Աշխարհասփիւռ Հայութիւնը Կը Նշէ ՀՀ Անկախութեան 28-րդ Տարեդարձը
21 ՍԵՊՏԵՄԲԵՐ 2019 – ՀԱՅԱՍՏԱՆԻ ԱՆԿԱԽՈՒԹԻՒՆ:
Հայաստանի Հանրապետութիւնը Սեպտեմբեր 21-ին կը նշէ անկախութեան 28-րդ տարեդարձը:
28 տարի առաջ հայ ժողովուրդը հանրաքուէի միջոցով իր վճռական «այո»-ն ըսաւ Հայաստանի անկախութեան: Հայաստանի չափահաս բնակչութեան 95% մասնակցութեամբ ընտրողներուն 99.5%-ը «համաձա՞յն էք, որ Հայաստանի Հանրապետութիւնը լինի ժողովրդավարական անկախ պետութիւն` ԽՍՀՄ կազմից դուրս» հարցին դրական պատասխան տուաւ: Արդէն երկու օր անց` Սեպտեմբեր 23-ին, երկրի Գերագոյն Խորհուրդը Հայաստանը հռչակեց անկախ, ինքնիշխան հանրապետութիւն:
Հայաստանի ազգային տօնացոյցի կարեւորագոյն այս տօնին «հիմնադրութեան» նախորդած էր 1990-ի Օգոստոս 23-ը. երբ սկիզբ դրուեցաւ անկախ պետականութեան հաստատման գործընթացին: Հայաստանի նորընտիր Գերագոյն խորհուրդը իր առաջին նստաշրջանի ժամանակ ընդունեց «Հայաստանի անկախութեան մասին» հռչակագիրը: Հանրապետութեան խորհրդարանը ատով ազդարարեց անկախ պետականութեան հաստատման գործընթացի սկիզբը: Հռչակագրի ընդունումէն մէկ օր անց` Օգոստոս 24-ին, ՀԽՍՀ Գերագոյն խորհուրդը որոշեց Հայկական Խորհրդային Սոցիալիստական Հանրապետութիւնը վերանուանել Հայաստանի Հանրապետութիւն, իսկ գործող տասներկուերորդ գումարման Գերագոյն խորհուրդը համարել Հայաստանի Հանրապետութեան առաջին գումարման Գերագոյն խորհուրդ:
Նորանկախ Հայաստանի հռչակմամբ սկիզբ դրուեցաւ Հայաստանի երկրորդ Հանրապետութեան պատմութեան:
Արդէն 28 տարի` Հայաստանի տարածքին մէջ կը գործեն միայն ՀՀ Սահմանադրութիւնը եւ օրէնքները: Հայոց պետականութեան կրողը Հայաստանի Հանրապետութեան ժողովուրդն է: ՀՀ տարածքին բնակուող բոլոր քաղաքացիներուն համար կը սահմանուի Հայաստանի Հանրապետութեան քաղաքացիութիւնը: Արտերկրի հայութիւնը ՀՀ քաղաքացիութեան իրաւունք ունի:
Երկրորդ Հանրապետութեան առաջին Սահմանադրութիւնը ընդունուած է 1995-ի Յուլիս 5-ին` համաժողովրդական հանրաքուէի արդիւնքով: Գործող Սահմանադրութիւնը ընդունուած է 2015-ի Նոյեմբեր 6-ին` դարձեալ համաժողովրդական հանրաքուէի արդիւնքով: Հայաստանի Հանրապետութեան դրօշը եռագոյնն է, նորանկախ Հայաստանի զինանշանը` Հայաստանի առաջին Հանրապետութեան /1918-1920/ զինանշանն է, որուն հեղինակներն են ճարտարապետ Ալեքսանդր Թամանեանը եւ նկարիչ Յակոբ Կոջոյեանը: Հայաստանի օրհներգը եւս Հայաստանի առաջին Հանրապետութեան օրհներգն է: Բառերուն հեղինակը Միքայէլ Նալպանտեանն է, երաժշտութեանը` Բարսեղ Կանաչեանը:
Սեպտեմբեր 21-ը ազգային հպարտութեան օր է. անկախ հայրենիք ունենալու հայ ժողովուրդի դարաւոր երազանքը 28 տարի է` իրականութիւն է:
“Արմենփրես”
