Թուրքիոյ Մէջ Կը Շարունակուի Դժգոհութիւններու Ալիքը Հայոց Ցեղասպանութիւնը Ճանչցող Բանաձեւին Դէմ
04 ՆՈՅԵՄԲԵՐ 2019 – ՑԵՂԱՍՊԱՆՈՒԹԻՒՆ – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ: ««Արեւմտյան Հայաստանի Հանրապետությունը (Հայաստան) դիմել է ՄԱԿ՝ ԱՄՆ 28–րդ նախագահ Վուդրո Վիլսոնի 1920 թ. նոյեմբերի 22–ին կայացրած Իրավարար վճիռը կյանքի կոչելու եւ իրականացնելու վերաբերյալ»»
Թուրքիոյ մէջ կը շարունակուին դժգոհութիւնները` 30 հոկտեմբերին Միացեալ Նահանգներու Ներկայացուցիչներու տան մէջ ընդունուած Հայոց ցեղասպանութիւնը ճանչցող բանաձեւին պատճառով: Թուրքիոյ Ազգային մեծ ժողովի Թուրքիա-Միացեալ Նահանգներ միջխորհրդարանական բարեկամութեան խումբի նախագահ Մեհտի Էքեր Միացեալ Նահանգներու Ներկայացուցիչներու տան անդամներուն նամակ յղած է: 3 էջերէ բաղկացած նամակին մէջ նշուած է երկու երկիրներուն միջեւ յարաբերութիւններուն մասին` ընդգծելով, որ «հայկական պնդումները չեն համապատասխաներ իրականութեան»:
«Եթէ անյաջող սխալ կամ վատ պատահականութիւն չէ այս բանաձեւը, ապա անկարելի է ատիկա չորակել իբրեւ թշնամական մօտեցում թուրք ժողովուրդին նկատմամբ` այդ պատճառով կարեւոր օր նկատուող 29 հոկտեմբերին (Թուրքիոյ Հանրապետութեան հիմնադրման օրը): Պատմութիւնը չի կրնար դարձեալ գրուիլ քաղաքական խորհրդարաններուն կողմէ», նշուած է նամակին մէջ:
Անգարայի համալսարանի խորհուրդը իր կարգին քննադատած է Միացեալ Նահանգներու Ներկայացուցիչներու տան որոշումը: Յայտարարութեան մէջ նշուած է, որ այս որոշումը կը սեւցնէ պատմական իրողութիւնները, կը դառնայ գործիք քաղաքական շահերու նպատակով, եւ կ՛ընդգծուի, որ Թուրքիան միշտ պաշտպանած է արխիւներու բացման առաջարկը, եւ ասիկա պատմաբաններու, այլ ոչ թէ քաղաքագէտներու գործն է. «Ցաւով կը քննադատենք եւ կը մերժենք Միացեալ Նահանգներու Ներկայացուցիչներուն կողմէ ընդունուած այս որոշումը: Այս որոշումը կը վտանգէ 19-րդ դարէն սկսած Թուրքիա-Միացեալ Նահանգներ համագործակցութիւնը: Կ՛ուզենք, որ Միացեալ Նահանգներու լիազօր մարմինները դարձեալ գնահատական տան եւ ետ քաշեն այս որոշումը»:
Թուրքիոյ մէջ իշխող Արդարութիւն եւ բարգաւաճում կուսակցութեան փոխնախագահ Նուման Քուրթուլմուշ նշած է, որ Հայոց ցեղասպանութեան նիւթը բարձրաձայնողները թող նախ եւ առաջ հաշիւ տան կարմրամորթներուն (այդպէս կ՛անուանեն թուրքերը Ամերիկայի տեղաբնիկներուն):
Թուրքիայի «Վաթան» կուսակցութեան նախագահ, ազգայնական, տխրահռչակ գործիչ Տողու Փերինչեք, որ ժամանակին դատապարտուած էր Հայոց ցեղասպանութեան հերքման համար, նշած է, որ Միացեալ Նահանգներու Ներկայացուցիչներու տան ընդունած որոշումը յիմարութիւն է:
aztagdaily.com/archives/464348
