Լիբանան Իրաւունք Ունի Պաշտպանելու Իր Անկախութիւնն Ու Գերիշխանութիւնը» Շեշտեց Նախագահ Աուն

«Հարաւային Արուարձաններուն Մէջ Գործուած Իսրայէլեան Բռնարարքը Պատերազմի Համազօր Է, Իսկ Լիբանան Իրաւունք Ունի Պաշտպանելու Իր Անկախութիւնն Ու Գերիշխանութիւնը» Շեշտեց Նախագահ Աուն

27 ՕԳՈՍՏՈՍ 2019 – ԼԻԲԱՆԱՆԵԱՆ:

Իսրայէլեան օդուժը կիրակիէն երկուշաբթի առաւօտ լուսցող գիշերուան ընթացքին ռմբակոծեց Զահլէի արեւմուտքը գտնուող Լիբանանի արեւելեան լեռնաշղթան` թիրախ դարձնելով Քուսայայի մէջ գտնուող` Ահմետ Ժըպրիլի ղեկավարած Պաղեստինի ազատագրութեան ժողովրդային ճակատի ընդհանուր հրամանատարութեան դիրքերը:

Ըստ ականատեսներու, առաջին ռմբակոծումը արձանագրուեցաւ առաւօտեան ժամը 1:11-ին, երկրորդ ռմբակոծումը` ժամը 1:25-ին, իսկ երրորդ ռմբակոծումը` ժամը 1:35-ին:

Պաղեստինի ազատագրութեան ժողովրդային ճակատը հակաօդայիններով հակադարձեց իր դիրքերը ռմբակոծող իսրայէլեան օդուժին:

Ռմբակոծումի ենթարկուած պաղեստինեան դիրքի պատասխանատուներէն Ապու Մոհամետ յայտնեց, որ ռմբակոծումը մարդկային վնասներ չէ պատճառած, այլ` նիւթական:

Միւս կողմէ, «Էմ. Քա.» տիպի իսրայէլեան օդանաւեր երէկ առաւօտեան կանուխ ժամերէն սկսեալ թռիչքներ գործեցին Մազարեհ Շեպաայի եւ Արքուպի վերեւ:

Կէսօրին, իսրայէլեան զինուորական զրահապատները Սըմմաքայի բարձունքին վրայ գտնուող իրենց դիրքին մէջ արտասովոր շարժումներ կատարեցին:

Նշենք, որ ՖԻՆԻՒԼ-ի միջազգային խաղաղապահ ուժերը երէկ շրջուն ջոկատներով հսկեցին սահմանին` սկսելով Ռաս Նաքուրայի շրջանէն հասնելով բռնագրաւուած Պաղեստին, ինչպէս նաեւ Քֆարշուպայի բարձունքներ եւ Մազարեհ Շեպաա:

ՖԻՆԻՒԼ-ի ուժերը որեւէ արտասովոր երեւոյթ չարձանագրեցին սահմանային զարգացումներուն առումով:

Պէտք է աւելցնել, որ երէկ կէսօրին Շտապ օգնութեան գերագոյն խորհուրդի պետ հազարապետ-զօրավար Մոհամետ Խէյր այցելեց Հարաւային արուարձաններ, ուր Մուաուատ փողոցին մէջ ստուգեց իսրայէլեան բռնարարքին վայրը` ներկայութեամբ Հարաւային արուարձաններու քաղաքապետ Մոհամետ Տըրղամի եւ Հըզպալլայի տեղեկատուական հարցերու պատասխանատու Մոհամետ Աֆիֆի:

Խէյր յայտնեց, որ այս բռնարարքը իր կարգին քաղաքացիներուն դէմ գործուած ահաբեկչութիւն մըն է, որ դիմակաւոր է եւ ամէն անգամ կերպարանափոխուած կերպով կ՛այցելէ լիբանանցիներուն:

«Մենք միշտ եւ վարչապետ Սաատ Հարիրիի թելադրանքներով նեցուկ կը կանգնինք տուժած լիբանանցի քաղաքացիներուն», ըսաւ Խէյր:

Ան նշեց, որ լիբանանեան բանակը յստակացուցած է արձանագրուած վնասները` աւելցնելով, որ կառավարութիւնը պիտի փորձէ բոլոր տուժածներուն հատուցել:

Հանրապետութեան նախագահ զօր. Միշել Աուն երէկ շարունակեց հետեւիլ Հարաւային արուարձաններուն դէմ գործուած իսրայէլեան բռնարարքներու հետեւանքներուն:

aztagdaily.com/archives/451341