Եւրոպայի Խորհուրդը Սկսաւ Ատրպէյճանի Անդամակցութեան Հնարաւոր Կասեցման Իրաւական Գործընթացը

06 ԴԵԿՏԵՄԲԵՐ 2017 – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:

47-անդամ ունեցող Եւրոպայի խորհուրդի նախարարներու կոմիտէն նախօրէին որոշում կայացուցած է Ատրպէյճանի հանդէպ սկսելու Համաձայնագիրի խախտման իրաւական գործընթաց, քանի որ Ատրպէյճանի իշխանութիւնները շարունակաբար հրաժարած են կատարելէ Մարդու իրաւունքներու եւրոպական դատարանի դեռ 2014-ի վճիռը` ատրպէյճանցի ընդդիմադիր քաղաքական գործիչ Իլկար Մամմատովը անյապաղ ազատ արձակելու վերաբերեալ: Այս մասին կը հաղորդէ Panorama.am-ը։

2010-ին ընդունուած այս ընթացակարգը ԵԽ-ն առաջին անգամ կը կիրառէ Ատրպէյճանի հանդէպ. ԵԽ նախարարներու կոմիտէն ՄԻԵԴ-ին պաշտօնապէս խնդրած է որոշել, թէ արդեօք Ատրպէյճանը չէ՞ իրականացուցած իր պարտաւորութիւնները, որ այս պարագային կապուած է դատարանի վճիռը չկատարելուն հետ:

2014-ին ՄԻԵԴ-ը «Իլկար Մամմատովը ընդդէմ Ատրպէյճանի» գործով գտած էր, որ ընդդիմադիր քաղաքական գործիչ Իլկար Մամմատովի ձերբակալութիւնն ու կալանքը Եւրոպական համաձայնագրի քանի մը կէտերու խախտում եղած է: ՄԻԵԴ-ը, մասնաւորապէս, նշած էր, որ Մամմատովի մեղադրանքն ու կալանքը նպատակ ունեցած է պատժելու կամ լռեցնելու զինք` կառավարութիւնը քննադատելու համար: Վճիռով արձանագրուած էր Համաձայնագրի 5, 6 եւ 18-րդ յօդուածներու խախտում:

Կը նշուի, որ մինչեւ 2017-ի Նոյեմբեր ՄԻԵԴ-ը արձանագրած է Համաձայնագրի 18-րդ յօդուածի խախտման ընդամէնը հինգ դէպք, որոնց պարագային, բացի Իլկար Մամմատովէն, բոլորը ազատ արձակուած են:

2014-էն ի վեր ԵԽ նախարարներու կոմիտէն, որ կը վերահսկէ ՄԻԵԴ վճիռներու կատարումը, այս գործով ընդունած է բազմաթիւ որոշումներ ու կոչ ըրած անյապաղ ազատ արձակելու Մամմատովը: Սակայն, վճիռի հրապարակումէն երեք տարի անց՝ Մամմատովը կը շարունակէ մնալ կալանքի տակ:

Յիշեցնենք, որ Հոկտեմբեր 25-ին ԵԽ նախարարներու կոմիտէն միջանկեալ որոշում կայացուց ու Ատրպէյճանին պաշտօնապէս տեղեկացուց երկրի հանդէպ աննախադէպ իրաւական գործընթաց սկսելու մասին, որ կրնայ յանգեցնել ԵԽ-ին Ատրպէյճանի անդամակցութեան կասեցման: ԵԽ-ն Ատրպէյճանին մէկ ամիս` մինչեւ Նոյեմբեր 29 ժամանակ տուած էր, որպէսզի ան ներկայացնէր իր դիրքորոշումը:

Նշենք, որ ԵԽ անդամ երկիրները պարտաւոր են կատարելու ՄԻԵԴ վճիռները: Զանոնք չկատարելը Համաձայնագրի կոպիտ խախտում է, որ իր հերթին կը հանդիսանայ ԵԽ կանոնադրութեան խախտում, որ կրնայ հիմք դառնալ ԵԽ-ին երկրի անդամակցութեան կասեցման համար:

www.yerakouyn.com/?p=144490

163 Total Views 2 Views Today

Be the first to comment

Leave a Reply

Your email address will not be published.


*