Հայրենապատում – Արցախի Հանրապետության Մարտունու շրջանի Թաղավարդ գյուղից հարավ, Բերդահոնջ լեռան լանջին է գտնվում Բերդահոնջի վանքը։
19 ՓԵՏՐՈՒԱՐ 2022 – ԱՐՑԱԽ – ՊԱՏՄԱԿԱՆ ԷՋԷՐ:
Հայրենապատում / Hayrenapatum – Կարդալ նաեւ՝ ՆԱԽՈՐԴ ՅՕԴՈՒԱԾԸ:
Վանքի տարածքում պահպանվել են եկեղեցին, հյուրատունը, այլ շինությունների մնացորդները և գերեզմանոցը։
Բերդահոնջի եկեղեցին կառուցվել է 17-րդ դարում։ Միանավ թաղակապ շինություն է, կառուցված կիսամշակ և անմշակ քարերով։ Մուտքն արևմուտքից է։ Արևելքից, խորանին զուգահեռ ունի երկու ավանդատուն աղոթարաններ։
Լուսավորությունը կատարվել է արևելքից բացված երեք և արևմուտքից մեկ փոքր լուսամուտներով։ Եկեղեցու պատերին ագուցված են 16-17-րդ դարի փոքր չափերի տասնյակ խաչքարեր։
Եկեղեցուց ոչ հեռու գտնվում է հյուրատան ավերակները։ Եկեղեցու շուրջը տարածվում է գերեզմանոցը։ Գերեզմանոցում հիմնականում անմշակ սալատապաններ են, բացառությամբ 1645 թվականի մեկ ուղղանկյունաձև տապանաքարի, որն ունի նրբագեղ պատկերաքանդակ և արձանագրություն։
2020 թ. Արցախյան երրորդ պատերազմի հետևանքով Վերին Թաղավարդը և Բերդահոնջի վանքն օկուպացվել է Ադրբեջանի Հանրապետության զինված ուժերի կողմից։
Շրջանի հայկական հոգևոր և պատմամշակութային հուշարձաններն այսօր կանգնած են վանդալիզմի և ամբողջական ոչնչացման վտանգի առաջ։
