Նաթալինի Այցելեց Ծիծեռնակաբերդ. «Յուզուած Եմ Ձեր Ուժէն»

10 ՅՈՒՆՈՒԱՐ 2018 – ՆՈՐՈՒԹՈՒՆՆԵՐ – ՀԱՅ ԴԱՏ:

Հայաստան կը գտնուի Պրազիլի Կանաչներու կուսակցութիւնը ներկայացնող, Երեւանի քոյր-քաղաք Սան Փաուլոյի աւագանիի անդամ Ճիլպերթօ Թոնոս Նաթալինին: Անոր կ՛ընկերակցի Պրազիլի Հայ դատի յանձնախումբի նախագահ Գէորգ Զատիկեանը:

Տեղեկացնենք, որ Նաթալինի աշխուժ գործունէութիւն կը ծաւալէ Հայ դատի աշխատանքներուն ուղղութեամբ: Ան կը պաշտպանէ նաեւ Արցախի ինքնորոշման իրաւունքը:

Նաթալինի 7 յունուարէն Հայաստան կը գտնուի ՀՅԴ-ի հրաւէրով: Նշենք նաեւ, որ ան այս տարի պիտի մասնակցի Պրազիլի խորհրդարանական ընտրութիւններուն:

Նաթալինի հանդիպում ունեցած է Երեւանի քաղաքապետ Տարօն Մարգարեանի հետ: «Երկիր»-ի հետ զրոյցի մը ընթացքին ան յայտնեց, թէ քանի որ Երեւանն ու Սան Փաուլոն քոյր-քաղաքներ են, շարք մը համաձայնութիւններ ձեռք բերուած են Երեւանի քաղաքապետ Տարօն Մարգարեանի հետ: «Քաղաքապետին հետ խօսուած է երկու քաղաքներու փոխադարձ աշխատանքներուն մասին: Նոյնիսկ պայմանաւորուածութիւն ձեռք բերուած է, որ Սան Փաուլոյի քաղաքապետը այցելէ Երեւան` քաղաքի 2800-ամեակին մասնակցելու», ըսաւ Նաթալինի:

Ան նշեց, որ քաղաքապետին հետ հանդիպումին ընթացքին թէեւ խօսուած է տարբեր նիւթերու մասին, բայց ամէնէն կարեւորը այն է, որ աւելի մօտեցնեն Սան Փաուլոն Երեւանի, ինչու ոչ` նաեւ Արցախի հետ, ընդ որում` ո՛չ միայն մշակութային իմաստով, այլ նաեւ` քաղաքական:
ՀԱՅ ԴԱՏ
Երէկ Նաթալինի այցելած է Հայոց ցեղասպանութեան յուշահամալիր եւ յարգանքի տուրք մատուցած անմեղ զոհերու յիշատակին, այցելած է նաեւ Ցեղասպանութեան թանգարան: «Շատ յուզուած եմ: Ես ծանօթ եմ ձեր պատմութեան եւ հիմա շատ յուզուած եմ, որ կրցայ անմեղ զոհերու յիշատակի դամբարանին մօտ ծաղիկներ դնել», ըսաւ ան:

Ըստ Նաթալինիի, իրեն ամէնէն շատը յուզած է այն, որ հայերը շատ կարեւորութիւն կու տան իրենց արմատներուն, անցեալին եւ ներկային: «Դուք կարեւորութիւն կու տաք անցեալին` պաշտպանելով երկու կողմերը` արդիականը եւ արմատները: Այդ ձեւով կրնաք պատմութիւն պաշտպանել, եւ ես յուզուած եմ ձեր այդ ուժէն», շեշտեց ան:

Նաթալինի նշեց, որ այն, ինչ որ տեսած է Սան Փաուլոյի հայ գաղութին մէջ, կրնայ փաստել, որ այստեղ ալ հայերը նոյն մաքուր ազգն են: «Նոյն մաքուր, աշխատասէր ազգն էք. ինչ որ կը կարծէի, որ էք, այստեղ կրցայ աւելի պարզօրէն նկատել եւ հաստատել», ըսաւ ան:

Նաթալինի նաեւ տեղեկացուց, որ 5-էն 7 յունուարին եռօրեայ այցելութեամբ եղած է Արցախ: «Շատ տպաւորուած եմ Արցախով: Այնտեղ հայերուն հետ միասին նշեցի Ս. Ծնունդը, եղայ Շուշի եւ Գանձասար: Ուրախ եւ ոգեւորուած եմ Արցախ այցելելէ ետք», ըսաւ ան:

www.aztagdaily.com/archives/378608

126 Total Views 1 Views Today

Be the first to comment

Leave a Reply

Your email address will not be published.


*