Երկրորդ Օրն Ըլլալով Իսրայէլեան Յարձակում` Դամասկոսի Դէմ
21 ՆՈՅԵՄԲԵՐ 2019 – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:
Սուրիական ՍԱՆԱ պետական լրատու գործակալութիւնը հաղորդեց, որ երկու անձեր զոհուած են եւ շարք մը ուրիշներ, ներառեալ կիներ ու մանուկներ վիրաւորուած, երբ Իսրայէլ հրթիռներ արձակած է Սուրիոյ մայրաքաղաք Դամասկոսի մերձակայքին դէմ:
ՍԱՆԱ նշեց, որ սուրիական հակաօդային պաշտպանութեան համակարգերը Դամասկոսի հարաւային գիւղական շրջանին վերեւ վար առած են շարք մը «թշնամական թիրախներ»` բռնագրաւեալ Կոլանէն եւ Լիբանանի Մերժահիուն շրջանէն շղթայազերծուած յարձակումի մը ընթացքին:
Իսրայէլեան բանակը յայտարարեց, որ իր օդուժը հարուածած է Սուրիոյ մէջ իրանեան եւ սուրիական թիրախներ` ի պատասխան մէկ օր առաջ Սուրիայէն Իսրայէլի դէմ «իրանեան հրթիռներու» արձակման:
Իսրայէլի վարչապետ Պենիամին Նեթանիահու իր կարգին յայտնեց. «Սուրիոյ մէջ այսօր արշալոյսին իսրայէլեան օդուժին գործադրած հարուածը թիրախ դարձուց իրանեան զինուորական կառոյցներ եւ հակադարձութիւն էր Իսրայէլի ռմբակոծման»:
Ռուսիոյ արտաքին գործոց նախարարութիւնը նշեց, որ իսրայէլեան յարձակումները կը հակասեն միջազգային օրէնքին: Ռուսիոյ արտաքին գործոց փոխնախարար Միխայիլ Պոկտանով իսրայէլեան յարձակումը նկատեց սխալ եւ միջազգային օրէնքին հակասող քայլ մը` նշելով, որ Մոսկուան դէպքին շուրջ կապ հաստատած է իր դաշնակիցներուն հետ եւ պիտի հարցնէ անոր պայմաններուն մասին:
«Սքայ Նիուզ» հաղորդեց, որ իսրայէլեան յարձակումին պատճառով արձանագրուած են 11 զոհեր, որոնցմէ 7-ն` իրանցիներ:
aztagdaily.com/archives/466570
