Սուրիական Բանակը Ետ Մղեց Քաթիֆայի Դէմ Իսրայէլեան Երեք Յարձակումներ

10 ՅՈՒՆՈՒԱՐ 2018 – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:

Սուրիական բանակի ընդհանուր հրամանատարութիւնը յայտարարեց, որ սուրիական հակաօդային պաշտպանութեան համակարգերը ետ մղած են երէկ կանուխ առաւօտուն սուրիական հողերուն դէմ իսրայէլեան երեք յարձակումներ:

Սուրիական բանակը հաղորդագրութիւն մը հրապարակելով յայտնեց, որ երէկ առաւօտեան ժամը 2:40-ին, լիբանանեան օդային տարածքէն շարք մը հրթիռներ արձակուած են Դամասկոսի գիւղական շրջանին մէջ գտնուող Քաթիֆա շրջանին դէմ: Հակաօդային պաշտպանութեան համակարգերը հակազդած են եւ հարուածած յարձակում գործող օդանաւերէն մէկը:

«Մայատին» արբանեակային պատկերասփիւռի կայանը կը նշէ, որ իսրայէլեան յարձակումին թիրախ դարձած շրջանին մէջ կը գտնուին սուրիական բանակին պատկանող կարեւոր ռազմակայաններ:

Սուրիական բանակի հաղորդագրութիւնը նաեւ նշեց, որ առաւօտեան ժամը 3:04-ին Իսրայէլ բռնագրաւեալ Կոլանի շրջանէն արձակած է ցամաքէ ցամաք երկու հրթիռներ, որոնք վար առնուած են սուրիական հակաօդային պաշտպանութեան համակարգերուն կողմէ:

Առաւօտեան ժամը 4:15-ին իսրայէլեան օդանաւերը այս անգամ բռնագրաւեալ Պաղեստինի Թապարայիա շրջանի օդային տարածքէն արձակած են չորս հրթիռներ, որոնցմէ մէկը վնասազերծուած է սուրիական հակաօդային պաշտպանութեան համակարգերուն կողմէ, իսկ մնացեալները ինկած են զինուորական դիրքի մը մօտ` պատճառելով նիւթական վնասներ:

Սուրիական բանակը զգուշացուց այսպիսի նախայարձակումի արարքներու վտանգէն եւ Իսրայէլը պատասխանատու նկատեց անոնց հետեւանքներուն համար:

Ըստ սուրիացի գործիչներու, իսրայէլեան ռմբակոծումի թիրախ դարձած է սուրիական բանակի 155-րդ զօրամասը: Զինեալ ընդդիմութիւնը իր կարգին նշեց, որ յարձակումին թիրախը հեռահար հրթիռներու եւ զէնքերու պահեստանոցներ պարունակող դիրքեր են:

www.aztagdaily.com/archives/378551

241 Total Views 1 Views Today

Be the first to comment

Leave a Reply

Your email address will not be published.


*