Թուրքիան Շանթաժի Կ՛ենթարկէ ՕԹԱՆ-ը – Թուրքիան կը մերժէ սատարել Պալթեան երկիրներու եւ Լեհաստանի համար
28 ՆՈՅԵՄԲԵՐ 2019 – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:
Թուրքիան կը մերժէ սատարել Պալթեան երկիրներու եւ Լեհաստանի համար ՕԹԱՆ-ի պաշտպանական ծրագիրին, այնքան ատեն որ դաշինքը Անգարային Սուրիոյ մէջ քրտական խմբաւորումներուն դէմ պայքարին մէջ աւելի մեծ քաղաքական աջակցութիւն չի ցուցաբերեր:
«Ռոյթըրզ» լրատու գործակալութիւնը, յղում կատարելով իր աղբիւրներուն կը հաղորդէ, որ Անգարան ՕԹԱՆ-ի մէջ իր բանագնացին թելադրած է չստորագրել ծրագիրը եւ կարծր դիրքորոշում որդեգրել հանդիպումներուն եւ անհատական զրոյցներուն ընթացքին` պահանջելով, որ ՕԹԱՆ իբրեւ ահաբեկչական կազմակերպութիւն ճանչնայ քրտական Ժողովուրդի պաշտպանութեան ջոկատները:
ՕԹԱՆ կը ձգտի ստանալ բոլոր 29 անդամ պետութիւններու պաշտօնական հաւանութիւնը Ռուսիոյ կողմէ «յարձակումի» պարագային Լեհաստանի, Լիթուանիոյ, Լաթվիոյ եւ Էսթոնիոյ պաշտպանութեան զինուորական ծրագիրին համար: Առանց Թուրքիոյ հաւանութեան, ՕԹԱՆ-ի համար աւելի դժուար պիտի ըլլայ ամրապնդել Մերձպալթեան շրջանին եւ Լեհաստանի մէջ իր պաշտպանութիւնը:
«Անոնք (թուրքերը) պատանդ կը բռնեն արեւելեան եւրոպացիները` արգելակելով այդ զինուորական ծրագիրին նկատմամբ հաւանութիւնը, այնքան ատեն որ զիջումներ չեն ստացած», ըսած է դիւանագիտական աղբիւրներէն մէկը:
Այլ աղբիւր մը Թուրքիոյ կեցուածքը «կործանիչ» կը կոչէ, որովհետեւ ՕԹԱՆ կը փորձէ ցոյց տալ, որ միասնական է այն բանէն ետք, երբ Միացեալ Նահանգներու նախագահ Տանըլտ Թրամփ թերահաւատութիւն յայտնած է դաշինքի միասնութեան նկատմամբ, իսկ Ֆրանսայի նախագահ Էմանուէլ Մաքրոն յայտնած է ՕԹԱՆ-ի «ուղեղի մահուան» մասին:
Սուրիոյ հիւսիս ներխուժելէ առաջ Թուրքիան իր պահանջները ներկայացուցած էր, սակայն խնդիրը սրած է յաջորդ շաբաթ վեհաժողովի գումարման պատճառով, որուն ընթացքին պէտք է հաստատուին փաստաթուղթերը:
Դիւանագիտական երկու աղբիւրները յայտնած են, թէ ՕԹԱՆ-ի դեսպանները տակաւին յոյս ունին, որ փոխադարձ զիջումի կը հասնին, որովհետեւ Անգարան նաեւ պէտք է հաստատէ թարմացուած զինուորական ծրագիրը, որուն մէջ մանրամասնօրէն կը նշուի, թէ ՕԹԱՆ-ը յարձակումի պարագային ինչպէ՛ս պիտի պաշտպանէ Թուրքիան:
aztagdaily.com/archives/467358
