Սփիւռքի Նախարարութիւնը Իբրեւ Առանձին Գերատեսչութիւն Պէտք Է Շարունակեր Գործել

«ԱՌԱՋԻՆ ԼՐԱՏՈՒԱԿԱՆ»Ի ՀԱՐՑԱԶՐՈՅՑԸ «ԱԶԴԱԿ» ՕՐԱԹԵՐԹԻ ԳԼԽԱՒՈՐ ԽՄԲԱԳԻՐ ՇԱՀԱՆ ԳԱՆՏԱՀԱՐԵԱՆԻՆ ՀԵՏ

28 ԴԵԿՏԵՄԲԵՐ 2018 – ԷՐԿԻՐ – ՍՓԻՒՌՔ – ՀԱՅԱՍՏԱՆ:

ՍԻՐԱՆՈՅՇ ՊԱՊԵԱՆ.- Պարոն Գանտահարեան, առաջիկայում 17 նախարարութիւնից կը մնայ 12ը, կը լուծարուի նաեւ Սփիւռքի նախարարութիւնը: Տեսակէտ կայ, որ այն պէտք է լուծարուէր, քանի որ կար այդ նախարարութիւնը, բայց այն չաշխատեց: Ինչպէ՞ս էք գնահատում կառավարութիւնների կրճատման քայլը:

ՇԱՀԱՆ ԳԱՆՏԱՀԱՐԵԱՆ.- Կրճատումները որեւէ կառավարութեան պարագայում օրինաչափ են: Ըստ կառավարութեան աշխատանքային ծրագրի, այնտեղ նշուած դրոյթների, առաջնահերթութիւնների՝ համապատասխան որոշումներ են կայացւում օպտիմալացման մօտեցումները նկատի ունենալով: Այս դէպքում, կարծում եմ, Սփիւռքի նախարարութիւնը իբրեւ առանձին գերատեսչութիւն պէտք է շարունակեր գործել: Անցած ուղին մեզ յուշում է, որ հայրենիք-Սփիւռք կապերի գործընթացը որոշակի կառուցակարգման է ենթարկուել՝ յատկապէս մասնագիտական ոլորտներում համահայկական մարդուժի ներգրաւման ուղղութեամբ: Կուտակուած փորձի վրայ, կարծում եմ, անհրաժեշտ կը լինի նոր գործառոյթներ ապահովել: Մեր ազգի համրանքի ճնշող մեծամասնութիւնը Սփիւռքում է ապրում, եւ կարծում եմ՝ հայրենակենտրոն ցանցային կառոյցներ ստեղծելը, համապատասխան կառոյցներ առաջացնելը անկախ գերատեսչութիւն է պահանջում:

ՍԻՐԱՆՈՅՇ ՊԱՊԵԱՆ.- Առհասարակ, Սփիւռքն ինչպէ՞ս է արձագանգում նախարարութեան լուծարման գաղափարին: Դուք երկար տարիներ համագործակցել էք Սփիւռքի նախարարութեան հետ: Արդեօք լուծարումն ապացոյց չէ՞ այն բանի, որ նախարարութիւնը իր առաքելութիւնը չճշգրտեց ու չկատարեց:

ՇԱՀԱՆ ԳԱՆՏԱՀԱՐԵԱՆ.- Սփիւռքեան արձագանգներ դեռեւս կը լինեն. ես կարծում եմ, որ արդիւնաւէտ համագործակցութիւն է եղել տարբեր ոլորտներում, այդ թւում նաեւ՝ տեղեկատուական բնագաւառում՝ ճանաչողականութեան, պետական տանիքի տակ համախմբման, համատեղ քննարկումների եւ համահայկական լրատուադաշտի խնդիրների լուծման ուղղութեամբ ուղիների որոնման առումով:

ՍԻՐԱՆՈՅՇ ՊԱՊԵԱՆ.- Հնարաւո՞ր է, որ Սփիւռքի հետ կապերը փոխվարչապետի գրասենեակի կողմից համակարգուեն: Արդեօք փոխգործակցութեան առումով արդիւնաւէտ կարո՞ղ է լինել այս տարբերակը:

ՇԱՀԱՆ ԳԱՆՏԱՀԱՐԵԱՆ.- Ինչ էլ որ լինի ձեւաչափը, համոզուած եմ, որ համագործակցութիւնը ակտիւօրէն պէտք է շարունակել: Համապատասխան պաշտօնեաներն ակնարկել են հայրենադարձութեան օրակարգի եւ հեռանկարային առումով Սփիւռքի խորհրդատուական դերը դէպի իրաւական դաշտ անցումի նախապատրաստութեան օրակարգի արծարծումով: Կարծում եմ, որ այս երկու գերակայ ուղղութիւնները անպայման կը ներառուեն նոր կառավարութեան ծրագրում: Ի վերջոյ՝ ազգի համրանքի մեծամասնութիւնը կազմող Սփիւռքը իրաւական հիմք պիտի ունենայ մասնակցելու համահայկական տարողունակութիւն ունեցող խնդիրների քննարկման եւ որոշման գործընթացներին՝ դա կը լինի երկպալատ խորհրդարանի տեսքով, թէ այլ կերպ: Իսկ նման օրակարգերի նախապատրաստութեան, նման մեծ ծրագրերի նախագծման համար անպայման պէտք է մասնակից լինի Սփիւռքը:

ՍԻՐԱՆՈՅՇ ՊԱՊԵԱՆ.- Պարոն Գանտահարեան, մենք յիշում ենք, որ Սփիւռքի նախարարութիւնը Հայաստան-Սփիւռք համաժողովներ էր անցկացնում, բայց դրանք այդպէս էլ չէին արդիւնաւորւում: Անգամ հռչակած նպատակները եւ յայտարարութիւնները կեանքի չէին կոչւում: Այստեղ խնդիր չէ՞ք տեսնում:

ՇԱՀԱՆ ԳԱՆՏԱՀԱՐԵԱՆ.- Մինչեւ Սփիւռքի նախարարութեան ձեւաւորումը՝ նման համաժողովներ կազմակերպում էր Արտաքին գործոց նախարարութիւնը: Այս տիպի համաժողովներ, forum-ներ անցկացնում են տարբեր երկրներ եւս: Նման մասշտաբի եւ բազմամարդ համաժողովները առիթ են ելոյթներ լսելու, հարցեր տալու, մտքեր փոխանակելու, միմեանց ճանաչելու եւ կապեր հաստատելու: Կարծում եմ՝ այդ առումով օրինաչափ էին համաժողովները: Առանձնացնեմ Հայոց Ցեղասպանութեան 100ամեակի առիթով եւ առանցքայնօրէն ներկայացուցչական համաժողովը, որին յաջողուեց ստեղծել բրգաձեւ կառոյց՝ նկատի ունեմ պետական յանձնաժողովը, տարածաշրջանային եւ տեղական յանձնաժողովները եւ իրականացուած համակարգումը աշխարհում 100ամեակի միջոցառումներին միջազգային հնչեղութիւն ապահովելու տեսակէտից:

asbarez.com/arm/333655/