Իրանի Հետ Համաձայնագիրին Եւրոպական Ուժեղ Զօրակցութիւն

12 ՅՈՒՆՈՒԱՐ 2018 – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:

Եւրոպական Միութեան արտաքին քաղաքականութեան բարձրագոյն յանձնակատար Ֆետերիքա Մոկերինի յայտնեց, որ «(Իրանի) հիւլէական ծրագիրին շուրջ համաձայնութիւնը շատ կարեւոր է»` նշելով, որ Իրանի հիւլէական ծրագիրին շուրջ Միացեալ եւ համապարփակ աշխատանքներու ծրագիրը կը գործէ եւ կ՛երաշխաւորէ անոր հիմնական նպատակներուն իրագործումը: «Մենք կը զօրակցինք անոր ամբողջական գործադրութեան», ըսաւ ան:

Պրիւքսելի մէջ Իրանի արտաքին գործոց նախարար Մոհամետ Ճաւատ Զարիֆի եւ եւրոպական շարք մը երկիրներու արտաքին գործոց նախարարներուն հետ միացեալ մամլոյ ասուլիսի մը ընթացքին Մոկերինի նշեց, որ Հիւլէական ուժանիւթի միջազգային գործակալութեան կողմէ պատրաստուած 9 զեկուցումներ կը հաստատեն, որ Իրան յանձնառու է համաձայնագիրին, եւ իրանեան հիւլէական ծրագիրը խաղաղասիրական է: «Այս համաձայնութիւնը իրանեան հիւլէական ծրագիրի հսկողութիւնը կ՛արտօնէ», նշեց ան:

Ֆրանսայի արտաքին գործոց նախարար Ժան-Իւ Լ՛Օտրիան շեշտեց, որ իր երկիրը յանձնառու կը մնայ Իրանի հետ գոյացած համաձայնութեան եւ բոլոր կողմերուն կոչ կ՛ուղղէ զայն յարգելու:

«Միացեալ Նահանգներ պէտք է յարգեն հիւլէական ծրագիրին շուրջ համաձայնութիւնը, եւ պէտք է Իրանի դէմ հաստատուած քաղաքական պատժամիջոցները վերցուին», յայտարարեց ֆրանսական դիւանագիտութեան պետը:

Բրիտանիոյ արտաքին գործոց նախարար Պորիս Ճոնսըն իր կարգին յայտնեց, որ Հիւլէական ուժանիւթի միջազգային գործակալութեան վկայութեամբ` Իրան կը գործադրէ համաձայնագիրը, ինչ որ շատ կարեւոր է: «Իրանի հետ գոյացած համաձայնութենէն աւելի լաւ ընտրանք գոյութիւն չունի», աւելցուց ան:

«Շատ կարեւոր է աշխարհի վրայ այս համաձայնագիրին աջակցութիւն ապահովել, որպէսզի Իրան կարենայ ցոյց տալ, որ շրջանին մէջ լաւ դրացի մըն է, եւ կեդրոնանալու համար այն հարցին վրայ, թէ Իրան ի՛նչ կրնայ ընել Եմէնի մէջ ահաւոր տագնապի լուծման օժանդակելու, Սուրիոյ մէջ խաղաղութեան հաստատման եւ շրջանին մէջ այլ հարցերու լուծման վերաբերեալ», ըսաւ բրիտանական դիւանագիտութեան պետը:

Գերմանիոյ արտաքին գործոց նախարար Զիկմար Կապրիէլ իր կարգին յայտնեց. «Եւրոպական Միութիւնը կ՛ուզէ պահպանել Իրանի հետ գործարքը: Հակառակ այն իրողութեան, որ այդ երկիրը շրջանին մէջ բարդ դերակատարութիւն մը ունի` կը կարծենք, որ անհրաժեշտ է Իրանի հիւլէական ծրագիրին շուրջ համաձայնագիրը անջատել այլ հարցերէն»:

Յիշեցնենք, որ Միացեալ Նահանգներու նախագահ Տանըլտ Թրամփ սպառնացած էր իր երկիրը դուրս բերել Իրանի հետ գոյացած համաձայնագիրէն, իսկ Քոնկրեսին մէջ այդ քայլին վերաբերեալ տարակարծութիւն գոյութիւն ունի:

www.aztagdaily.com/archives/378913

27 Total Views 1 Views Today

Be the first to comment

Leave a Reply

Your email address will not be published.


*