Ալիեւ կը Սպառնայ` «Երեւանն ու Զանգեզուրը Մեր Պատմական Հողերն Են»

09 ՓԵՏՐՈՒԱՐ 2018 – ՏԱՐԱԾԱՇՐՋԱՆ – ՀԱՅԱՍՏԱՆ – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:

Ատրպէյճանի նախագահ իլհամ Ալիեւ հերթական անգամ սպառնալից ելոյթ ունեցած է, այս անգամ «Ենի Ատրպէյճան» կուսակցութեան համագումարի ընթացքին, երբ յայտարարած է, թէ «Երեւանն ու Զանգեզուրը ատրպէյճանցիներու պատմական հողերն են»: Դիմելով ատրպէյճանցի երիտասարդներուն` ան ըսած է, թէ «կարելի չէ մոռնալ պատմական հողերու մասին», կը հաղորդէ «Փանարմինիըն»-ը:

«Ատիկա պէտք է դառնայ մեր ապագայ գործունէութեան ուղղութիւնը, ինչպէս եւ այժմ, մենք կ՛աշխատինք այդ ուղղութեամբ: Մեր պատմական հողերն են Երեւանի խանութիւնը ու Զանգեզուր-Կէօյչան»,-ըսած է ան, յայտնում է Haqqin.az-ը:

Ատրպէյճանի նախագահը աւելցուցած է, որ ապագային հարկաւոր է աւելի աշխոյժ ըլլալ այդ հարցով եւ այդ թեմայով ցուցահանդէսներ ու շնորհանդէսներ իրականացնել աշխարհի տարբեր վայրերու մէջ: «Որովհետեւ Երեւանն ու Զանգեզուրը մեր պատմական հողերն են, եւ ատրպէյճանցիները պէտք է վերադառնան այդ հողեր: Ատիկա է մեր քաղաքական եւ ռազմավարական նպատակը եւ մենք պէտք է փուլ առ փուլ մօտենանք այդ նպատակին»,-ըսած է Ալիեւ:

Աւելի առաջ ՀՀ արտաքին գործոց նախարար Էդուարդ Նալպանտեան, մեկնաբանելով ատրպէյճանի նախագահին յայտարարութիւնը Երեւանը 1918-ին հայերուն նուիրելու մասին, ըսած էր. «Աւելորդ չէր ըլլար հնարաւորութիւն տալ Ատրպէյճանի նախագահ Իլհամ Ալիեւին մասնակցելու Երեւանի 2800-ամեակի տօնական ձեռնարկներուն»: «Առաջին անգամը չէ, որ Պաքուէն այդպիսի յայտարարութիւններ կ՛ընեն: Ատիկա մօտաւորապէս այն շարքէն է, որ կ՛ըսեն Արցախն ալ պատմական Ատրպէյճանի տարածք է», – նշած էր Նալպանտեան:

Ատրպէյճանցի պատմաբանները, պետական այրերն ու քարոզիչները պարբերաբար կը յայտարարեն Անդրկովկասեան սէյմի փլուզման ու Վրաստանի, Հայաստանի եւ Ատրպէյճանի անկախացման փուլին Երեւանը հայերուն որպէս մայրաքաղաք «նուիրելու» կամ նոյնիկ 100 տարիով զայն «ժամանակաւորապէս յանձնելու» մասին:

www.yerakouyn.com/?p=148236

92 Total Views 1 Views Today

Be the first to comment

Leave a Reply

Your email address will not be published.


*