Նիկոլ Փաշինեան Ընդունած է Աւստրալիոյ Նիւ Սաութ Ուէյլզ Նահանգի Վարչապետ Կլատիս Պերեճիքլեանը
19 ՅՈՒԼԻՍ 2019 – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:
ՀՀ վարչապետ Նիկոլ Փաշինեան երէկ հիւրընկալած է Աւստրալիոյ Նիւ Սաութ Ուէյլզ նահանգի վարչապետ Կլատիս Պերեճիքլեանը, որ Հայաստան կը գտնուի մասնաւոր այցով:
«Ուրախ եւ հպարտ ենք Աւստրալիոյ մէջ Ձեր գործունէութեամբ: Այսօր Դուք աշխարհի մէջ ամենաազդեցիկ հայ կիներէն մէկն էք եւ հաճելի է հանդիպելու հնարաւորութեան համար»,- նշած է Նիկոլ Փաշինեան: ՀՀ վարչապետի աշխատակազմի տեղեկատւութեան եւ հասարակայնութեան հետ կապերու վարչութեան փոխանցած տեղեկութիւններով՝ ՀՀ կառավարութեան ղեկավարը յոյս յայտնած է, որ Կլատիս Պերեճիքլեանի գործունէութեան իբրեւ արդիւնք ալ աւելի պիտի զարգանան Հայաստանի եւ Աւստրալիոյ յարաբերութիւնները ու պիտի ընդլայնուին փոխադարձ հետաքրքրութիւնները:
Կլատիս Պերեճիքլեան վարչապետը շնորհաւորած է Հայաստանի մէջ տեղի ունեցող դրական զարգացումներուն առիթով եւ նշած, որ հայրենիքի իրադարձութիւններուն ուշադրութեամբ կը հետեւին նաեւ Աւստրալիոյ հայ համայնքի ներկայացուցիչները: Ան ընդգծած է, որ ի տարբերութիւն նախորդ տարիներուն՝ այս անգամ հանրութեան մէջ կը նկատէ մեծ ոգեւորութիւն եւ ապագայի նկատմամբ հաւատք:
Կլատիս Պերեճիքլեան ներկայացուցած է իր գործունէութիւնը Նիւ Սաութ Ուէյլզ նահանգին մէջ եւ պատմած է Աւստրալիոյ հայ համայնքին մասին:
Զրուցակիցները մտքեր փոխանակած են Հայաստանի եւ Աւստրալիոյ միջեւ համագործակցութեան զարգացման, Հայաստան-Սփիւռք կապերու ամրապնդման, ՀՀ կառավարութեան առաջնահերթութիւններուն մասին:
yerakouyn.com/2019/07/19/նիկոլ-փաշինեան-ընդունած-է-աւստրալիոյ/
