Եւրոպական Միութիւնը Կ՛աջակցի Լեռնային Ղարաբաղի Տագնապի Լուծման ԵԱՀԿ-ի Մինսքի Խմբակի Համանախագահներու Ջանքերուն
27 ՆՈՅԵՄԲԵՐ 2019 – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:
26 նոյեմբերին Հայաստանի Հանրապետութեան եւ Եւրոպական Միութեան միջեւ կնքուած Համապարփակ եւ ընդլայնուած գործընկերութեան համաձայնագիրի երկրորդ տարեդարձին առիթով տեղի ունեցած մամլոյ ասուլիսին ընթացքին արտաքին գործողութեան եւրոպական ծառայութեան` Եւրոպայի եւ Կեդրոնական Ասիոյ հարցերու կառավարող տնօրէնի տեղակալ Լիւք Տեւին յայտնեց, որ Եւրոպական Միութիւնը ամբողջովին կ՛աջակցի Լեռնային Ղարաբաղի տագնապի խաղաղ լուծման վերաբերող Եւրոպայի մէջ անվտանգութեան եւ համագործակցութեան կազմակերպութեան Մինսքի խմբակի համանախագահներու ջանքերուն:
«Մենք միշտ տագնապներու խաղաղ լուծման կողմնակից ենք, մեր կարծիքով` զինուորական լուծումներ չկան, կայ միայն զինուորական ամբոխավարութիւն: Ճիշդ այս տագնապին առումով, իբրեւ Եւրոպական Միութիւն, մենք տագնապի լուծման կողմ չենք, բայց ամբողջովին կ՛աջակցինք ԵԱՀԿ-ի Մինսքի խմբակի համանախագահներու ջանքերուն: Անոնցմէ մէկը Եւրոպական Միութեան անդամ պետութիւն է», ըսաւ Տեւին:
Հայաստանի արտաքին գործոց նախարարի տեղակալ Աւետ Ադոնց նշեց, որ Հայաստանի կառավարութիւնը շատ բարձր կը գնահատէ Եւրոպական Միութեան մօտեցումը Լեռնային Ղարաբաղի տագնապի լուծման հարցին նկատմամբ:
aztagdaily.com/archives/467177
