Նախագահ Բայդենը Մերժում Է Թուրքիայի Արգելանքը Եւ Ճանաչում Հայոց Ցեղասպանութիւնը
25 ԱՊՐԻԼ 2021 – ՀԱՅՈՑ ՑԵՂԱՍՊԱՆՈՒԹԻՒՆ – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:
Ամերիկայի Հայ Դատի յանձնախումբը ջանքեր է գործադրում ԱՄՆ քաղաքական ուղին փոփոխելու համար` ուղղելով այն թուրք-ադրբեջանական բռնարարքների դէմ, խթանելով Հայաստանի անվտանգութեան ապահովումը եւ նպաստելով տարածաշրջանում խաղաղութեան հաստատմանը` հիմնուած Հայոց Ցեղասպանութեան արդարացի լուծման վրայ:
ՎԱՇԻՆԳՏՈՆ.- Նախագահ Ջոզեֆ Բայդենն այսօր պաշտօնապէս ճանաչեց Հայոց Ցեղասպանութիւնը` մերժելով Ամերիկայի պատմութեան մէջ օտարերկրեայ ամենաերկար արգելանքը եւ լուրջ հարուած հասցնելով այս ոճրագործութեան արդարադատութեանն ուղղուած Թուրքիայի դարաւոր խոչընդոտմանը:
Ամերիկայի Հայ Դատի յանձնախումբը ողջունում է այս քայլը:
Միանալով ԱՄՆ Սենատին եւ Ներկայացուցիչների պալատին, ԱՄՆ 49 նահանգներին եւ ՆԱՏՕի գծով տասնեակ դաշնակիցների` նախագահ Բայդենը վերջ դրեց Թուրքիայի ժխտողական քաղաքականութեանն Ամերիկայի մեղսակցութեան դարաշրջանին:
«Հայոց Ցեղասպանութեան վերաբերեալ այսօր նախագահ Բայդենի ցուցաբերած սկզբունքային դիրքորոշումը, որը շրջանցում է Անկարայի արտաքին վետօն՝ այս ոճրագործութեան ամերիկեան ազնիւ յիշատակման դէմ, մղում է Ամերիկայի դէպի վաստակած արդարութեան եւ հայ ազգի ապագայի համար անհրաժեշտ անվտանգութեան կողմը. Հայաստանը պետութիւն է, որը չունի ելք դէպի ծով, շրջափակուած է եւ ցեղասպանութիւն վերապրած», նշել է Ամերիկայի Հայ Դատի յանձնախմբի նախագահ Րաֆֆի Համբարեանը: «Ամերիկայի Հայ Դատի յանձնախումբն ակնկալում է համագործակցել Բայդենի վաչակազմի հետ` օգտագործելու այս յայտարարութիւնը տարածաշրջանի նկատմամբ ԱՄՆ քաղաքականութեան հիմնարար վերափոխման նպատակով` առաջնահերթ դարձնելով Արցախի գոյատեւումը, Հայաստանի անվտանգութիւնը, եւ տարածաշրջանում արդար ու տեւական խաղաղութեան հաստատումը` հիմնուած Հայոց Ցեղասպանութեան արդարացի լուծման վրայ», յաւելել է Համբարեանը:
Հայոց Ցեղասպանութեան ճանաչումը յատկապէս կարեւոր է այսօր` Հայաստանի եւ Արցախի դէմ անցեալ տարի աշնանը Թուրքիայի եւ Ադրբեջանի սանձազերծած ինքնաբուխ, ցեղասպան յարձակումներից յետոյ, որոնք յանգեցրին տարածաշրջանում մարդասիրական աղէտի, այդ թւում` շուրջ 100,000 հայերի տեղահանութիւնը, Ադրբեջանում շուրջ 200 հայ ռազմագերիների շարունակուող բանտարկութիւնը, եւ Հայաստանի դէմ ադրբեջանական բռնարարքները վերսկսելու Ադրբեջանի նախագահ Իլհամ Ալիեւի վերջին սպառնալիքները:
Նախագահ Բայդենի կողմից Ցեղասպանութեան ճանաչումը դրդում է Ամերիկային դէպի հետեւողական քաղաքականութիւն, որն էապէս աջակցում է Արցախի գոյատեւմանը եւ Հայաստանի անվտանգութեանը, միեւնոյն ժամանակ, վճռականօրէն մարտահրաւէր է նետում Թուրքիայի եւ Ադրբեջանի հակահայ բռնարարքներին: Այս ոճրագործութեան համաշխարհային դատապարտման հետ մէկտեղ` ԱՄՆ ճանաչումը նաեւ մեկուսացնում է Թուրքիային եւ խարխլում նրա ժխտողական քաղաքականութիւնը` աւելացնելով ճնշումն Անկարայի վրայ` դադարեցնելու իր ստի արշաւը եւ արդարադատութեան խոչընդոտումը, նաեւ դուռ է բացում` ժամանակակից Թուրքիայի կողմից օրինական, բարոյական, քաղաքական եւ տարածքային պարտականութիւնների կատարման ու այս դեռ անպատիժ մնացած յանցագործութեան ճշմարտացի, արդար եւ համապարփակ լուծման համար:
Հայոց Ցեղասպանութեան ճանաչումը յարգում է զոհերի եւ փրկուածների յիշատակն ու արժանապատուութիւնը: Աւելի լայն իմաստով` մերժում է որպէս առեւտրի գործիք մարդու իրաւունքների օգտագործումը: Ցեղասպանութեան եւ ոճրագործութեան կանխարգելումը հասցնելով բարոյական ու քաղաքական հրամայականի մակարդակի` այս ճանաչումը յարգում է անցեալի ու ներկայի բոլոր ցեղասպանութիւնների զոհերի յիշատակը, նուազեցնում նոր վայրագութիւնների հաւանականութիւնն ապագայում:
ՆԱԽԱՊԱՏՄՈՒԹԻՒՆ
Միացեալ Նահանգներն առաջին անգամ ճանաչել է Հայոց Ցեղասպանութիւնը 1951 թուականին` ամերիկեան կառավարութեան կողմից «Ցեղասպանութեան յանցագործութիւնը կանխարգելելու եւ պատժելու մասին» համաձայնագրի վերաբերեալ Արդարադատութեան միջազգային դատարան ուղարկուած գրաւոր յայտարարութեան միջոցով:
Նախագահ Ռոնալդ Ռեյգանը Հայոց Ցեղասպանութեան մասին յիշատակել է 1981 թուականի հռչակագրում: ԱՄՆ Ներկայացուցիչների պալատը Հայոց Ցեղասպանութեան վերաբերեալ իրաւական որոշումներ է ընդունել 1975, 1984 եւ 1996 թուականներին: 2019 թուականին ԱՄՆ Ներկայացուցիչների պալատն ու Սենատը ճնշող մեծամասնութեամբ ընդունել են Հայոց Ցեղասպանութիւնը ճանաչող եւ դատապարտող բանաձեւէր: 1965 թուականից սկսած` ամերիկեան 49 նահանգներ` բացի Միսիսիպիից, բանաձեւի կամ հռչակագրի միջոցով ճանաչել են Հայոց Ցեղասպանութիւնը:
1915-1930 թուականներին Միացեալ Նահանգները մարդասիրական աննախադէպ օգնութիւն է ցուցաբերել` Հայոց Ցեղասպանութիւնից մազապուրծ եղածներին փրկելու համար: Կոնգրեսի լիազօրութիւնը ստացած Մերձաւոր Արեւելքում ամերիկեան օգնութեան կոմիտէն աջակցելու մղել է բոլոր ամերիկացիներին եւ, փաստացի, ամբողջ աշխարհը` լաւ կազմակերպուած եւ ֆինանսաւորուած օգնութեան ծրագրի շուրջ, ինչը փրկեց հայ եւ քրիստոնեայ այլ փոքրամասնութիւնների մօտ 1 միլիոն փախստականների եւ 132 հազար որբերի կեանքը: Կոմիտէն հաւաքեց 117 միլիոն դոլար (այսօր դա հաւասար է 2.7 մլրդ. դոլարի) եւ կառուցեց շուրջ 400 մանկատներ, սննդի եւ հագուստի բաշխման կենտրոններ, բժշկական հաստատութիւններ, հիւանդանոցներ, նաեւ մասնագիտական ուսուցման դպրոցներ ամբողջ Մերձաւոր Արեւելքում` փրկուածներին ապաստանելու եւ նրանց խնամելու համար:
asbarez.com/arm/388402/նախագահ-բայդենը-մերժում-է-թուրքիայի-ա/
