«Քիմիական Զէնք Օգտագործելուն Համար Սուրիոյ Վարչակարգը Պատժելու Շարք Մը Ընտրանքներ Ունինք» Կ՛ըսէ Ճեֆրի
30 ՍԵՊՏԵՄԲԵՐ 2019 – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:
Սուրիոյ հարցով Միացեալ Նահանգներու յատուկ պատուիրակ Ճէյմս Ճեֆրի «Արապիա» արբանեակային պատկերասփիւռի կայանին հետ հարցազրոյցի ընթացքին յայտնեց, որ սուրիական վարչակարգը քլորի կազ օգտագործած է` աւելցնելով. «Պաշշար Ասատի վարչակարգը պատժելու համար ունինք շարք մը ընտրանքներ, ներառեալ` զինուորականը»:
Ճեֆրի ըսաւ, թէ Միացեալ Նահանգներ կ՛ողջունեն Սուրիոյ մէջ սահմանադրական յանձնախումբի կազմութիւնը, եւ նշեց. «Պէտք է ճնշում բանեցնենք Ռուսիոյ եւ Պաշշար Ասատի վարչակարգին վրայ, որպէսզի սահմանադրական յանձնախումբը լուրջի առնեն»:
«Սահմանադրական յանձնախումբի կազմութեան Ռուսիոյ աջակցութիւնը կրնայ քաղաքական լուծումին դիմաց ճամբայ հարթել», աւելցուց ամերիկացի պատուիրակը:
Նախապէս հաղորդուած էր, որ յանձնախումբի վերջնական կազմին շուրջ համաձայնութիւն գոյացած է, եւ անիկա իր առաջին ժողովը պիտի գումարէ 30 հոկտեմբերին: Քրտական Ժողովուրդի պաշտպանութեան ջոկատները յայտարարած են, թէ սահմանադրական յանձնախումբը արդարօրէն չէ ձեւաւորուած, որովհետեւ ատոր կազմին մէջ ընդգրկուած չեն իրենց ներկայացուցիչները:
Միացեալ Նահանգներու յատուկ ներկայացուցիչը, սակայն, նշեց. «(Սուրիոյ) հիւսիս-արեւելքը ներկայացուած պիտի ըլլայ: ՄԱԿ-ի կողմէ ընտրուած 50 անդամներու շարքին ընդգրկուած են նաեւ երկրի հիւսիս-արեւելքի ներկայացուցիչները»:
Ան նոյն ատեն յայտարարեց, որ տեսած է յանձնախումբի անդամներու ցանկը, սակայն չի կրնար զայն հաստատել:
«Մենք վստահ ենք, որ ՄԱԿ-ը պիտի կարենայ Սուրիոյ մէջ, Իրաքի մէջ կատարածին նման, ազատ ընտրութիւններ կազմակերպել», շեշտեց Ճեֆրի:
Ամերիկացի պատուիրակը նաեւ յայտարարեց. «(Սուրիոյ մէջ) Սահմանափակ թիւով ամերիկեան ուժեր պիտի պահենք` երաշխաւորելու համար ՏԱՀԵՇ-ի վերադարձի բացառումը»:
aztagdaily.com/archives/459694
