ՀԵՄ-ի Նստացոյցը Կը Շարունակուի – ՀԵՄ-ի Նստացոյցը Կը Շարունակուի
21 ՆՈՅԵՄԲԵՐ 2019 – ՀԱՅԱՍՏԱՆ – ՍՓԻՒՌՔ – ՆԵՐՔԻՆ ՀԱՐՑԵՐ – ՄՇԱԿՈՅԹԱՅԻՆ:
«Թէեւ ՀՅԴ ՀԵՄ բողոքի ցոյցը եւ նստացոյցը կը շարունակուին, իսկ դասադուլը ոչ թէ կը դադրի, այլ դադար կու տանք․ Ատոնք տարբեր բաներ են. այսօր Yerkir.am-ին յայտնեց ԵՊՀ ուսանող Գէորգ Գիւլումեան` անդրադառնալով շարք մը լրատումիջոցներու տարածած այն տեղեկութիւններուն, թէ որոշուած է ընդհանրապէս դադրեցնել դասադուլը:
«Չեմ գիտեր, թէ ինչու մամուլի մէջ այդպէս մեկնաբանած են մեր ըսածը: Մենք ընդամէնը երեք օրով դադար կու տանք, որ կապուած է նաեւ մեր դասախօսներու կոչերուն հետ: Բացի այդ` մենք ԵՊՀ տնօրէնի ժամանակաւոր պաշտօնակատարին եւ գիտական խորհուրդի կազմին նամակ-դիմումներ ուղղած ենք եւ կ՛ակնկալենք ստանալ այդ երկու մարմիններու արձագանգն ու դիրքորոշումը` կապուած Արայիկ Յարութիւնեանի, մեղմ խօսքով, ոչ յղկուած պահուածքին հետ, որ ան դրսեւորեց դասախօսներոի հետ հանդիպման ժամանակ»,- ըսած է ան:
ԵՊՀ ուսանողը շեշտեց, որ չեն դադրեցներ դասադուլը, իրենց պահանջները չեն փոխեր:
«Մենք պիտի շարունակենք տէր կանգնիլ մեր լեզուին, մշակոյթին, գրականութեան: Կը ցաւիմ, որ մամուլին մէջ իմ` քանի մը րոպէ տեւած խօսքէն կը կտրեն միայն այն հատուածը, ուր ես ըսած եմ, որ կը դադրեցնենք դասադուլը երեք օրով. Ատիկա բովանդակութենէն կտրուած խօսք է: Մեր բողոքը եւ պայքարը պիտի շարունակուի», – նշեց Գիւլումեան:
Ան ողջունեց Հիւսիսային համալսարանի ուսանողներուն, որոնք նոյնպէս դասադուլ յայտարարած են եւ միացած այլ ուսանողներու ու կը միանան նախարարութեան առջեւ նստացոյց ընող ՀՅԴ ՀԵՄ անդամներուն:
«ԵՊՀ-ի մէջ ցնծութեամբ ընդունեցին այդ լուրը: Կոչ կ՛ընենք այլ համալսարաններու մէջ ուսանող մեր միւս ընկերներուն, սերնդակիցներուն` միանալու այս պայքարին, ինչպէս նաեւ կոչ կ՛ընենք բոլոր համալսարաններու ներկայիս եւ նախկին դասախօսական կազմին, մտաւորականներուն` կանգնելու երիտասարդութեան կողքին եւ այս պայքարը հասցնելու դրական աւարտի»,– ըսած է ան:
Ըստ Գիւլումեանի` դասադուլը պիտի վերսկսի Երկուշաբթի, իսկ մինչ այդ հանդէս պիտի գան յայտարարութիւններով: Ուսանողական շարժման ներկայացուցիչները, ըստ անոր, կը պատրաստուին նաեւ տարբեր ձեւաչափերով հանդիպումներ ունենալու ԵՊՀ գիտական խորհուրդի անդամներուն, Երեւանի պետական մանկավարժական համալսարանի տարբեր բաժանմունքներու ուսանողական կառոյցներու եւ ղեկավարներուն հետ:
Yerakouyn.com/2019/11/20/հեմ-ի-նստացոյցը-կը-շարունակուի/
