Ադըյամանի Փիրսուլթան Աբդալ մշակութային միության (PSAKD) ղեկավար. ազգերը պետք է միավորվեն դռների վրա նշան անելու մտածելակերպի դեմ

27 ՆՈՅԵՄԲԵՐ 2017 – ԱՅԺՄԵԱՆ ԹՈՒՐՔԻԱ – ԱԶԳԱՅՆԱՄՈԼԱԿԱՆ – ԾԱՒԱԼԱՊԱՇՏԱԿԱՆ ՔԱՂԱՔԱԿԱՆՈՒԹԻՒՆ:

Մուստաֆա Յուքսել

PSAKD-ի Ադըյամանի մասնաճյուղի ղեկավար Մահմութ Յափըջըն գնահատականներ է տվել Մալաթիայում ալևիների տների դռների վրա արված նշաններից հետո հայկական Փրկության եկեղեցիների միության վրա քարերով հարձակմանը: Յափըջըն ասել է. «Մալաթիայում ինչ-որ բան է կատարվում, որոշ մարդիկ ինչ-որ բան են փորձում անել: Ալևի քաղաքացիների դռների վրա նշաններ անելուց հետո հայկական Փրկության եկեղեցիների միության վրա քարերով հարձակումը պատահականություն չէր»:

Ալևի քաղաքացիների տան դռների վրա արված նշանների առաջացրած արձագանքները դեռ չեն ավարտվել, երբ դրանից անմիջապես հետո հայկական Փրկություն եկեղեցական միության վրա քարերով հարձակումը տեղի ունեցավ: Այն կրկին զայրացրել է հասարակության բազմաթիվ ներկայացուցիչների, հատկապես` ալևիներին:

Ալևիների միությունների ու ջեմէվիների կողմից կազմակերպված մամլո ասուլիսներում ու հայտարարությունների մեջ այս հարձակումները դատապարտվել են, իսկ Փիրսուլթան Աբդալ մշակութային միության (PSAKD) Ադըյամանի մասնաճյուղի ղեկավար Մահմութ Յափըջըն տեղի ունեցած դեպքերի մասին «PİRHA» լրատվական գործակալության թղթակցին հարցազրույց է տվել:

Սա Ադըյամանում էլ է տեղի ունեցել

Յափըջըն ասել է. «Դատապարտում ենք Մալաթիայում մեր ալևի հայրենակիցների դռների վրա նշաններ անելը: Ուզում ենք տեղեկացնել, որ մենք նրանց կողքին ենք», ապա շեշտել է հետևյալը. «Այս իրադարձությունները նոր չեն Հանրապետության ողջ պատմության ընթացքում: Ալևիների հետ բազմիցս տեղի են ունեցել նման դեպքեր. Քերբելայի ջարդերից սկսած մինչև այսօրվա Մալաթիայում ալևիների տների դռների վրա արված նշանները: Ալևիների հետ սա պատահել է Դերսիմում, Մարաշում, Սիվասում, Գեզիում: Սա սունիներին հարիր չէ: Ակնհայտ է, որ համակարգը ալևիներին ու սունիներին իրար դեմ հանելու համար մի պայմանավորվածություն է գործի դրել: Սակայն սա մենք երբեք թույլ չենք տա: Մի քանի տարի առաջ էլ նույն բանը տեղի ունեցավ: Ադըյամանում գնտվող բոլոր խմբերը միավորվեցին ու այս երևույթի դեմ դուրս եկան: Այսօր Մալաթիայում էլ նույն ձևով են արձագանքել»:

Այն, ինչ տեղի ունեցավ Մալաթիայում, պատահականություն չէր

Մալաթիայում դռներին նշաններ անելու մտածելակերպի դեմ պայքարելու ենք: Թույլ չենք տալու, որ հասնեն իրենց նպատակներին»,- ասել է Յափըջըն, ապա ավելացրել. «Թույլ չենք տա, որ ալևիների ու սունիների միջև բախումների համար հող նախապատրաստվի»:

Մահմութ Յափըջըն նշել է, որ Մալաթիայում ինչ-որ բան է տեղի ունենում, ապա ավելացրել է. «Որոշ մարդիկ ցանկանում են ինչ-որ բան անել այստեղ: Ալևիների դռների վրա նշան անելուց հետո հայկական Փրկության եկեղեցական միության վրա հարձակումը պատահական չէր: Սա էլ նշանակում է, որ այս իրադարձությունները միայն ալևիների դեմ չեն, այլ երկրում բնակվող բոլոր այլազգիների դեմ են: Այս երկրում ապրող ալևիները, սունիները, հայերը, ասորիները, քրդերն ու թուրքերը պետք է միավորվեն ու պայքարեն սրա դեմ»:

www.pirha.net/adiyaman-psakd-baskani-kapi-isaretleyen-zihniyete-karsi-halklar-birlik-olmali-video-92869.html

Թարգմանեց Անի Մելքոնյանը

akunq.net/am/?p=57349

453 Total Views 2 Views Today

Be the first to comment

Leave a Reply

Your email address will not be published.


*