Պարզանի. «Քերքուքի Գրաւումը Տեղի Ունեցաւ Իրանեան Ղեկավարութեամբ Եւ Ամերիկայի Ու Բրիտանիոյ Մեղսակցութեամբ»

10 ՆՈՅԵՆԲԵՐ 2017 – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:

Իրաքի Քրտական ինքնավար մարզի նախագահ Մասուտ Պարզանի յայտարարեց, որ «իրաքեան ուժերու Քերքուքին տիրելու գործողութիւնը տեղի ունեցաւ իրանեան ղեկավարութեամբ եւ Ամերիկայի ու Բրիտանիոյ մեղսակցութեամբ»` ընդգծելով, որ Իրաք Թեհրանի կամքէն կախեալ է:

Պարզանի ամերիկեան «Նիուզուիք» պարբերաթերթին հետ հարցազրոյցի մը ընթացքին յայտնեց. «Մենք վստահ ենք, որ Քերքուքի գրաւման գործողութիւնը իրանեան ղեկավարութեամբ էր եւ ամերիկացի ու բրիտանացի պաշտօնատարներու գիտակցութեամբ»` նշելով. «Քիւրտերը իրանցիներուն պիտի չդիմակայեն եւ անոնց հետ չեն մրցակցիր»:

«Միացեալ Նահանգներն ու միջազգային ընտանիքը կրնան արգելք հանդիսանալ որեւէ բախումի, իսկ եթէ կռիւ ծագի, ապա ատիկա կը նշանակէ, թէ անոնք կանաչ լոյս տուած են», ըսաւ ան:

Պարզանի յայտնեց, որ քիւրտերը չեն ճանչնար ժողովրդագրական փոփոխութիւնը այն շրջաններուն մէջ, ուրկէ քաշուեցան` նշելով. «Այն ինչ որ քրտական հողերուն վրայ տեղի կ՛ունենայ, ժամանակաւոր է»:

«Ոչ ոք կրնայ ինքնութիւնը փոխել այդ շրջաններուն, որոնք կը շարունակեն մնալ քրտական», նշեց Պարզանի` աւելցնելով. «Քիւրտերը այդտեղէն հեռացան արիւնահեղութիւնը կանխարգիլելու համար»:

www.aztagdaily.com/archives/371714

45 Total Views 1 Views Today

Be the first to comment

Leave a Reply

Your email address will not be published.


*