«Իմ դստեր` Լուսինի եւ Ճեմիլ Աքսուի որդիին` Արեւի Առկայութեան Պարագային Խաւարը Մեզի Չի Սպառնար». Մահիր Օզքան

01 ԴԵԿՏԵՄԲԵՐ 2017 – ԱՐԵՒՄՏԵԱՆ ՀԱՅԱՍՏԱՆ – ԷՐԿԻՐ:

«Իմ դստեր` Լուսինի եւ Ճեմիլի որդիին` Արեւի առկայութեան պարագային խաւարը մեզի չի սպառնար»: Իր ֆէյսպուքեան էջին մէջ գրած է Պոլիս բնակող համշէնահայ մտաւորական Մահիր Օզքան` անդրադառնալով արդէն 40 օրէ աւելի բանտի մէջ պահուող համշէնահայ մտաւորականներ Ճեմիլ եւ Նուրճան Աքսուներու որդիին` 8-ամեայ Արեւի ապրումներուն նուիրուած հրապարակման:

Ի դէպ, Մահիր Օզքան ու Ճեմիլ Աքսուն այն հազուադէպ համշէնահայերէն են, որոնք իրենց զաւակները կոչած են հայկական անուններով:

Մահիր Օզքան գրառման տակ հրապարակած է նաեւ թրքական «Ճումհուրիէթ» օրաթերթին մէջ տպագրուած «Չի կրնար մօրը դիպչիլ… Փոքրիկ Արեւի լուռ ճիչը» յօդուածը: Այդ մասին կը փոխանցէ Akunq.net-ը` ստորեւ թարգմանաբար ներկայացնելով ամբողջական յօդուածը.
Küçük-Arev1
«Արեւը 8-ամեայ երեխայ մըն է: Մայրը` Նուրճան Վայիչը, եւ հայրը` Ճեմիլ Աքսուն, 40 օրէ ի վեր բանտարկուած են` «ընկերային ցանցերու մէջ կատարած գրառումներուն» հիմքով: Բանտարկութեան դէմ անոնց վերջին առարկութիւնը եւս մերժուած է: Արեւը մայրն ու հայրը յաճախ կը տեսնէ հաստ ապակիին ետեւէն: Արեւին մօրաքոյրը` Թիւլայ Վայիչը, որ կը փորձէ Արեւին նկատել չտալ ծնողներուն բացակայութիւնը, կ՛ըսէ. «Արեւը մինչ այժմ երբեք չէ արտասուած: Վերջին անգամ, երբ ապակիի ետեւէն մայրը տեսաւ, աչքերը լեցուեցան, եւ ըսաւ. «Կարօտցած եմ, ե՞րբ դուրս պիտի ելլես»:

Մօրաքոյրը կը պատմէ, որ ամէն բան կ՛ընէ, որպէսզի Արեւը ուրախ պահէ, եւ որ ան խելամիտ երեխայ է, մինչեւ հիմա երբեք չէ լացած: Սակայն վերջին 10 օրը սկսած է անընդհատ ըսելու, որ կարօտցած է մօրն ու հօրը եւ հարցնելու, թէ երբ անոնք դուրս պիտի ելլեն:

Արեւի մօրաքոյրը կը նշէ. «Երբեմն դպրոց չ՛ուզեր երթալ: Յաճախ զինք իրենց տուն կը տանիմ, 1-2 օր միասին այնտեղ կը մնանք: Անոնց տունը այժմ դատարկ է: Քիչ մը կ՛ուրախանայ, երբ կը տեսնէ ծնողներուն իրերն ու իր խաղալիքները: Սակայն երբ նորէն իմ տունս կը տանիմ, անտրամադիր կ՛ըլլայ»:

Մօրաքոյրը անդրադառնալով անոնց վերջին հանդիպումին` կը յայտնէ. «Տխրեցաւ, երբ ապակիին ետեւէն չկրցաւ մօրը դպչիլ: Ես ինչքան ալ ջանքեր գործադրեմ` ան մօր ու հօր կարիքը ունի: Ես միայն Արեւին համար կ՛ուզեմ, որ անոնք ելլեն: Երբ զինք տխուր կը տեսնեմ, ես ալ կը տխրիմ: Արեւը զրկած են թէ մօրմէ եւ թէ հօրմէ: Միակ մաղթանքս է, որ հնարաւորինս արագ վերջ տրուի Նուրճանի եւ Ճեմիլի դէմ այս անարդարութեան»:

www.yerakouyn.com/?p=144238

82 Total Views 1 Views Today

Be the first to comment

Leave a Reply

Your email address will not be published.


*