«Ամերիկայի Հետ Անգամ Մը Եւս Բանակցութեան Սեղան Պիտի Չնստինք, Եթէ Իր Քաղաքականութիւնը Չփոխէ» Կ՛ըսէ Հիւսիսային Քորէա
08 ՀՈԿՏԵՄԲԵՐ 2019 – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:
Հիւսիսային Քորէայի արտաքին գործոց նախարարութիւնը յայտարարեց, թէ անգամ մը եւս բանակցութեան սեղան պիտի չնստի, եթէ Միացեալ Նահանգներ իրենց թշնամական քաղաքականութիւնը չփոխեն:
«Միացեալ Նահանգներ կը շարունակեն նոյն քաղաքականութիւնը կիրարկել եւ որեւէ նոր լուծում չբերին, ինչպէս նաեւ Հիւսիսային Քորէայի հետ բանակցութիւնները շահագործեցին` զանոնք օգտագործելով իրենց ներքին քաղաքականութեան մէջ», նշեց նախարարութիւնը:
Միացեալ Նահանգներու արտաքին գործոց նախարարութեան բանբեր Մորկըն Օրթակուս յայտնած էր, որ իր երկիրը ընդունած է յառաջիկայ երկու շաբթուան ընթացքին Հիւսիսային Քորէայի հետ Շուէտի մէջ բանակցիլ:
Հիւսիսային Քորէայի աւագ բանագնաց Քիմ Եոնկ Կիլ իր կարգին յայտնած էր, թէ Շուէտի մայրաքաղաք Սթոքհոլմի մէջ Միացեալ Նահանգներու հետ բանակցութիւնները ձախողած են, եւ անոնց շարունակութիւնը կախեալ է ամերիկեան կեցուածքէն:
aztagdaily.com/archives/460894
