Ֆրանչիսկոս Պապը Փարիզի Ահաբեկչութիւնները Երրորդ Համաշխարհային Պատերազմի Մաս Կը Համարէ

14 նոյեմբեր 2015

Հռոմի Ֆրանչիսկոս պապը յայտարարած է, որ Փարիզի ահաբեկչութիւնները չեն կրնար որեւէ ձեւով արդարացուիլ, եւ անոնք երրորդ համաշխարհային պատերազմի մէկ մասն են, որու մասին ինքը խօսած է նախապէս, կը հաղորդէ News.am–ը` վկայակոչելով Associated Press-ը:

«Նման գործողութիւններւ արդարացում չունին»,- ըսած է ան` մեկնաբանելով Ֆրանսայի մայրաքաղաքին մէջ եղած ահաբեկչական գործողութիւնները:

2014-ին Պապը իր քարոզներէն մէկուն ժամանակ յայտարարած էր, որ երրորդ համաշխարհային պատերազմը արդէն սկսած է:

Յիշեցնենք, որ Նոյեմբեր 13-ի լոյս 14-ի գիշերը Փարիզի մէջ ահաբեկչութեան շարքի հետեւանքով պաշտօնական տուեալներով, մահացած է առնուազն 128 մարդ: Լրատուամիջոցները կը յայտնեն 150-էն աւելի զոհերու մասին: Փարիզի ոստիկանութիւնը տեղեկութիւններ ունի 8 ահաբեկիչներու մասին, որոնք մահացած են: Անոնցմէ 7-ը իրենք զիրենք պայթեցուցած են «շահիտի գօտիով»,- յայտնած է քննութեան մօտ կանգնած աղբիւրը:

Փարիզի մէջ արտակարգ դրութիւն յայտարարուած է:

ԵՌԱԳՈՅՆ

http://www.yerakouyn.com/