12 ԱՊՐԻԼ 2019 – ԱՆԴՐԱԴԱՐՁ:
«Այսօր լրանում է Ազրպէյճանի զինուած ուժերի կողմից Արցախի Մարաղայ գիւղի բնակչութեան դէմ իրականացուած յանցագործութեան 27-րդ տարելիցը: Գիւղի նկատմամբ մի քանի ժամ վերահսկողութիւն հաստատած ազրպէյճանական բանակն այն վերածեց սպանդանոցի` ամենադաժան ձեւով կտտանքների ենթարկելով եւ սպաննելով աւելի քան 50 խաղաղ բնակչի, նոյնքան էլ գերեվարելով, հիմնականում` կանայք, ծերեր, երեխաներ եւ հաշմանդամներ: Երկու շաբաթ յետոյ ազրպէյճանական բանակը կրկին վերահսկողութիւն հաստատեց գիւղի նկատմամբ` այս անգամ հիմնովին աւերելով այն: Մինչ օրս Մարաղան գտնւում է ազրպէյճանական զինուած ուժերի բռնագրաւումի ներքոյ, իսկ գերեվարուածներից շատերը համարւում են անհետ կորած:
Մարաղայի բնակչութեան զանգուածային սպանութեան փաստերը հաստատուել են մարդու իրաւունքներով զբաղուող միջազգային տարբեր կազմակերպութիւնների կողմից, այդ թւում «Հիումըն Ռայթց Ուոչ»-ի and «Էմնսթի ինթըրնաշընըլ»-ի: Աւելին` հակամարտութեան ընթացքում գերեվարուածների հետ աշխատանքներ իրականացրած «Ֆիզիքիընս ֆոր Հիումըն Ռայթց» կազմակերպութեան կողմից հրապարակուած ուսումնասիրութիւնում յստակ արձանագրուել է, որ 1990-1996թթ. ընթացքում ազրպէյճանական իշխանութիւնները եւ քաղաքացիական անձինք մասնակցութիւն են ունեցել ազգութեամբ հայ երեխաների եւ ծերերի գերեվարման եւ կտտանքների ենթարկելու ինստիտուցիոնալացուած գործընթացում:
Ի լրումն Սումկայիթի, Կիրովապատի եւ Պաքուի հակահայկական ջարդերի` Մարաղայի բնակչութեան դէմ կատարուած յանցագործութիւնն իրականացուել է արդէն իսկ անկախ Ազրպէյճանի զինուած ուժերի կողմից, Արցախի տարածքում, իսկ այդ կոտորածն իրականացրած ջոկատի հրամանատարը` Թակիեւ Շահին Թալիպօղլուն պաշտօնապէս դարձել է Ազրպէյճանի առաջին ազգային հերոսը:
Արցախի խաղաղ բնակչութեան դէմ իրականացուած համակարգուած զանգուածային ոճրագործութիւնները` դրանց անպատժելիութիւնը եւ հերոսացումը Ազրպէյճանի հետեւողական քաղաքականութեան մաս կազմեցին եւ նոր դրսեւորումներ ստացան Մարաղայի դէպքերից 24 տարի անց` Արցախի դէմ Ազրպէյճանի ապրիլեան ագրեսիայի ժամանակ:
Այսօր մենք յարգանքի տուրք ենք մատուցում Մարաղայի կոտորածի զոհերի յիշատակին` միաժամանակ վերահաստատելով մեր հաստատակամութիւնը կանխարգելելու նմանօրինակ կոտորածների կրկնութիւնը եւ երաշխաւորելու Արցախի ժողովրդի անվտանգութիւնը եւ ապահովութիւնն իր հայրենիքում»:
aztagdaily.com/archives/434386
