Յունաստանի Նախագահը Հայաստան Այցելեց. Նախագահ Փրոքոփիս Փաւլոփուլոս. «Թուրքիան Պէտք Է Հաշտուի Իր Պատմութեան Հետ Եւ Պատասխան Տայ»
06 ՆՈՅԵՄԲԵՐ 2019 – ՀԱՅՈՑ ՑԵՂԱՍՊԱՆՈՒԹԻՒՆ – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ: ««Արեւմտյան Հայաստանի Հանրապետությունը (Հայաստան) դիմել է ՄԱԿ՝ ԱՄՆ 28–րդ նախագահ Վուդրո Վիլսոնի 1920 թ. նոյեմբերի 22–ին կայացրած Իրավարար վճիռը կյանքի կոչելու եւ իրականացնելու վերաբերյալ»»
5 նոյեմբերին Յունաստանի նախագահ Փրոքոփիս Փաւլոփուլոս պաշտօնական այցելութիւն տուած է Հայաստան, ուր հանդիպումներ ունեցած է երկրի նախագահին ու վարչապետին հետ եւ Ծիծեռնակաբերդի մէջ յարգանքի տուրք մատուցած Հայոց ցեղասպանութեան զոհերուն:
Յունաստանի նախագահը հանդիպում ունեցաւ Հայաստանի նախագահ Արմէն Սարգսեանին հետ, որուն ընթացքին նախագահ Սարգսեան ըսաւ, թէ զոյգ ժողովուրդներու հազարամեայ բարեկամութիւնը ապացուցեց, որ անոնք միասնաբար ստեղծած են մշակոյթ, կրթութիւն եւ պատմութիւն, ունեցած են մեծ յաղթանակներ եւ մեծ դժբախտութիւններ` շատ յաճախ միասին: «Ձեր այցելութիւնը այսօր Հայաստանի Հանրապետութիւն նաեւ պատմական է, քանի որ մենք ոտք կը դնենք նոր` 21-րդ դար: Աշխարհը կը փոխուի եւ շատ արագ, սակայն այն ժողովուրդները, որոնք ունին միասին աշխատելու, պայքարելու ե՛ւ պատմութիւն, ե՛ւ ցանկութիւն, հանդէս պիտի գան իբրեւ յաջողակ երկիրներ եւ դժուար պայմաններու մէջ, անընդհատ փոխուող իրավիճակներու մէջ պիտի կարենան գտնել ճիշդ որոշումներն ու ճիշդ լուծումները»:
Յունաստանի նախագահը անդրադարձաւ երկու երկիրներուն ու ժողովուրդներուն միջեւ ամուր եւ խոր յարաբերութիւններուն, զորս զարգացնելու համար ունին բաւական մեծ կարելիութիւններ: «Մենք շատ ընդհանրութիւններ ունինք, բայց ունինք նաեւ ընդհանուր ցաւ: Մենք բաւական լաւ գիտենք եւ կը գիտակցինք անկախութեան ու ժողովրդավարութեան արժէքին եւ Ցեղասպանութեան ճանաչման համար պայքարի կարեւորութեան», նշեց ան:
Առանձնազրոյցէն ետք նախագահական նստավայրին մէջ տեղի ունեցաւ Հայաստանի եւ Յունաստանի նախագահներուն գլխաւորած պատուիրակութիւններու հանդիպումը, որուն ընթացքին Հայաստանի նախագահը անդրադարձաւ իրենց միջեւ եղած քննարկումներուն. «Ուրախ էի լսելու, որ Յունաստանը մօտ ժամանակներս պիտի վաւերացնէ Եւրոպական Միութեան հետ Հայաստանի համապարփակ եւ ընդլայնուած գործընկերութեան համաձայնագիրը: Համակարծիք էինք, որ շատ էական է մեր երկկողմանի համագործակցութիւնը քաղաքական, տնտեսական, նաեւ` մշակութային, գիտական եւ այլ մարզերու մէջ: Նաեւ կարեւոր նկատեցինք եռակողմ հարթակը` Հայաստան-Յունաստան-Կիպրոս»: Նախագահը բարձր գնահատեց երկկողմանի յարաբերութիւնները բոլոր ոլորտներուն մէջ նոր մակարդակի հասցնելու ներուժը:
Նշելով, որ երկու ժողովուրդներն ալ պատմականօրէն ձեւաւորուած սփիւռք ունին` Հայաստանի եւ Յունաստանի նախագահները ընդգծեցին սփիւռքի ձեւաչափով համագործակցութեան կարեւորութիւնը:
Յունաստանի նախագահ Փրոքոփիս Փաւլոփուլոս ընդգծեց, որ պատրաստ է իր նպաստը բերելու երկկողմանի յարաբերութիւններու սերտացման ու ամրապնդման: «Մեր երկու ժողովուրդներն ու երկիրները պատմականօրէն պարտադրուած են համագործակցիլ, եւ մենք պէտք է խորացնենք այդ գործակցութիւնը բոլոր բնագաւառներուն մէջ», ըսաւ նախագահ Փաւլոփուլոս:
Անոնք կարեւոր նկատեցին նաեւ երկու երկիրներու կառավարութիւններուն, ինչպէս նաեւ խորհրդարաններուն միջեւ աւելի սերտ համագործակցութիւնը` պատրաստակամութիւն յայտնելով կարելի եղածին չափ աջակցիլ անոնց ջանքերուն:
Անկէ ետք նախագահներ Սարգսեան եւ Փաւլոփուլոս տուին մամլոյ միացեալ ասուլիս մը, որուն ընթացքին Յունաստանի նախագահը անդրադառնալով Հայոց ցեղասպանութեան ու Պոնտոսի յոյներու ցեղասպանութեան` յայտարարեց, որ Թուրքիան պէտք է հաշտուի իր պատմութեան հետ եւ պատասխան տայ:
«Մենք կը յիշենք հայերու ցեղասպանութիւնը, մենք կը յիշենք Պոնտոսի յոյներու ցեղասպանութիւնը, ուրախ ենք, որ օրեր առաջ Միացեալ Նահանգներու Ներկայացուցիչներու տունը ընդլայնեց ցեղասպանութիւնը ճանչցողներուն շրջանակը: Մենք 1996-ին խորհրդարանի մակարդակով ճանչցանք Հայոց ցեղասպանութիւնը, սահմանեցինք Ապրիլ 24-ը` հայերու ցեղասպանութեան օր, եւ 2014-ին քրէականացուցինք հայերու ցեղասպանութեան ժխտումը: Կ՛ուզեմ շնորհակալութիւն յայտնել, որ Հայաստանի Ազգային ժողովին կողմէ միաձայնութեամբ ճանչցաք Պոնտոսի յոյներուն ցեղասպանութիւնը: Այստեղէն մենք ուղերձ կը յղենք Թուրքիոյ, ան պէտք է հաշտուի իր պատմութեան հետ, պատասխան տայ, պէտք է ներում հայցէ», ըսաւ նախագահը:
Անդրադարձ կատարուեցաւ նաեւ միջազգային կազմակերպութիւններու ծիրին մէջ համագործակցութեան հարցերուն:
Նախագահ Սարգսեան խօսեցաւ շատ արդիւնաւէտ քննարկումներուն մասին` յայտնելով, որ յառաջիկայ մէկ-երկու ամիսներուն Յունաստան պիտի արագացնէ Հայաստան-Եւրոպական Միութիւն համապարփակ եւ ընդլայնուած գործընկերութեան համաձայնագիրի վաւերացման հոլովոյթը:
Փաշինեան Ընդունեց Յունաստանի Նախագահը
Հայաստանի վարչապետ Նիկոլ Փաշինեան 5 նոյեմբերին հանդիպում ունեցաւ Յունաստանի նախագահ Փրոքոփիս Փաւլոփուլոսի հետ, որ պաշտօնական այցելութեամբ Հայաստան կը գտնուի:
Փաշինեան վստահութիւն յայտնեց, որ այս այցելութիւնը պիտի նպաստէ հայ-յունական եղբայրական կապերու զարգացման եւ ընդլայնման: «Մեր երկիրներու միջպետական եւ միջժողովրդական յարաբերութիւնները շատ բարձր մակարդակի վրայ կը գտնուին, եւ յոյս ունիմ, որ մենք պիտի կարենանք այս նպաստաւոր խորապատկերին վրայ աւելի արդիւնաւէտ տնտեսական համագործակցութիւն հաստատել, նաեւ այլ ոլորտներու մէջ մեր համագործակցութեան մակարդակը բարձրացնել եւ արդիւնքները աւելցնել», յայտնեց ան` աւելցնելով, որ արդէն իսկ գործակցութեան բաւական առիթներ եղած են, իսկ յունուարին կը նախատեսուի եռակողմանի` Հայաստան-Յունաստան-Կիպրոս ձեւաչափով առաջին վեհաժողովը, որ տեղի պիտի ունենայ Երեւանի մէջ: «Ատիկա շատ կարեւոր իրադարձութիւն է, որ ալ աւելի նպաստաւոր կը դարձնէ մեր յարաբերութիւնները», ըսաւ ան:
Վարչապետ Փաշինեան լուսարձակի տակ առաւ Հայոց ցեղասպանութեան ճանաչումը Յունաստանի կողմէ, նաեւ Հայաստանի խորհրդարանին կողմէ յոյներու, ասորիներու ցեղասպանութեան ճանաչումը: «Կը կարծեմ` այս փաստը հիմք կը ստեղծէ, որ մենք ընդհանուր անվտանգութեան հարցերու մէջ նոյնպէս համագործակցութեան ուղիներ փնտռենք, որովհետեւ մեզի համար ցեղասպանութիւններու ճանաչումը ո՛չ միայն պատմութեան ճանաչման խնդիր է, այլեւ ընդհանուր անվտանգութեան եւ ցեղասպանութիւններու կանխարգիլման ուղղուած կարեւոր ջանք», յայտնեց վարչապետ Փաշինեան:
Յունաստանի նախագահ Փրոքոփիս Փաւլոփուլոս յատկապէս ողջունեց Հայաստանի եւ հայ ժողովուրդին կողմէ գործադրուած ջանքերը, որոնք կը վերաբերին Հայոց ցեղասպանութեան միջազգային ճանաչման: «Ասիկա շատ կարեւոր քայլ է, եւ մենք մեր կողմէ մեր աջակցութիւնը կը ցուցաբերենք այդ հարցին: Միւս կողմէ, շատ ուրախ եմ, որ այդ պայքարի ծիրին մէջ Հայաստան իր հերթին ճանչցած է յոյներու եւ ասորիներու ցեղասպանութիւնը», ըսաւ նախագահը եւ ողջունեց Միացեալ Նահանգներու Ներկայացուցիչներու տան կողմէ Ցեղասպանութեան վերաբերող բանաձեւը:
Ան ողջունեց նաեւ եռակողմանի համագործակցութիւնը` Հայաստանի, Յունաստանի եւ Կիպրոսի միջեւ: «Վստահ եմ, որ եռակողմանի ձեւաչափով համագործակցութիւնը ո՛չ միայն օգուտներ կրնայ բերել եւ արդիւնաւէտ ըլլալ իւրաքանչիւր երկրի համար, այլ նաեւ ընդհանրապէս Հայաստանի` Եւրոպական Միութեան հետ համագործակցութեան համար», նշեց նախագահ Փրոքոփիս Փաւլոփուլոս:
Այնուհետեւ զրուցակիցները անդրադարձան թէ՛ երկկողմանի, եւ թէ՛ բազմակողմանի ձեւաչափով համագործակցութեան վերաբերող հարցերու, միտքեր փոխանակեցին Հայաստան-Եւրոպական Միութիւն համագործակցութեան շուրջ: Վարչապետ Փաշինեան կարեւոր նկատեց Յունաստանի կողմէ Հայաստան-Եւրոպական Միութիւն Համապարփակ եւ ընդլայնուած գործընկերութեան մասին համաձայնագիրի կարելի եղածին չափ սեղմ ժամկէտներու ընթացքին վաւերացումը:
Կողմերը միտքեր փոխանակեցին նաեւ շրջանային նշանակութեան հարցերու շուրջ եւ կարեւոր նկատեցին Հայաստան-Յունաստան-Կիպրոս եռակողմանի ձեւաչափով համագործակցութիւնը` մարտահրաւէրները միասնական ուժով դիմագրաւելու եւ ընդհանուր շահերը պաշտպանելու առումով:
Վարչապետ Փաշինեան շնորհակալութիւն յայտնեց Յունաստանին` ղարաբաղեան տագնապի հարցին մէջ հաւասարակշռուած դիրքորոշումը եւ բարձր գնահատեց երկկողմանի համագործակցութիւնը ռազմական ոլորտին մէջ:
Յարգանքի Տուրք` Ցեղասպանութեան Նահատակներուն Յիշատակին
Երէկ` երեքշաբթի, 5 նոյեմբերին, Յունաստանի նախագահը այցելեց Ծիծեռնակաբերդի յուշահամալիր եւ յարգանքի տուրք մատուցեց Հայոց ցեղասպանութեան զոհերու յիշատակին:
Ցեղասպանութեան թանգարան-հիմնարկի տնօրէն Յարութիւն Մարութեան Յունաստանի նախագահ Փրոքոփիս Փաւլոփուլոսին ներկայացուց Հայոց ցեղասպանութեան զոհերուն յիշատակը յաւերժացնող Ծիծեռնակաբերդի յուշահամալիրի ստեղծման պատմութիւնը: Յունաստանի նախագահը նաեւ շրջագայեցաւ թանգարան-հիմնարկին մէջ, գրառում կատարեց թանգարանի յուշամատեանին մէջ:
«Հայոց ցեղասպանութեան յիշողութիւնը պէտք է պահպանուի, չէ որ եթէ ցեղասպանութիւնները մոռցուին, այդ յանցագործութիւնները նորէն կը կրկնուին: Ասիկա ուղերձ է Երեւանէն բոլորին: Կը տեսնենք, որ աշխարհին մէջ նմանատիպ իրադարձութիւններ կը կրկնուին, եւ կան անձեր, որոնք թշնամի են մարդուն եւ քաղաքակրթութեան: Մենք վերապրած ենք նոյն սարսափը, ինչ որ հայերը: Անչափ շնորհակալ եմ Հայաստանի Հանրապետութեան նախագահին եւ կառավարութեան մեզ հիւրընկալելնուն համար, որովհետեւ հայ-յունական յարաբերութիւնները երկար տարիներու պատմութիւն ունին, եւ մենք պէտք է պահպանենք այս ընդհանուր յիշողութիւնը», լրագրողներուն ըսաւ Յունաստանի նախագահը:
Այնուհետեւ Յունաստանի նախագահ Փրոքոփիս Փաւլոփուլոս Ծիծեռնակաբերդի ծառուղիին մէջ խորհրդանշական եղեւնի տնկեց:
aztagdaily.com/archives/464674
