Էրտողան. «Փութինին Կոչ Ուղղեցինք` Տէր Զօրի Քարիւղի Դաշտերը Փոխադարձաբար Կառավարելու»
11 ՄԱՐՏ 2020 – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:
Թուրքիոյ նախագահ Ռեճեփ Թայիփ Էրտողան երէկ յայտնեց. «Թուրքիան Ռուսիոյ նախագահ Վլատիմիր Փութինին կոչ ուղղեց` Սուրիոյ Տէր Զօր քաղաքին մէջ քարիւղի դաշտերը փոխադարձաբար կառավարելու` ահաբեկիչներուն կողմէ կառավարուելու փոխարէն»:
«Փութին Տէր Զօրի քարիւղի դաշտերու կառավարման վերաբերեալ առաջարկը կը սերտէ, եւ կրնանք նոյնպիսի առաջարկ մը ներկայացնել Թրամփին», ըսաւ Էրտողան:
Ան յայտնեց, որ քարիւղի գիներուն նուազումը Թուրքիոյ համար «շատ օգտակար է» եւ պիտի նպաստէ առեւտրական գործարքներու հաւասարակշռութեան:
Էրտողան Եւրոպական Միութեան կոչ ուղղեց իր պարտաւորութիւնները կատարելու` ընդգծելով, որ Թուրքիան Իտլիպի մէջ զինադադարի հաստատման համար սուղ գին վճարեց:
Սուրիոյ հարցով Միացեալ Նահանգներու յատուկ պատուիրակ Ճէյմս Ճեֆրի յայտարարեց. «Կը բացառենք Իտլիպի մէջ Թուրքիոյ օգնելու համար ցամաքային ուժեր ուղարկելը»:
«Կը սերտենք, թէ Իտլիպի մէջ Թուրքիոյ օգնելու ծիրին մէջ օդէն ի՛նչ կարելի է ընել», աւելցուց ան:
Ամերիկացի պատուիրակը նաեւ նշեց. «Կը սերտենք, թէ ՕԹԱՆ-ը ի՛նչ կրնայ ընել Իտլիպի մէջ Թուրքիոյ օգնելու, եւ բոլոր ընտրանքները սեղանի վրայ են»:
www.aztagdaily.com/archives/468032
