Սուրիացի Քիւրտերով, Ասորիներով Եւ Հայերով Բնակեցուած Տարածքը Անգամ Մը Եւս Վտանգի Հետ Դէմ Յանդիման Կը Գտնուի. Կարօ Փայլան
10 ՀՈԿՏԵՄԲԵՐ 2019 – ՏԱՐԱԾԱՇՐՋԱՆ – ԹՈՒՐՔԻԱ – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:
Թուրքիոյ Ազգային ժողովին մէջ քրտամէտ ժողովուրդներու ժողովրդավարական կուսակցութեան երեսփոխան Կարօ Փայլան` անդրադառնալով Թուրքիոյ կողմէ Սուրիոյ հիւսիսը կատարուող զինուորական գործողութեան, «Ակօս»-ին յայտնեց, թէ այդ քայլը շատ լուրջ վտանգներու դուռ կը բանայ: Ան օրինակ բերաւ Փաքիստան-Աֆղանիստան սահմանին Փեշաւերի մէջ ժիհատականներու տեղադրումով ծագած վտանգները: Փայլան յայտնեց, թէ Էրտողանն ալ ունի «Ժիհատիստան» մը կազմելու երազներ: «Մենք` իբրեւ Ժողովուրդներու ժողովրդավարական կուսակցութիւն, դէմ ենք պատերազմին: Գիտենք, թէ պատերազմը աւեր, սով եւ մահ կը ծնի: Հարիւր տարի առաջ հայ ժողովուրդը Մեծ եղեռնի տարիներուն աքսորուած էր դէպի Ռաքքա եւ Տէր Զօր: Այժմ սուրիացի քիւրտերով, ասորիներով եւ հայերով բնակուած տարածքը անգամ մը եւս նոյն վտանգին հետ դէմ յանդիման կը գտնուի»,- ըսաւ Կարօ Փայլան:
Նախորդող օրերուն Դիմատետրի եւ «Թուիթըր»-ի էջերով Փայլան նաեւ անդրադարձած է Թուրքիոյ խորհրդարանին կողմէ Իրաքի եւ Սուրիոյ տարածքներուն վրայ ռազմական գործողութիւններու իրականացման ժամկէտը 1 տարիով երկարաձգելու փաստին եւ գրած, որ Արդարութիւն եւ բարգաւաճում, Ժողովրդադեմոկրատական, Ազգային-ժողովրդավարական եւ «Լաւ» կուսակցութիւնները պատասխանատու են Սուրիոյ հիւսիսը կայանալիք աղէտին համար:
«Ասիկա պատերազմական շարժում սկսելու հաստատում էր, որ անցաւ խորհրդարանով: Ժողովուրդը չ՛ուզեր պատերազմ, եւ մենք մինչեւ վերջ պիտի պայքարինք խաղաղութեան համար»,- գրած է Փայլանը` «Ո՛չ պատերազմին» հեշթակով:
«Թուիթըր»-ի վրայ Կարօ Փայլան գրած էր. «Երկիրը խաղալիք դարձուցած էք Թրամփի եւ Փութինի ձեռքը: Բայց եթէ հաշտուինք եւ յառաջ ընթանանք ժողովրդավարութեամբ, այս իրավիճակէն կը ձերբազատինք: Եթէ պատերազմինք, բոլորս պիտի տուժենք: Եթէ հաշտուինք, բոլորս պիտի շահինք»:
Yerakouyn.com/2019/10/11/սուրիացի-քիւրտերով-ասորիներով-եւ-հայ/
