Նիկոլ Փաշինեանի Հանդիպումները Լոս Անճելըսի Մէջ
23 ՍԵՊՏԵՄԲԵՐ 2019 – ՕՐԸ ՕՐԻՆ:
Վարչապետ Նիկոլ Փաշինեանի գլխաւորած պատուիրակութիւնը պաշտօնական այցով կը գտնուի Միացեալ Նահանգներ։ Աշխատանքային այցի ծիրէն ներս Փաշինեան իր տիկնորջ՝ Աննա Յակոբեանի հետ հիւրընկալուած է Լոս Անճելըսի քաղաքապետարանին մէջ, հանդիպումներ ունեցած Քալիֆորնիոյ նահանգային եւ Լոս Անճելըսի քաղաքային իշխանութիւններու ներկայացուցիչներու հետ:
Լոս Անճելըսի քաղաքապետին անունէն տրուած պաշտօնական ընդունելութենէն ետք տեղի ունեցած է ՀՀ վարչապետ Նիկոլ Փաշինեանի եւ Լոս Անճելըսի քաղաքապետ էրիկ Կարսէթիի հանդիպումը:
Կարսէթի ողջունած է Հայաստանի վարչապետը, անոր գլխաւորած պատուիրակութեան անդամները եւ կարեւոր համարած Նիկոլ Փաշինեանի այցը ԱՄՆ ու Լոս Անճելըս:
Վարչապետ Փաշինեան շնորհակալութիւն յայտնած է Էրիկ Գարսէթիին ջերմ ընդունելութեան, ինչպէս նաեւ «Կրանտ փարք» կոչուող վայրին մէջ նախատեսուած հանրահաւաքի կազմակերպման աջակցելու համար:
Հանդիպումէն ետք վարչապետ Նիկոլ Փաշինեան եւ Լոս Անճելըսի քաղաքապետը ուղեւորուած են Լոս Անճելըսի կեդրոնը գտնուող Grand Park` մասնակցելու հանրահաւաքին: Լոս Անճելըսի քաղաքապետը հանրահաւաքի սկիզբը հանդէս եկած է բացման խօսքով:
Նիկոլ Փաշինեանի ելոյթը Grand Park -ի մէջ տեսանիւթով։
Իմ ելույթը Լոս Անջելեսի կենտրոնում գտնվող Գրանդ Փարք վայրում նախատեսված հանրահավաքի ժամանակ
Իմ ելույթը Լոս Անջելեսի Գրանդ Փարքում կայացած հանրահավաքի ժամանակ:
Posted by Nikol Pashinyan / Նիկոլ Փաշինյան on Sunday, September 22, 2019
Վարչապետը Լոս Անճելըսի մէջ հանդիպած է Քալիֆորնիոյ հայ համայնքի կառոյցներու ղեկավարներուն հետ
Վարչապետ Փաշինեան հանդիպած է նաեւ Քալիֆորնիոյ հայ համայնքի կառոյցներու ղեկավար կազմին հետ:
Հանդիպման մասնակցած են հայ համայնքի ներկայացուցիչներ` շուրջ 70 անձ, ներկայ եղած են նաեւ Ֆրեզնօ եւ Լաս Վէկաս քաղաքներու ՀՀ պատուոյ հիւպատոսները, հայ համայնքի հոգեւոր հայրերը:
Հանդիպման մասնակիցներուն ուղղուած ողջոյնի խօսքին մէջ վարչապետ Նիկոլ Փաշինեան նշած է, որ շատ ուրախ է այսօրուան հանդիպմով: «Սա իսկապէս կարեւոր հանդիպում է, որ կը ծրագրուէր դեռ անցեալ տարուընէ, եւ կրնամ ըսել, որ օդակայանէն դուրս գալու առաջին րոպէէն կը զգամ այն մթնոլորտը, որ ձեւաւորուած է այս օրերուն` Լոս Անճելըսի հայ համայնքին կողմէ, եւ կ՛ուզեմ շնորհակալութիւն յայտնել առաջին հերթին այդ մթնոլորտին, պատրաստակամութեան համար․․․»։
Քալիֆորնիոյ հայ համայնքի ներկայացուցիչները ողջունած են վարչապետը Ամերիկայի Լոս Անճելըս քաղաքին մէջ եւ նշած, որ ոգեւորուած են Նիկոլ Փաշինեանի այցով, անոր հետ հանդիպման ու մայր հայրենիքին, Հայաստան-սփիւռք կապերուն վերաբերող հարցեր քննարկելու հնարաւորութեամբ:
Անդրադառնալով Քալիֆորնիոյ հայ համայնքի կառոյցներու ղեկավարներու հարցադրումներուն` Հայաստանի վարչապետը ներկայացուցած է համահայկական օրակարգի ձեւաւորման եւ համահայկականութեան գաղափարի իրագործման տեսլականը, խօսած Հայաստանի տնտեսական զարգացման ցուցանիշներուն եւ դրական միտումներուն, զբօսաշրջութեան, անդրադարձած Արցախի հարցի կարգաւորման, Հայաստանի մէջ իրականացուող դատաիրաւական համակարգի, պետական կառավարման համակարգի կառուցուածքային բարեփոխումներուն, կեղծ լրատւութեան դէմ պայքարին, ինչպէս նաեւ պատասխանած հանդիպման մասնակիցներու շարք մը այլ հարցերուն:
yerakouyn.com/2019/09/23/նիկոլ-փաշինեանի-հանդիպումները-լոս-ան/
