13 հոկտեմբեր 2015
Ռուսիոյ արտաքին գործոց նախարար Սերկէյ Լաւրով յայտնեց, որ Սուրիոյ միութիւնը պէտք է պահպանուի, իսկ համաձայնութիւնը սուրիացիներուն միջեւ գոյանայ: Ան նշեց, որ ռուսական կողմը ՏԱՀԵՇ-ի դէմ պայքարի միջազգային դաշինքէն խնդրած է Սուրիոյ մէջ ՏԱՀԵՇ-ի եւ սուրիական զինեալ ընդդիմութեան դիրքերուն ու կեդրոններուն մասին տեղեկութիւններ, սակայն պատասխան չէ ստացած` աւելցնելով.«Մենք նկատի ունինք, որ Սուրիոյ բանակը գետնին վրայ ահաբեկչութեան դէմ պայքարին մէջ յաջողութիւններ պիտի արձանագրէ»: «Միջազգային դաշինքին եւ Սուրիոյ մէջ գործող մեր ուժերուն միջեւ գործակցութեամբ հետաքրքրուած ենք», ըսաւ Լաւրով` աւելցնելով. «Մենք պատրաստ ենք ՏԱՀԵՇ-ի դէմ պատերազմին մէջ ընդդիմութեան հետ գործակցելու»:
Եւրոպական Միութեան արտաքին քաղաքականութեան ու անվտանգութեան բարձրագոյն յանձնակատար Ֆետերիքա Մոկերինի Լիւքսամպուրկի մէջ Եւրոպական Միութեան անդամ երկիրներու արտաքին գործոց նախարարներուն ժողովէն առաջ յայտարարեց, որ Սուրիոյ մէջ ռուսական զինուորական միջամտութիւնը «անշուշտ կը փոխէ խաղին կանոնները»` նշելով, որ ատիկա «մտահոգութիւն պատճառող կողմեր ունի»:
Նախարարները իրենց ժողովի աւարտին հաղորդագրութիւն մը հրապարակելով նշեցին.«Սուրիական չափաւորական ընդդիմութեան դէմ ռուսական զինուորական յարձակումները խոր մտահոգութիւն կը պատճառեն»:
«Սուրիոյ մէջ ռուսական զինուորական մագլցողական քայլերը կը սպառնան երկարաձգել տագնապը եւ կապտել քաղաքական հոլովոյթը», նշեցին նախարարները` աւելցնելով.«Նախագահ Պաշշար Ասատի իշխանութեան տակ Սուրիոյ մէջ մնայուն խաղաղութիւն կարելի չէ»:
Միացեալ Նահանգներու նախագահ Պարաք Օպամա ամերիկեան «Սի.Պի.Էս» պատկերասփիւռի կայանի «60 վայրկեան» յայտագիրէն սփռուած հարցազրոյցի մը ընթացքին նշեց, որ իր երկիրը յոյսով է, որ «Ռուսիան եւ Իրանը ճնշում կը գործադրեն Ասատի վարչակարգին վրայ»: «Մենք պատրաստ ենք աշխատելու դիւանագիտական ճամբով, եւ ուր որ կրնանք` աջակցելու չափաւորական ընդդիմութեան, որ կրնայ համոզել ռուսերուն եւ իրանցիներուն ճնշում գործադրել Ասատի վրայ` իշխանութիւնը փոխանցելու համար: Սակայն…մենք պատրաստ չենք խառնուելու Սուրիոյ մէջ զինուորական արշաւին», յայտարարեց Օպամա:
Ան քննադատեց Սուրիոյ մէջ Ռուսիոյ ռազմավարութիւնը` զայն սխալ անուանելով: «Այնքան ատեն որ Ասատը իշխանութեան վրայ է, դժուար պիտի ըլլայ չափաւորական ընդդիմութեան ուժերը ուղղել ՏԱՀԵՇ-ի դէմ պայքարին», ըսաւ Օպամա` աւելցնելով, որ իրենք տեղեակ էին, որ Ռուսիան կը պատրաստուի Սուրիոյ զինուորական օժանդակութիւն տրամադրելու, «որովհետեւ կը վախնայ, որ Ասատի վարչակարգը պիտի տապալի»:
Իրանի Յեղափոխական պահակագունդի ընդհանուր հրամանատար Մոհամետ Ալի Ժաաֆարի յայտնեց, որ Սուրիան յառաջիկայ օրերուն ականատես պիտի դառնայ մեծ յաղթանակներու:
Սուրիոյ բանակը յայտարարեց, որ իր վերահսկողութեան տակ առած է Հալէպի հիւսիս-արեւելքը գտնուող Ազատ շրջանը, երբ ՏԱՀԵՇ-ի զինեալները իրենց ստացած հարուածներէն ետք հեռացած են շրջանէն: Սուրիոյ բանակը նաեւ յառաջացած է Լաթաքիոյ գիւղական շրջաններուն մէջ, ուրկէ զինեալները փախուստ տուած են դէպի Թուրքիոյ սահման:
Լիբանանեան «Նաշրա» կայքը հաղորդեց, որ զինեալ խմբաւորումներ անակնկալ յարձակում մը գործելով գրաւած են Լաթաքիոյ գիւղական շրջանին մէջ Տուրին գիւղը, որ կը գտնուի Սալմա քաղաքին մօտ:
Թուրքիոյ վարչապետ Ահմեթ Տաւութօղլու յայտնեց, որ իրենք Ռուսիոյ եւ Իրանի հետ պիտի խօսին Սուրիոյ մէջ քաղաքական լուծումի մը հարցով:
http://www.aztagdaily.com/
