենթարկել անհատին»:

Ինչպէս կը հաղորդէ Liberation-ը, դատարանը գտած է, որ «քրէական օրէնսգիրքը խստօրէն մեկնաբանուած է» ու Կովկասի պետութիւնը «չունի աւելի իրաւունքներ, քան Ֆրանսայի պետութիւնը» ու անընդունելի ճանչցած է հայցը:

«France Télévisions»-ի ու երկու լրագրողներուն փաստաբանները ողջունած են դատարանի որոշումը: Փաստաբան Վըրճինի Մարքեն դատարանի որոշումը անուանած է «շատ հետաքրքրական»` ընդգծելով, որ դատարանը ճանչցաւ, որ քաղաքացիի, աւելին, լրագրողի դէմ գործելը լրջօրէն կը վնասէ արտայայտուելու ազատութեան: Փաստաբանը նշած է, որ այս որոշումը «վերջ դրաւ լրագրողները քաղաքական գրաքննութեան ենթարկելու բոլոր հնարաւորութիւններուն»:

Յիշեցնենք, որ «Cash Investigation» հաղորդման ժամանակ Էլիզ Լիւսեն ներկայացուցած է Լորան Ռիչըրթի պատրաստած տեսանիւթը, որ կատարուած էր նաեւ Ֆրանսուայ Օլանտի Պաքու այցի ծիրէն ներս, ուր Ատրպէյճան կը ներկայացուի իբրեւ «բռնապետութիւն», իսկ նախագահ Իլհամ Ալիեւը` իբրեւ «մենատէր» կամ «բռնապետ»: Ալիեւը բռնապետ անուանած էր նաեւ «France Télévisions»-ի գործադիր տնօրէն Տոֆան Էրնոթ, որ ըսած էր, որ եթէ իրենք բանի մը մասին կը խօսին, ապա զայն կը ստուգեն ու կը վերստուգեն` ընդգծելով, որ տեսանիւթի պատրաստումը տեւած է մօտ 1 տարի:

«Ըսել, որ Ատրպէյճանի մէջ բռնապետութիւն է, սա կարծիք չէ: «Cash Investigation»-ը կարծիքներու վերաբերեալ հաղորդում չէ, այլ հետաքննութիւն»,- ըսած էր հաղորդավարը:

www.yerakouyn.com/?p=142673

26 Total Views 1 Views Today

Be the first to comment

Leave a Reply

Your email address will not be published.


*