ՀԱՅԵՐԸ ՀԱԼԷՊԻ ՊԱՏՄՈՒԹԵԱՆ ՄԷՋ (Դ. ՄԱՍ)

17 ՆՈՅԵՄԲԵՐ 2017 – ՊԱՏՄՈՒԹԵԱՆ ՍԼԱՑՔ:
Avo-Katerdjian2015 (1)
ԱՒՕ ԳԱԹՐՃԵԱՆ

Հայ Կրթական եւ Մշակութային Միութիւն (Համազգային)

1930-ին հիմնուած է Համազգայինի Հալէպի մասնաճիւղը, որ անմիջապէս ձեռնարկած է կրթական-մշակութային աշխատանքներու:

1933-1945 տարիներուն, Երկրորդ Աշխարհամարտին պատճառով, մասնաճիւղը գրեթէ աշխատանքէ դադրած է, բայց կարգ մը համազգայնականներ անհատական ճիգերով վարած են մշակութային գործունէութիւն: Այդ շրջանին բեղուն եղած է թատերական կեանքը եւ վերակազմուած է «Համազգայինի թատերասէրներ» կոչուած թատերական խումբը:

1954-ին Միութիւնը վերակազմակերպուած է: 1960 թուականին կազմուած է երգչախումբ մը, 1968 թուականին յառաջացած է երգ ու պարի խումբը եւ 1977 թուականին հիմնուած է Կերպարուեստի Ակադեմիան (այժմու «Արշիլ Կորք»ի գծագրական ուսումնարանը):

1971-1973 թուականներուն, Միութիւնը զարկ տուած է սուրիական ռատիoկայանի հայկական երաժշտութեան ձայնասփռումներուն:

1980ական թուականներուն յատկանշական դեր ունեցած է Տիկնանց յանձնախումբը:

Համազգայինի Սուրիոյ ընատնիքը իր շրջաններու գործունէութիւնը համադրուած եւ կենսունակ մակարդակի վրայ պահելու յառաջադրանքին մղուած, յանձին տուեալ շրջաններու ներկայացուցիչներու 21 յունիս 1987 թուականին Սուրիոյ ներկայացուցչական Ա. Ժողովով յառաջացուցած է Սուրիոյ Շրջանային Վարչութիւնը, որ զբաղած է ներքին կազմակերչական եւ շրջաններու մշակութային կեանքը յուզող հարցերով, առաւել անոր գլխաւոր առաքելութիւնը եղած է միջ-մասնաճիւղային գործունէութեան համադրումը:

Ուղարկած է Սուրիոյ շրջաններու մասնաճիւղերուն Հալէպի մէջ կայացած բարձրորակ մակարդակի ձեռնարկներն ու դասախօսները:

Համազգայինի Սուրիոյ Շրջանային Վարչութեան կեդրոնը եղած է Հալէպ:

Համազգայինի թատերական գործունէութիւնը դրսեւորուած է «Զաւարեան» Թատերական Միաւորի, «Ն. Աղբալեան» Մասնաճիւղի «Լ. Շանթ» եւ ՀԵՄ-ի Մասնաճիւղի (Նախապէս Համազգայինի կապուած) մանկապատանեկան «Ռազմիկ» թատերախումբերու ընդմէջէն, որոնք յաջորդաբար ներկայացուցած են թատերական որակաւոր գործերը

Շրջանային Վարչութեան գործունէութիւնը կեդրոնացած է նաեւ Սփիւռք-Հայրենիք մշակութային կապերու ամրապնդման շուրջ:

Այսպէս՝ հիւրընկալած է հայրենի գեղարուեստական խումբեր, հրաւիրած է մշակութային վերելքի տեսլականով:

«Լեւոն Շանթ» թատերախումբը, որ հիմնուած էր 1980 թուականին, յաջորդաբար ներկայացուցած է թատերական որակաւոր գործեր, ինչպէս նաեւ պատրաստած է դերասաններ: Ապա միացած է «Զաւարեան» Թատերական Միաւորին:

Հալէպի մէջ կը գործէ Համազգայինի միակ մասնաճիւղը՝ «Նիկոլ Աղբալեան», որ հիմնուած է 1930 թուականին:

Տարիներ անց իբրեւ կեդրոն օգտագործած է Սուրբ Քառասնից Մանկանց եկեղեցւոյ հառաւային կողմը, որ կառուցուած է 1853 թուականին: 1926 թուականին սրահ կառուցուած է, իբրեւ Ազգ. Մանկապարտէզի: Մինչեւ 1980, օգտագործուած է իբրեւ Ազգ. Հայկազեան Մանկապարտէզի սրահ: 1983 թուականին նորոգութեան ենթարկուած է եւ վերանուանուած «Նիկոլ Աղբալեան» սրահ: 2010 թուականին հիմնովին վերանորոգուած է:

2005-էն ետք Մասնաճիւղին կը տրամադրուի Հալէպի նախկին հրշէջներուն կից գտնուող՝ «Կենաց» Վարժարանը, որ իր գործունէութիւնը հոն կատարէ:

Մասնաճիւղի հովանաւորութեամբ կը գործեն.

– «Արշիլ Կորքի» գծագրական ուսումնարանը (1971): «Ա. Կորքի» գծագրութեան արուեստանոցին համար, իբրեւ դասատու հայրենիքէն եւ տեղացի արուեստագէտներ հրաւիրուած են աշխատանքի, անոնք իրենց օգտաշատ ներդրումը ունեցած են գծագրական արուեստի ճամբով:

1985-ին հիմնադրուած ուսումնարանը կոչուած աշխարհահռչակ հայազգի գեղանկարիչ Արշիլ Կորքիի անունով Մանկապատանեկան դաստիարակութեան ձգտող դպրոցն է, ուր աւելի քան 50 պատանի տղաք եւ աղջիկներ շաբաթական 4 դասապահերով հետեւած են փորձառու ուսուցիչներու ցուցմունքներուն:

– «Սարդարապատ» պարախումբը հիմնուած է 1981 թուականին: Իբրեւ պարուսոյց հրաւիրած են Հայաստանէն, որոնք միատեղ ջանքերով պահած են պարախումբը պատուաբեր դիրքի վրայ:

«Սարդարապատ» պարախումբի կողմէ, որպէս մեծագոյն իրագործումներ կարելի է համարել Հայաստանի Հայ Մշակոյթի Աշխատողներու Միութեան կազմակերպութեամբ 1993-ի Սեպտեմբերին կայացած փառատօնի մասնակցութիւնը, ապա՝ եզրափակիչ համերգով հանդէս գալը Երեւանի պետական օփերայի սրահէն ներս: 1999-ին պարախումի ելոյթը Սուրիոյ պատմական քաղաք Պուսրայի մէջ, ապա՝ մասնակցութիւնը դարձեալ հայրենիքէն ներս «Մէկ ազգ մէկ մշակոյթ» փառատօնին, ներկայութեամբ պետական աւագանիին. ապա նաեւ ելոյթ՝ Կիպրոսի մէջ:

– Կերպարուեստի ակադեմիա: Կերպարուեստի ակադեմիայի ստեղծումն ու գոայտեւումը կը մատնանշեն Համազգայինի նախաձեռնութիւնը հայկական կերպարուեստի ուսուցման եւ զարգացման կարեւոր գործին մէջ:

Կերպարուեստի Յանձնախումբը կազմակերպած է ցուցահանդէս-վաճառքներ հայրենի, թէ տեղական արուեստագէտներու գործերու, ինչպէս նաեւ՝ «Աշուն» եւ «Ստուերներ» շարքի ցուցահանդէսները, մասնակցութեամբ հայ, թէ արաբ կերպարուեստագէտներու:

– «Շուշի» մանկապատանեկան պարարուեստի դպրոցը հիմնուած է 2003-ին:

«Շուշի» մանկապատանեկան պարախումբը կարճ ժամանակամիջոցի մէջ կը դառնայ շնչող ներկայութիւն մշակութասէր հալէպահայութեան իրականութեան մէջ եւ իր ներդրումը ունեցած մարդուժի պատրաստութեան կենսական գործընթացին` երաշխաւորելով պարարուեստի բնագաւառէն ներս ուռճացող ապագայ սերունդի մը վառ պատկերը:

Հարիւրաւոր պարման-պարմանուհիներ այս դպրոցին մէջ կը սորուին պարի հմտութիւններն ու գեղեցիկ ձեւերու ներկայացումը:

Պարախումբը ժողովրդային, ազգագրական պարերու կողքին կը ներկայանայ նաեւ արաբական, ռուսական, յունական, վրացական, հնդկական եւ այլ ժողովուրդներու պարարուեստով:

Հալէպի մէջ Համազգայինի «Նիկոլ Աղբալեան» մասնաճիւղէ զատ կը գործեն հետեւեալ միաւորները.

– Համազգայինի «Զուարթնոց» Երգչախմբային միաւորը հիմնուած է 1988 թուականին: «Զուարթնոց» երգչախումբը նախապէս կազմուած է 1969 թուականին՝ Ազգ. Առաջնորդարանին կողմէ:

Միաւորի Վարչութեան նախաձեռնութեամբ քանի մը տասնեակ տարիներու յաղթական ելոյթներուն կողքին գեղարուեստական ղեկավարութեամբ տեղական թէ հայրենի արուեստագէտներ մասնակցութիւն բերած է ազգային թէ պետական տօներու առթիւ կազմակերպուած հրապարակային հանդիսութիւններուն, առաւել եւս ընդառաջելով հրաւէրներու խանդավառած է Սուրիոյ եւ Լիբանանի հայահոծ համայնքները իր համերգներով: Ելոյթ ունեցած է ի պատիւ Կիլիկիոյ Թեմի Ազգ. Կրօնական Ժողովի (գումարուած 1992-ին) պատգամաւորներուն, հովանաւորութեամբ երջանկայիշատակ Գարեգին Բ. Կաթողիկոսին:

– Հալէպի «Զաւարեան» թատերական միաւորը, հիմնուած է 1988 թուականին: Իսկ «Զաւարեան» թատերախումբը կազմուած է 1947-ին՝ Ազգ. Զաւարեան Վարժարանի հոգաբարձութեան կողմէ:

Համազգայինի «Զաւարեան» Թատերական թատերասէր հասարակութեան ներկայացուցած է հայ, թէ օտար թատերագրերու գործերը, բեմադրութեամբ հայրենիքէն վկայեալ թէ Լիբանանէն հրաւիրուած բեմադրիչներու, որոնք իրենց հնարաւոր ճիգերով ջանացած են լաւագոյն ձեւով ներկայացնել պատմական, թէ ժամանակակից թատերախաղը, ողբերգութիւնն ու կատակերգութիւնը:

Նշենք, որ «Զաւարեան» Թատերական Միաւորի մէջ ներառնուած է «Լեւոն Շանթ» թատերախումբը:

– Համազգայինի «Բարսեղ Կանաչեան» Երժշտանոց Դպրոցը հիմնուած 1985-ին: Կեդրոն ունենալով Ազգ. Սահակեան Վարժարանը:
Աւելի քան 200 աշակերտներով երաժշտական դաստիարակման ճամբով կը տանի արդիւնաւէտ աշխատանք. երաժշտական գործիքներու ուսուցումը կը կատարուի տեղական, թէ հայրենիքէն վկայեալ ուսուցիչ-ուսուցչուհիներու կողմէ, որոնց աշխատանքը կ’ընդգրկէ ուսումնական տարեշրջանի ժամանակամիջոցը, կիսամեայ եւ ամավերջի քննութիւններով, իսկ տարեշրջանի աւարտին դպրոցի սաները ելոյթ կ’ունենան հրապարակային երաժշտական ձեռնարկներով:

Միաւորի Վարչութեան նախաձեռնութեամբ կազմակերպուած են դաշնամուրային, փողային եւ լարային նուագահանդէսներ, նուիրուած մեծ երաժշտահաններու:

– Համազգայինի Հայագիտական Հիմնարկը Համազգայինի Սուրիոյ Շրջանային Վարչութեան նախաձեռնութեամբ մեծ յոյսերու իրականացմամբ հիմնադրուած է 1996 թուականին, ընթացք տալով ազգային կեանքի այժմու պահանջքներու.- հայ լեզուի եւ գրականութեան դասատու պատրաստելու, իսկ հասարակական կեանքէ ներս՝ մարդոյժ:

Դասընթացքներուն կրնայ հետեւիլ հայկական երկրորդական վարժարան աւարտած ամէն հայորդի:

Հիմնարկին դասընթացքները կ’երկարին չորս տարուան վրայ (Ա., Բ., Գ. եւ Դ. կարգեր): Դասաւանդութիւնները տեղի կ’ունենան երկուշաբթիէն շաբաթ, օրական 3-4 դասապահերով: Այսպէս կ’ընթանան առաւօտեան եւ յետմիջօրէի դասընթացքները, որոնց դասաւանդութիւնը վստահուած է քաղաքիս, թէ հայրենիքէն վկայեալ դասախօսներու, որոնք բծախնդրօրէն կը տանին հայ լեզուի եւ յարակից նիւթերու ուսուցման բազմերես աշխատանքը:

Կը դասաւանդուին հայերէն լեզու եւ գրականութիւն, հայոց պատմութիւն, մատենագրութիւն, հայ եկեղեցւոյ պատմութիւն, մամուլ եւ լրագրութիւն, հայ արուեստ եւ այլն:

Հայագիտական այս դասընթացքը կը յարատեւէ յատկապէս Գ. Կիւլպէնկեան հիմնարկութեան, Բերիոյ Թեմի Ազգ. Իշխանութեան, ՀՕՄ-ի Կեդր. Վարչութեան, ՍՕԽաչի Շրջանային Վարչութեան եւ Սուրիոյ պատերազմի պատճառով՝ Սուրիահայ Շտապ Օգնութեան եւ Վերականգնումի Մարմնի յատկացումներով:

Հիմնարկի կեդրոնը Սուրիոյ պատերազմի նախօրէին Քարէն Եփփէ Ազգային Ճեմարանն էր, Հալէպի պատերազմը պատճառ դարձաւ, որ ճեմարանի շէնքը անապահով վիճակի մէջ մատնուի եւ հրթիռակոծումներու թիրախ հանդիսանայ, այդ իսկ պատճառով հիմնարկը առժամեայ տեղափոխուեցաւ նախ «Սիմոն Վրացեան» կեդրոն, ապա «Արամ Մանուկեան Ժողովրդային Տուն» (ԱՄԺՏ):

Արդարեւ աշակերտներէն շատեր, կիսատ թողելով իրենց ուսումը, հեռացան քաղաքէն: Հեռացան նաեւ դասախօսներէն ոմանք: Պաշտօնի կոչուեցան նոր ուսուցիչներ: Հակառակ ուսանողներու նօսրացած թիւերով Հիմնարկը շարունակեց իր առաքելութիւնը:

– Հալէպի մէջ, 1926-ին հիմնուած է Հայ Երիտասարդաց Միութիւնը (ՀԵՄ):

Անոր հովանաւորութեամբ գործած են «Քրիստափոր» գրադարանը (1919) եւ «Ռազմիկ» մանկապատանեկան թատրոնը (1990):
Մերթ գործած է իբրեւ առանձին միութիւն, մերթ Համազգայինի իբրեւ միաւոր մասնաճիւղ: Իսկ վերջին շրջանին կը գործէ իբրեւ առանձին միութիւն:

Իբրեւ կեդրոն օգտագործած է Թիլէլի նախկին ՀՄԸՄ-ի ակումբը:

Միութիւնը ունեցած է գրական, ընկերային, թատերական, տիկնանց եւ այլ յանձնախումբեր:

1987-ին, ազգապատկան «Անի» շէնքի երրորդ յարկաբաժինը եղած է ՀԵՄ-ի համակարգիչի վարժարան:

Արձանագրած է հրատարակչական մեծ նուաճումներ, եւ խիստ յատկանշական դերակատարութիւն ունի հայ-արաբ բարեկամութեան ամրապնդման եւ Հայ Դատի կենսագործման ի խնդիր տարուած աշխատանքներուն մէջ:

Ունի պետական ճանաչում, տարեկան ընդհանուր ժողովով կ’ընտրուի միութեան գերագոյն մարմինը՝ վարչութիւնը: Ժողովին ի պաշտօնէ ներկայ կ’ըլլայ Հալէպի ընկերային ծառայութեան ներկայացուցիչն ալ:

ՀԵՄ տարած է ծրագրուած աշխատանք հայ-արաբ մշակութային կապի ամրապնդման ձգտող ձեռնարկներու կազմակերպմամբ եւ տոհմիկ երեկոներու ներկայացմամբ:

Կազմակերպած է պետական, թէ ազգային տօներու նուիրուած հրապարակային հանդիսութիւններ:

 Հայ Երիտասարդաց Ընկերակցութիւն (ՀԵԸ)

1 Յուլիս 1931 թուականին, Հալէպի մէջ, հիմնուած ՀԵԸ-ի մասնաճիւղը սկզբնական օրերէն, մարզականին առընթեր, ծաւալած է նաեւ մշակութային գործունէութիւններ:

1952 թուականին, վերակազմուած է ուսանողական բաժինը, որ նոր թափով սկսած է աշխատանքները՝ մեծ դերակատարութիւն ունենալով մանաւանդ հայ ուսանողութիւնը համախմբելու մարզէն ներս:

Վերակազմուած է «Սպենդիարեան» երգչախումբը (նախապէս հիմնուած 1953 թուականին): 1969-1974 տարիներուն գործած է իր տեսակին մէջ եզակի «Young Stars» էսթրատային նուագախումբը: 1970-ին, ՀԵԸ-ի փոխանցուած է «Պետրոս Ադամեան» թատերախումբի հովանաւորութիւնը: 1995-էն ի վեր Միութեան հովանաւորութեամբ կը գործէ Արամ Խաչատուրեանի անուան Երաժշտանոցը:
Միութիւնը ունի պետական ճանաչում: 1964-ին օժտուած է սեփական ակումբ-ընտանեկան պարտէզով:

ՀԵԸ-ի Գերագոյն մարմինը Գործադիր Մարմինն է, ունի Տեղական Վարչութիւն, Սկաուտական Խորհուրդ, Ուսանողական, Թատերական, Մարզական, Պարարուեստի, «Արամ Խաչատուրեան» երաժշտանոց, երաժշտական, Մշակութային յանձնախումբեր:

Թէքէեան Մշակութային Միութիւն (ԹՄՄ)

1955-ին հիմնուած է ԹՄՄ-ի Հալէպի մասնաճիւղը:

Սկզբնական շրջանի կազմակերպչական աշխատանքներէն ետք, 1957 թուականին, Միութիւնը ծաւալած է մշակութային գործունէութիւններ, որոնք առաւել աշխուժացած են երբ 1965 թուականին ունեցած է իր սեփական ակումբ-ընտանեկան պարտէզը:
Միութեան յատկանշական գործունէութիւններէն եղած են.- «Ticky Boys» էսթրատային նուագախումբը (1963), որ օրին աննախընթաց երեւոյթ մը եղած է հայ համայնքի կեանքէն ներս, «Ներսէսեան» թատերախումբը (1972), «Կռունկ» երգչախումբը (1973), «Big band» նուագախումբը (1974) եւ թէքուանտօ-ի խումբը:

ԹՄՄ հիմնադրութեան տարին՝ 1955-ին հիմնուած է նաեւ միութեան գրադարանը: 1987 թուականին վերանորոգման աշխատանքներէ ետք կատարուած է «Դանիէլ Վարուժան» գրադարանի պաշտօնական բացումը: Գրադարանը ունեցած է շուրջ 4800 գիրք:
ԹՄՄ-ը ունի իր գլխաւոր ղեկավար մարմինը, որ նոյն ինքն ակումբի վարչութիւնն է՝ «Վերին մարմին», ինչպէս նաեւ գործունէութեան բնագաւառի համապատասխան ենթակայ վարչութիւններ:

ԹՄՄ ծնունդէն ի վեր կը շարունակէ մշակութային իր առաքելութիւնը՝ նպաստելով համայնքի ազգային-մշակութային կեանքի վերելքին, միաժամանակ ամրապնդելով հայրենիք-Սփիւռք փոխ-գործակցութիւնը: 2000-ի յունիսէն սկսեալ, Միութեան հովանաւորութեամբ կը գործէ «Տէր եւ Տիկ. Միհրան եւ Անի Պըլըգեան» մշակութային ֆոնտը:

Սուրիոյ պատերազմին, մասնաւորապէս Հալէպի մէջ հրթիռակոծումներուն թիրախ դարձաւ ԹՄՄ ակումբ-ընտանեկան պարտէզը: Միութեան կեդրոնը առժամեայ տեղափոխուեցաւ համեմատաբար աւելի ապահով սեպուած Սիւլէյմանիէ շրջանը գտնուող «Եկաւեան» մատենադարանը:
Միութիւնը, թիւի նուազումով թէեւ անցեալի աշխուժ գործունէութիւնը չունի, սակայն կը փորձէ գոյատեւել:

Ազգային Մշակութային Միութիւն

Հիմնուած է Հալէպի մէջ, 1955-ին: Նախ ծաւալած է գրական գործունէութիւն եւ 1958-1970 տարիներուն պարբերաբար լոյս ընծայած է «Երկիր» պարբերաթերթը (խՄբագիր՝ Հայկ Գույումճեան): 1955-1959 թուականներուն ունեցած է մարզական գործունէութիւն, 1959-1966 տարիներուն՝ ունեցած է պարախումբ, իսկ 1961-1968 թուականին՝ թատերախումբ:

Միութիւնը պետական ճանաչում ունի:

1995-ին միութեան կեդրոնը տեղափոխուած է Վիլլաներ թաղամասը, ուր օժտուած է սեփական ակումբով:

Միութեան կից գործող «Գրական շրջանակ»ը կը կազմակերպէր գրական երեկոներ ու զրոյցներ, ուր կը քննարկուէին հայ գրողներու ստեղծագործութիւններ: Միութեան ակումբին մէջ կը կազմակերպուէր դասախօսութիւններ, յոբելեանական երեկոներ եւ այլ ձեռնարկներ:

Սովետ Միութեան ժամանակաշրջանին շատ մօտ կապեր ունեցած է Հայաստանի հետ: Սովետ Միութեան փլուզումով անդամներու թիւը նուազած է, հասած է մինչեւ քանի մը հոգիի:

Վերջին շրջանին միութիւնը լուծարումէ փրկելու միտումով յառաջացած է Վարչութիւն մը: Թէեւ Վարչութիւնը շատ գործօն դերակատարութիւն չունի, բայց եւ այնպէս իր գոյութիւնը կը պահէ:

Սուրիոյ պատերազմի ընթացքին յատկապէս Հալէպի հրթիռակոծումներու պատճառով, իսկ միւս կողմէ Ազգային Մշակութային Միութեան գուրծունէութիւնն ալ նկատի առնելով կեդրոնը տրամադրուած է Կիլիկիան մանկապարտէզին, ուր դասաւանդութիւնները հոն տեղի կ’ունենան:

Ուրֆայի Վերածնունդ Մշակութային Միութիւն

Հիմնուած է Հալէպի մէջ, 1957-ին: Կը նկատուի շարունակութիւնը 1926-ին Հալէպի մէջ հիմնուած Ուրֆայի Հայրենակցական Միութեան: Սկիզբէն ի վեր Միութիւնը օժտուած է սեփական ակումբով՝ ծաւալելով մշակութային բազմաճիւղ գործունէութիւններ. ունեցած է երգչախումբ (1945), պարախումբ, թատերախումբ, ինչպէս նաեւ զարկ տուած է մարզական խաղերու:

1957-ին միութիւնը պետական ճանաչում կը ստանայ:

Միութեան գլխաւոր մարմինը վարչութիւնն է, որ երկու տարին անգամ մը ընդհանուր ժողովով կը յառաջանայ, ժողովին ներկայ կ’ըլլայ Հալէպի ընկերային ծառայութեան ներկայացուցիչն ալ:

Ունեցած է պատանեկան եւ երիտասարդական կազմեր, տիկնանց յանձնախումբ, Խորհրդատու մարմին (ծերակուտական):

Միութիւնը կը շարունակէ իր մշակութային գործունէութիւնները, եւ կը պահէ սեփական ընտանեկան ակումբը:

Նշենք, որ միութիւնը մշակութային գործունէութեան կողքին բարեսիրական աշխատանք ալ ծաւալած է: Ան յաճախ ուրֆացի հայրենակիցներու զանազն կարիքներուն ձեռք երկարած է, ինչպէս նաեւ ուրֆացի սաներ պահած է հայկական վարժարաններէ ներս:

«Նոր Սերունդ» Մշակութային Միութիւն (ՆՍՄՄ)

Հիմնուած է Հալէպի մէջ, 1957-ին: Կը նկատուի 1920-ական թուականներուն կազմուած Կիլիկեան Սանուց Միութեան շարունակութիւնը:

Միութիւնը շուտով ծաւալած է մշակութային լայն գործունէութիւններ՝ գործելով ՀՄՄ-ՆՍՄՄ ակումբէն ներս, դրութիւն մը, որ կը շարունակուի մինչեւ այսօր: Սեփական ակումբով օժտուած է 1979 թուականին:

Միութիւնը կը շարունակէ ազգային-մշակութային բազմաբնոյթ աշխատանքները: Գործած է Միութեան «Անդրանիկ» թատերախումբը (1921) եւ «Ազատ Ղարիպեան» պարախումբը (1984), որ հպարտալի ելոյթներով հանդէս եկած է Սուրիոյ տարածքին, միաժամանակ սատարելով Հայրենիք-Սփիւռք յարաբերութիւններու ամրապնդման: Պարախումբը ունեցած է նաեւ մանկապատանեկան խմբակ մըն ալ:
ՆՍՄՄ-ի վարչութիւնը հրատարակած է «Սերունդ» գրական գեղարուեստական փոքրածաւալ պարբերական լրատուն:

Միութիւնը ունեցած է «Մինաս Աւետիսեան»ի անուան նկարչական Ակադեմիան:

Կիլիկեան Մշակութային Միութիւն

Հիմնուած է Հալէպի մէջ, 1964-ին: Կը նկատուի անմիջական շարունակութիւնը անցեալի Կիլիկեան Նպաստից Միութեան:
Կը հովանաւորէ Կիլիկեան Ճեմարանը: Միութեան գլխաւոր նպատակը եղած է ընդգրկել Ճեմարանի շրջանաւարտները եւ նիւթապէս թէ բարոյապէս նեցուկ կանգնիլ վարժարանին: Իսկ մշակութային գործունէութիւնները ներդաշնակուած են ՆՍՄՄ-ի հետ, օգտագործելով այս վերջնին ակումբը:

Կիլիկեան մշակութային միութիւնը ունեցած է «Ֆիրուզ Խանզատեան» գրադարան:

Միութիւնը ծաւալած է նաեւ հրատարակչական ողջունելի աշխատանքներ:
Յայտնենք, թէ Հալէպի հայ համայնքի մշակութային կեանքը հարուստ եղած է անհատական նախաձեռնութիւններով եւս. օրինակ, 1970-1982 տարիներուն գործած է «Պարոնեան» թատերախումբը (ղեկավարութեամբ՝ Ռուբէն Պարսումեանի), 1981 թուականին ընթացք առած է «Նանոր» երգչախումբը (ղեկավարութեամբ՝ Յարութիւն Կէնտիմեանի), որ տարիներ ետք դադրած է գործելէ, նոյնպէս 1983 թուականին հիմնուած «Նարեկացի» երգչախումբը (ղեկավարութեամբ՝ Պօղոս Ապաճեանի) տարիներ հպարտալի ելոյթներ տալէ ետք գործելէ դադրած է:

hairenikweekly.com/2017/11/17/33726

120 Total Views 1 Views Today

Be the first to comment

Leave a Reply

Your email address will not be published.


*