Թրքական Բանակի Զրահապատ Մեքենաները Սուրիական Բանակին Դէմ Մարտերո՞ւն Կը Մասնակցին

12 ՅՈՒՆՈՒԱՐ 2018 – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:

Սուրիական զինեալ ընդդիմութիւնը յայտարարեց, որ Իտլիպի հարաւարեւելեան գիւղական շրջանին մէջ սուրիական բանակին վերջերս գրաւած դիրքերուն դէմ հակայարձակում շղթայազերծած է:

Սուրիական բանակին դէպի Ապու Զուհուր զինուորական օդակայան յառաջխաղացքը կասեցնելու նպատակով տարբեր առանցքներէ շղթայազերծուած յարձակումին կը մասնակցին Ահրար Շամ, Ժէյշ Ահրար, Ֆայլաք Շամ, Իտլիպի ազատ բանակ, Ժէյշ Իզզա, Ժէյշ Նասեր, Թուրքմենական իսլամական կուսակցութիւն, Թահրիր Շամ խմբաւորումները:

«Մայատին» արբանեակային պատկերասփիւռի կայանը կը հաղորդէ, որ գործիչներ ընկերային ցանցերուն վրայ հրապարակած են ժապաւէններ, որոնց մէջ կ՛երեւի, որ «Եփրատի վահան» գործողութեան մասնակից խմբաւորումներէն Ֆայլաք Շամը կ՛օգտագործէ թրքական բանակի զրահապատ ծանր զէնքերն ու հրետանին, որոնք խմբաւորումին տրամադրուած էին Հալէպի գիւղական շրջանին մէջ ՏԱՀԵՇ-ի դէմ կռիւներուն ընթացքին:

Գործիչները կը նշեն, որ վերոնշեալ խմբաւորումները ընդառաջած են նոր ճակատներ բանալու եւ Ժապհաթ Նուսրային աջակցելու թրքական հրամանին:

Նշենք, որ սուրիական բանակն ու անոր դաշնակիցները Իտլիպի հարաւային գիւղական շրջանին մէջ շատ արագ յառաջխաղացք արձանագրեցին եւ գրաւեցին Ապու Տահուր օդակայանին մօտ Ժապհաթ Նուսրայի պաշտպանական վերջին գիծը:

«Նաշրա» կայքը կը հաղորդէ, որ սուրիական բանակը սանձած է զինեալ խմբաւորումներու յարձակումը եւ սկսած վերատիրանալ այն դիրքերուն, որոնցմէ նահանջած էր: Զինեալ խմբաւորումները իրենց կարգին խոստովանած են, որ սուրիական բանակը վերագրաւած է երէկ իր կորսնցուցած դիրքերուն մեծամասնութիւնը:

www.aztagdaily.com/archives/378891

114 Total Views 1 Views Today

Be the first to comment

Leave a Reply

Your email address will not be published.


*