Թէ՛ Եւրոպան, Թէ՛ Միացեալ Նահանգները Օրակարգի Վրայ Հայկական Բանաձեւ Կը Բերեն Թուրքիան Հարուածելու Համար

Թէ՛ Եւրոպան, Թէ՛ Միացեալ Նահանգները Օրակարգի Վրայ Հայկական Բանաձեւ Կը Բերեն Թուրքիան Հարուածելու Համար. Թուրքիոյ Ներքին Գործոց Նախարար

30 ՄԱՅԻՍ 2019 – ԱՆԴՐԱԴԱՐՁ:

Թուրքիոյ ներքին գործոց նախարար Սուլէյման Սոյլու, Պոլսոյ մէջ սեւծովեան շրջանի կազմակերպութիւններու հաւաքի ընթացքին անդրադարձած է Թուրքիոյ ներքին ու արտաքին մարտահրաւէրներուն` նշելով, որ 1990-ական թուականներէն մինչեւ 2000-ական թուականներ երկրին մէջ 12-15 հազար ահաբեկիչ ոչնչացուած է: Այս մասին կը հաղորդէ թրքական «Հապերլեր» կայքը:

«Միջազգային ասպարէզի վրայ Թուրքիոյ հեղինակութիւնը աճած է: Այս ազգին հարուած հասցնելու համար, թէ՛ Եւրոպան, թէ՛ Միացեալ Նահանգները իրենց ուզած պահուն միշտ օրակարգ կը բերեն հայկական բանաձեւ: Մեզ իբրեւ կոտորող ազգ ներկայացնելու համար: Միջազգային ասպարէզի վրայ մեզ մեկուսացնելու համար: Թուրքիան սուրիական հարցին եւ սուրիացիները ընդունելու հարցին մէջ քաղաքականութիւն որդեգրած է: Այս պահուս աշխարհի որեւէ երկրի ներքին գործոց նախարար այստեղ կու գայ, կը զբօսնէ ճամբարներուն մէջ, անոնց կենսակերպին կը հետեւի: Երթալու ատեն ալ կ՛ըսեն` դուք մեծ ազգ էք: Իսկ ետքն ալ մեզ կը դատապարտեն հայկական բանաձեւով: Մեր առջեւ տասնեակ տարիներու ցուցափայտով մեզ դաստիարակել փորձող աշխարհ կայ», ըսած է Սոյլու:

yerakouyn.com/2019/05/30/թէ՛-եւրոպան-թէ՛-միացեալ-նահանգները-օր/