Հայրենապատում – Մելիքաշենը հայկական հին և մեծ պատմություն ունեցող գյուղերից է

Հայրենապատում – Մելիքաշենը հայկական հին և մեծ պատմություն ունեցող գյուղերից է

04 ՄԱՐՏ 2022 – ԱՐՑԱԽ – ՊԱՏՄԱԿԱՆ ԷՋԷՐ:

Հայրենապատում / Hayrenapatum – Կարդալ նաեւ՝ ՆԱԽՈՐԴ ՅՕԴՈՒԱԾԸ:

Մելիքաշենը հայկական հին և մեծ պատմություն ունեցող գյուղերից է:

Գյուղում և գյուղի շրջակայքում պահպանվել էին մի շարք հայկական հուշարձաններ, որոնց թվում է 18-րդ դարով թվագրվող սուրբ Ստեփանոս (ըստ այլ աղբյուրների` սուրբ Աստվածածին) եկեղեցին, հին գերեզանատուն և գյուղատեղի:

Հայտնի է, որ Մելիքաշենի բնակիչները 1828-1829 թթ.-ին գաղթել են այս շրջան Պարսկահայաստանից:

Միջնադարյան շրջանում գյուղը եղել է խոշոր իջևանատուն Ստեփանակերտ-Հադրութ ճանապարհին:

1895 թ. գյուղն ուներ 32 տուն (187 հայ բնակիչ), իսկ 1907 թ․ գյուղում ապրում էին 290 հայեր:

Խորհրդային շրջանում՝ Արցախը Խորհրդային Ադրբեջանին բռնակցելուց հետո, Մելիքաշենը գտնվում էր ԼՂԻՄ-ի Հադրութի շրջանի կազմում։

1974 թ. գյուղում ապրում էր 144 հայ բնակիչ: Մելիքաշենն ուներ 8-ամյա դպրոց, ակումբ-գրադարան, բուժկետ և կինո:

Արցախյան շարժման սկզբում Մելիքաշենը պարբերաբար ռմբակոծվել է հարևան Վարանդայի շրջանում տեղակայված ռազմական հենակետերից:

1992 թ. օգոստոսի 15-ին ադրբեջանական զինված ուժերը զրահամեքենաներով և հետևակով ներխուժել են Մելիքաշեն, հրդեհել տներ, ավերել գերեզմանոցը; Նույն օրը կեսօրից հետո հայ ազատամարտիկները դուրս են մղել գյուղից ադրբեջանական բանակը՝ պատճառելով նրանց նաև նյութական կորուստներ:

Գյուղի ազատամարտիկները տարբեր զորամիավորումների կազմում մասնակցել են Հադրութի և այլ շրջանների ազատագրական մարտերին:

2020 թ. Արցախյան երրորդ պատերազմի հետևանքով Մելիքաշենը օկուպացվել է Ադրբեջանի Հանրապետության զինված ուժերի կողմից։

Հայրենապատում / Hayrenapatum