Ժիպրալթար Իրանեան Քարիւղատար Նաւուն Արտօնեց Ազատօրէն Նաւարկել. Իրան Այդ Քայլը Կը Նկատէ Իր Յաղթանակը
17 ՕԳՈՍՏՈՍ 2019 – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:
Ժիպրալթարի վարչապետ Ֆապիան Փիքարտօ որոշեց իրանեան քարիւղատար «Կրէյս 1» նաւուն արտօնել հեռանալ Ժիպրալթարէն: Ժիպրալթարէն դատաւոր մը ԱՖՓ լրատու գործակալութեան յայտնած է, որ իշխանութիւնները այդ քայլին դիմած են` «հակառակ արգելակման ամերիկեան փորձերուն»:
Իրանեան ծովուժէն պաշտօնատար մը իրանեան «Մեհր» լրատու գործակալութեան յայտնեց, որ նաւուն սեփականատէրը նշած է, թէ քարիւղատարը պիտի շարունակէ դէպի Միջերկրականի նաւահանգիստներ իր նաւարկումը:
Իրանի արտաքին գործոց նախարար Մոհամետ Ժաւատ Զարիֆ նշեց, որ Ժիպրալթար գտնուող իրանեան քարիւղատար նաւուն նաւարկման արտօնութիւն տալը «ամերիկեան ծովահէնութեան ձախողութիւնն է»: Լոնտոնի մէջ Իրանի դեսպանը իր կարգին յայտնեց, որ Միացեալ Նահանգներ «մեծ ջանք թափեցին իրանեան «Կրէյս 1» նաւու դէմ հաստատուած արգելանքի ջնջումը արգիլելու, սակայն պարտութեան մատնուեցան»:
Ժիպրալթարի իշխանութիւնները մէկ օր առաջ ազատ արձակած էին «Կրէյս 1»-ի նաւապետն ու անձնակազմի երեք անդամները:
Իրանի արտաքին գործոց նախարարութիւնը յայտնեց. «Իրանեան իշխանութիւնները ոչինչ խոստացան Ժիպրալթարի մէջ գրաւուած իրանեան քարիւղատար նաւուն նաւարկման արտօնման դիմաց»:
Իրանի կառավարութեան բանբեր Ալի Ռապիհի մէկ օր առաջ յայտարարած էր, թէ կառավարութիւնը կը սպասէ Ժիպրալթարի կառավարութեան դրական քայլին` «բարի կամեցողութեան փոխադարձ բարի կամեցողութեամբ պատասխանելու համար»:
Ալի Ռապիհի երէկ յայտնեց. «Քարիւղատար «Կրէյս 1» նաւուն առանց (իրանեան) երաշխիքներու նաւարկման արտօնումը Իրանի իսլամական հանրապետութեան համար յաղթանակ է»:
aztagdaily.com/archives/450075
