ՎԱՀՐԱՄ ԷՄՄԻԵԱՆ – Անդրադարձ. Սպասելով Ռուսիոյ Պատասխան Քայլին
08 ՀՈԿՏԵՄԲԵՐ 2019 – ԱՆԴՐԱԴԱՐՁ:
ՎԱՀՐԱՄ ԷՄՄԻԵԱՆ
Ուաշինկթըն Սպիտակ տան եւ արտաքին ու պաշտպանութեան նախարարութեան մակարդակներով կանաչ լոյս տուաւ հիւսիսային Սուրիոյ մէջ թրքական բանակին կողմէ գործողութեան շղթայազերծման եւ սկսաւ իր ուժերը հեռացնել շրջանէն: Աւելի՛ն, ամերիկացի պաշտօնատար մը «Ռոյթըրզ» լրատու գործակալութեան յայտնեց, որ ամերիկեան ուժերը երկուշաբթի առաւօտեան քրտական ուժերուն յայտնած են, թէ զիրենք թրքական յարձակումէն պիտի չպաշտպանեն: Միացեալ Նահանգներու նախագահ Տանըլտ Թրամփ մեկնաբանելով իր երկրի ուժերու հեռացումը ըսաւ. «Թուրքերը եւ քիւրտերը իրենց հարցերը իրարու միջեւ պէտք է լուծեն մեր հեռանալէն ետք»:
Այլ խօսքով` Միացեալ Նահանգներ անգամ մը եւս լքեցին քիւրտերը եւ այդ քայլով բոլորին յղեցին այն պատգամը, թէ Ուաշինկթըն իր յանձնառութիւնները չի յարգեր եւ անվստահելի գործընկեր է: Ուաշինկթըն ՕԹԱՆ¬ի իր դաշնակիցը նախընտրեց ՏԱՀԵՇ¬ի դէմ պայքարին մէջ իր դաշնակիցէն:
Էրտողան նոյեմբերի առաջին շաբաթը պիտի այցելէ Ուաշինկթըն, ուր հանդիպում պիտի ունենայ իր ամերիկացի պաշտօնակիցին հետ եւ քննարկէ «Էֆ¬35» հալածիչներու ծրագիրը, որմէ ռուսական «Էս¬400» հակաօդային համակարգեր գնելուն համար դուրս ձգուած էր Թուրքիան եւ սկսած հետաքրքրուիլ ռուսական հալածիչներով:
Ուաշինկթըն քիւրտերը զոհելով զգուշացաւ Անգարան Մոսկուայի գիրկը նետելէն, եւ այդպիսով ո՛չ միայն կենդանի պահեց զայն սիրաշահելու ռուս¬ամերիկեան մրցակցութիւնը, այլ նաեւ կշիռը թեքեց դէպի իր կողմը: Ճատրակի այս խաղին մէջ հերթը այժմ Ռուսիոյ է:
Միջազգային քաղաքականութեան մէջ տկար երկիր մը կրնայ կէտեր արձանագրել` շահագործելով զինք սիրաշահելու համար երկու մեծ տէրութիւններու միջեւ ընթացող մրցակցութիւնը: Վտանգաւոր խաղ մը, որուն համար այդ երկիրն ու անոր ղեկավարը կրնան սուղ գին վճարել, վկայ` ռուս¬ամերիկեան միեւնոյն մրցակցութիւնը շահագործած Ապտել Նասերի ճակատագիրը:
aztagdaily.com/archives/460838
