Վանի Հայկական Պատմական Եկեղեցին Թուրք Զինուորները Օգտագործած Են Իբրեւ Արտաքնոց

11 նոյեմբեր 2015

Թուրքիոյ Վանի նահանգի Պաշքալէ շրջանի Ալպայարաք (պատմ. Աղբակ) թաղամասին մէջ գտնուող հայկական Սուրբ Բարթուղիմէոս վանքը թուրք զինուորներու կողմէ օգտագործուած է իբրեւ արտաքնոց:

Թրքական «Dicle» լրատուական գործակալութեան թղթակից Սելման Քելեշ գործակալութեան կայքին վրայ հրապարակուած իր յօդուածին մէջ անդրադարձած է եկեղեցւոյ պատմութեան:

Ըստ Քելեշի` վանքը երկար ժամանակ գտնուած է ռազմական գօտիի մէջ եւ աւերուած է թուրք զինուորներու կողմէ: Զինուորները գանձ որոնելու նպատակով ցանկապատած են եղեկեցւոյ շրջակայքը, վնասած պատերու սրբապատկերները:

«13-14-րդ դարերուն կառուցուած վանքը իր վրայ կը կրէ մշակութային ցեղասպանութեան հետքերը: 4-րդ դարուն մահացած Սբ. Բարթուղիմէոսի գերեզմանի վրայ կառուցուած եկեղեցին մինչեւ Առաջին Համաշխարհային պատերազմը գործող եկեղեցի եղած է, սակայն հայերու նկատմամբ իրագործուած ցեղասպանութեան ժամանակ, հայերու ճակատագիրին պէս եկեղեցին ալ աւերուած է: Այնուհետեւ հանրապետութեան տարիներուն, տարիներ շարունակ ռազմական գօտիին մէջ գտնուող եկեղեցւոյ շրջակայքին մէջ զինուորները խրամատներ փորած են, իսկ ներսը իրենց բնական կարիքները հոգացած»- ermenihaber.am-ի փոխանցմամբ` կ’ըսուի յօդուածին մէջ:

Հեղինակի հաւաստմամբ` պատմական յուշարձան հանդիսացող վանքը ներկայիս ալ կը գտնուի աւերուած եւ լքուած վիճակի մէջ: Յուշարձանի պահպանութեան ու վերականգնման համար որեւէ աշխատանք չի նախատեսուիր:

ԵՌԱԳՈՅՆ

http://www.yerakouyn.com/