Սէուտական Պահանջով. Կիրակի Օր Արաբ Արտաքին Գործոց Նախարարներու Արտակարգ Ժողով

13 ՆՈՅԵՆԲԵՐ 2017 – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:

«Մայատին» արբանեակային պատկերասփիւռի կայանը կը հաղորդէ, որ ըստ արեւմուտքցի դիւանագէտներու, արաբ արտաքին գործոց նախարարները յառաջիկայ կիրակի օր Սէուտական Արաբիոյ պահանջով պիտի գումարեն արտակարգ ժողով մը` քննարկելու համար «արաբական երկիրներուն մէջ Իրանի ոտնձգութիւնները»:

ԱՖՓ լրատու գործակալութիւնը կը հաղորդէ, որ ըստ Արաբական լիկայի ընդհանուր քարտուղարութեան, լիկայի անդամ երկիրներուն յղած շրջաբերականին մէջ որոշուած է «կիրակի օր նախարարական մակարդակով Արաբական լիկայի խորհուրդի արտակարգ ժողով գումարել»:

Պահրէյնն ու Արաբական Միացեալ Էմիրութիւնները համաձայն գտնուած են Սէուտական Արաբիոյ պահանջին, եւ այդ առնչութեամբ խորհրդակցութիւն կատարուած է լիկայի ներկայ նստաշրջանի նախագահ Ճիպութիի հետ:

Ըստ շրջանառութեան մէջ դրուած ոչ հաստատ տեղեկութեանց, Սէուտական Արաբիան Արաբական լիկայէն պահանջած է սառեցնել Լիբանանի` լիկային անդամակցութիւնը:

Ըստ մամլոյ աղբիւրներուն, Եգիպտոս մերժած է այդպիսի որեւէ քայլ, մասնաւորաբար Սուրիոյ անդամակցութեան սառեցման լոյսին տակ: Նշեալ աղբիւրներուն համաձայն, այդպիսի քայլ մը առաւել եւս պիտի տկարացնէ Արաբական լիկան:

Կը հաղորդուի նաեւ, որ շարք մը արաբական երկիրներ, մասնաւորաբար Իրաքն ու Քաթարը կը մերժեն սէուտական քայլը:

Նշենք, որ Եգիպտոսի արտաքին գործոց նախարար Սամեհ Շուքրի երէկ ձեռնարկեց արաբական շրջապտոյտի մը, որ կը ներառէ Յորդանանը, Արաբական Միացեալ Էմիրութիւնը, Քուէյթը, Պահրէյնը, Օմանը, Սէուտական Արաբիան` այլ հարցերու կողքին քննարկելու համար վարչապետ Սաատ Հարիրիի հրաժարականէն ետք Լիբանանի կացութիւնը:

Լիբանանի խորհրդարանի նախագահ Նեպիհ Պըրրի իր կարգին յայտնեց, որ Արաբական լիկան ունի «առիթ մը ինքզինք «Արաբական գարնան» ընթացքին իր անցեալէն փրկելու եւ Լիբանանը պահպանելու համար»:

www.aztagdaily.com/archives/372002

219 Total Views 1 Views Today

Be the first to comment

Leave a Reply

Your email address will not be published.


*