Նախարար Զոհրապ Մնացականեան Ղարաբաղեան Հարցին Մէջ Կարեւոր Նկատեց ՀԱՊԿ-ի Երկիրներու Համաձայնեցուած Մօտեցումներու Պահպանումը
28 ՆՈՅԵՄԲԵՐ 2019 – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:
Աշխատանքային այցելութեամբ Պիշքեք գտնուող Հայաստանի արտաքին գործոց նախարար Զոհրապ Մնացականեան 27 նոյեմբերին մասնակցեցաւ ՀԱՊԿ-ի անդամ պետութիւններու արտաքին գործոց նախարարներու խորհուրդի, պաշտպանութեան նախարարներու խորհուրդի, անվտանգութեան խորհուրդի քարտուղարներու կոմիտէի միացեալ նիստին` իր խօսքին մէջ կարեւոր նկատելով միջազգային բոլոր հարթակներուն վրայ ՀԱՊԿ-ի անդամ պետութիւններուն կողմէ Լեռնային Ղարաբաղի տագնապին առնչութեամբ համաձայնեցուած մօտեցումներու պահպանումը:
Օրակարգի վրայ եղած են ՀԱՊԿ-ի շրջանակներուն մէջ եւ միջազգային հարթակներու վրայ անդամ պետութիւններու փոխադարձ գործակցութեան, արտաքին քաղաքականութեան համադրման, միջազգային ու շրջանային անվտանգութեան սպառնալիքներու ու մարտահրաւէրներու հակազդելու առնչուող հարցեր: Հանգամանալից կերպով անդրադարձ կատարուեցաւ Սուրիոյ մէջ ստեղծուած իրավիճակին:
Անդրադառնալով կառոյցի շրջանակներուն մէջ անդամ պետութիւններու համագործակցութեան հայկական կողմի տեսլականին` նախարար Մնացականեան առանձնայատուկ կերպով ընդգծեց արտաքին քաղաքականութեան համակարգման առնչուող հարցերուն շուրջ միջազգային հարթակներու վրայ դաշնակցային համագործակցութեան զարգացումը:
Ներկայացնելով Լեռնային Ղարաբաղի տագնապի խաղաղ լուծման հոլովոյթին առնչուող վերջին զարգացումները` Զոհրապ Մնացականեան ընդգծեց, որ խաղաղութեան համար բարենպաստ միջավայր ձեւաւորելու եւ ժողովուրդները խաղաղութեան նախապատրաստելու պայմանաւորուածութիւններու առկայութեան պայմաններուն մէջ առաւել քան արդիական կը մնայ ռազմատենչ եւ ատելութեան հռետորաբանութենէն, անվերահսկելի սպառազինութիւններու մրցավազքէն հրաժարելու, ինչպէս նաեւ տագնապի շփման գիծին մէջ լարուածութեան թուլացման համար յաւելեալ միջոցառումներու ձեռնարկման անհրաժեշտութիւնը:
Նախարար Մնացականեան կարեւոր նկատեց միջազգային բոլոր հարթակներուն վրայ ՀԱՊԿ-ի անդամ պետութիւններուն կողմէ Լեռնային Ղարաբաղի հիմնախնդիրին առնչութեամբ համաձայնեցուած մօտեցումներու պահպանումը:
Ան խօսեցաւ նաեւ Սուրիոյ հիւսիս-արեւելքը Թուրքիոյ ներխուժումով ստեղծուած իրադրութեան մասին` յատուկ մտահոգութիւն յայտնելով ազգային եւ կրօնական փոքրամասնութիւններու վիճակին վերաբերեալ: Նախարար Մնացականեան ընդգծեց, որ Հայաստան կը շարունակէ մարդասիրական օգնութիւն ցուցաբերել բարեկամ Սուրիոյ ժողովուրդին` ի շահ շրջանային խաղաղութեան եւ անվտանգութեան հաստատման:
Պէտք է նշել, որ նախարարներուն կողմէ նիստին շրջագիծին մէջ ընդունուած «Մերձաւոր Արեւելքի եւ Հիւսիսային Ափրիկէի մէջ իրավիճակի կայունացման վերաբերող ջանքերուն մասին» ՀԱՊԿ-ի անդամ պետութիւններու արտաքին գործոց նախարարներու միացեալ յայտարարութեան մէջ նախարարները անդրադարձ կատարեցին Սուրիոյ մէջ Հայաստանի մարդասիրական առաքելութեան` ընդգծելով անոր կարեւորութիւնը:
aztagdaily.com/archives/467336
