Բաբայեան. «Տագնապի Իսկական Լուծման Գծով Դժուար Թէ Փոփոխութիւն Արձանագրուի»

17 ՆՈՅԵՆԲԵՐ 2017 – ՏԱՐԱԾԱՇՐՋԱՆ:

«Փանորամա»-ին հետ ունեցած զրոյցին ընթացքին Արցախի նախագահի մամլոյ բանբեր Դաւիթ Բաբայեան յայտնած է, որ պաշտօնական Ստեփանակերտ կարեւոր կը նկատէ համանախագահող երկիրներու արտաքին գործոց նախարարներուն, այս պարագային` Ռուսիոյ արտաքին գործոց նախարար Սերկէյ Լաւրովի շրջանային այցելութիւնը` այն ակնկալութեամբ, որ անիկա դրական ազդեցութիւն ձգէ:

«Տակաւին շատ կանուխ է խօսիլ արցախեան տագնապին իսկական լուծման մասին` յատկապէս նկատի ունենալով Ազրպէյճանի կարծր, հայատեաց քաղաքականութիւնը: Տագնապին լուծումը պէտք է դիտարկել երկու հարթութիւններու վրայ` մէկը իսկական լուծումը, իսկ միւսը` խաղաղութեան եւ կայունութեան պահպանումը: Բուն լուծման տեսանկիւնէն դժուար թէ բան մը փոխուի», յայտնած է ան:

Դաւիթ Բաբայեան յիշեցուցած է Ազրպէյճանի նախագահ Իլհամ Ալիեւի կարծր, ազգայնամոլական յայտարարութիւնները, որոնք լուրջ բեկման ակնկալութեան տեղ չեն ձգեր գրեթէ:

Անդրադառնալով Հայաստանի եւ Ազրպէյճանի արտաքին գործոց նախարարներ Էդուարդ Նալբանդեանի եւ Էլմար Մամետեարովի դեկտեմբերին ակնկալուող հանդիպման` Արցախի նախագահի մամլոյ բանբերը նշած է, որ նմանօրինակ հանդիպումներ կը նպաստեն շրջանի խաղաղութեան եւ կայունութեան պահպանման:

«Շրջանին մէջ խաղաղութեան պահպանումը շատ կարեւոր է` յատկապէս նկատի ունենալով, որ աշխարհին մէջ բաւական լարուած իրավիճակ կը տիրէ: Մենք կը տեսնենք, թէ տարբեր շրջաններու մէջ ինչպիսի՛ պայքար կ’ընթանայ, պայթիւնավտանգ զարգացումներ տեղի կ’ունենան Միջին Արեւելքի, հարաւարեւելեան Ասիոյ մէջ: Հարաւային Կովկասի մէջ նոր ճակատի մը բռնկումը ձեռնտու չէ ոեւէ մէկուն: Հետեւաբար, աշխարհաքաղաքական ուժերը ամէն ինչ պէտք է ընեն, որպէսզի այստեղ խաղաղութիւն եւ կայունութիւն պահպանուի: Տուեալ պարագային Ռուսիոյ արտաքին գործոց նախարար Սերկէյ Լաւրովի Երեւան եւ Պաքու այցելութիւնը պէտք է դիտարկել նաեւ այս հարթութեան վրայ», եզրափակած է Դաւիթ Բաբայեան:

www.aztagdaily.com/archives/372632

100 Total Views 1 Views Today

Be the first to comment

Leave a Reply

Your email address will not be published.


*