Սուրիական Բանակը Այսօր Պիտի Դադրեցնէ Իտլիպի Մէջ Կրակոցը. Էրտողան. «Իտլիպի Զարգացումները Մեր Փափաքածին Նման Չեն Ընթանար»
01 ՍԵՊՏԵՄԲԵՐ 2019 – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:
Ռուսիոյ պաշտպանութեան նախարարութիւնը երէկ յայտնեց, որ սուրիական բանակը այսօր միակողմանի կերպով պիտի դադրեցնէ կրակոցը Իտլիպի լարուածութեան մեղմացման գօտիին մէջ: Այս մասին հաղորդեց «Ռոյթըրզ» լրատու գործակալութիւնը:
Նախարարութիւնը Սուրիոյ մէջ զինեալները յորդորեց միանալու Իտլիպի մէջ զինադադարին, որ պիտի սկսի 31 օգոստոսին:
Նշենք, որ սուրիական բանակը կը շարունակէ Իտլիպի հարաւային գիւղական շրջանին մէջ իր յառաջխաղացքը:
Թուրքիոյ նախագահ Ռեճեփ Թայիփ Էրտողան նշեց. «Իտլիպի զարգացումները չեն ընթանար մեր փափաքածին համեմատ»:
«Իտլիպի մէջ թրքական հսկողութեան 9-րդ եւ 10-րդ կէտերը որոշ ոտնձգութեանց ենթարկուեցան, եւ Ռուսիոյ նախագահ Վլատիմիր Փութինի հետ մեր հանդիպումէն ետք այդ առնչութեամբ պէտք եղած զգուշացումները կատարուեցան»:
Էրտողան նաեւ յայտնեց, որ ՄԱԿ-ի ընդհանուր ժողովի ծիրին մէջ պիտի հանդիպի Միացեալ Նահանգներու նախագահ Տանըլտ Թրամփի հետ եւ անոր հետ դարձեալ քննարկէ Սուրիոյ զարգացումները: «Ինչ կը վերաբերի Սուրիոյ հիւսիսը 20 քիլոմեթր խորութեամբ անվտանգութեան գօտիին, ամերիկեան կողմը աւելի նուազ խորութիւն մը պահանջեց, եւ մենք ատոր համաձայն գտնուեցանք, թէկուզ ժամանակաւորապէս», աւելցուց ան:
Թուրքիոյ պաշտպանութեան նախարար Հուլուսի Աքար յայտարարեց. «Իտլիպի մէջ մեր զինուորներուն ու հսկողութեան կէտերուն որեւէ յարձակումի ենթարկուելու պարագային Թուրքիան իրաւունք ունի ինքզինք պաշտպանելու»:
Թուրքիոյ արտաքին գործոց նախարար Մեւլութ Չաւուշօղլու իր կարգին նշեց. «Ռուսիա Անգարային վստահեցուց, որ Սուրիոյ հիւսիս-արեւմուտքը գտնուող անոր (Անգարայի, «Ա.») հսկողութեան կէտերը յարձակումներու պիտի չենթարկուին»:
«Ընդդիմութեան վերահսկողութեան տակ գտնուող Իտլիպի նահանգին մէջ սուրիական կառավարութեան յարձակումներուն շարունակումը կրնայ սուրիացի գաղթականներու դէպի Եւրոպա յաւելեալ հոսք մը պատճառել», ըսաւ ան:
Թրքական դիւանագիտութեան պետը նաեւ ընդգծեց. «Թրքական բանակը, որ Սուրիոյ ընդդիմադիր խմբաւորումներուն կ՛աջակցի, Սուրիայէն պիտի հեռանայ, երբ քաղաքական լուծում մը գտնուի, սակայն սուրիական վարչակարգը ներկայիս քաղաքական լուծումին չի հաւատար»:
aztagdaily.com/archives/451998
