Ամերիկեան Ծերակոյտը Անպայման Պիտի Ընդունի Հայոց Ցեղասպանութիւնը Ճանչցող Բանաձեւը․ Կիրօ Մանոյեան
11 ԴԵԿՏԵՄԲԵՐ 2019 – ՑԵՂԱՍՊԱՆՈՒԹԻՒՆ – ԱՆԴՐԱԴԱՐՁ:
ՀՅԴ Հայ դատի եւ քաղաքական հարցերու գրասենեակի պատասխանատու, ՀՅԴ Բիւրոյի անդամ Կիրօ Մանոյեանը «Ա1+»-ի հետ զրոյցի մը ընթացքին ըսաւ, որ Պրաթիսլաւայի մէջ Հայաստանի եւ Ատրպէյճանի արտաքին գործոց նախարարներու հանդիպումէն ետք ԵԱՀԿ-ի Մինսքի խմբակի երեք համանախագահներու տարածած յայտարարութեան տակ երկու նախարարները չէին ստորագրած այն պատճառով, որ այդ փաստաթուղթը մերժած էր Էլմար Մամետեարովը: «Կը կարծեմ, մերժումը աւելի Ատրպէյճանէն էր, բայց Հայաստանն ալ դժգոհ չէր անկէ, քանի որ Նիկոլ Փաշինեանը, երբ վարչապետ դարձաւ, յայտարարեց, որ Մատրիտեան սկզբունքները ընդունելի չեն: Եւ չի բացառուիր, որ հայկական կողմը դժգոհ չէր, որ Մատրիտեան սկզբունքներուն յղում կատարող փաստաթուղթին տակ իր անունը չըլլայ»,- ըսաւ Կ. Մանոյեան:
Անդրադառնալով 2020-ին Արցախի մէջ նախագահական եւ Ազգային ժողովի ընտրութիւններուն` ան ըսաւ, թէ ՀՅԴ-ն տակաւին չէ որոշած, թէ նախագահի թեկնածու պիտի առաջադրէ՞, թէ՞ պիտի պաշտպանէ որեւէ այլ թեկնածու: Մասնակցութեան ձեւաչափի հարցը պիտի որոշուի 15 Դեկտեմբերին, արցախեան կառոյցի ժողովին:
Կ. Մանոյեան խօսեցաւ նաեւ Միացեալ Նահանգներու Ծերակոյտին մէջ Հայոց ցեղասպանութեան ճանաչումը ընդունող բանաձեւի մասին, որուն վրայ երրորդ անգամ վեթօ դրուեցաւ: «Սպիտակ տունը կրնայ մարտավարական քայլերով ձգձգել, բայց Ծերակոյտը անպայման պիտի ընդունի ատիկա: Ասիկա օրինագիծ չէ, բանաձեւ է եւ ընդամէնը քաղաքական արժէք ունի: Կրնայ նախագահը իր ուղերձին մէջ ալ չօգտագործել Ցեղասպանութիւն բառը, բայց Սպիտակ տան վրայ ճնշումը աւելի պիտի մեծնայ», ընդգծեց Մանոյեան:
Խօսելով գործող իշխանութիւններու եւ վարչապետ Նիկոլ Փաշինեանի մասին` Կ. Մանոյեան հարց տուաւ, թէ, եթէ անոնց վարկանիշը նոյնքան բարձր է, ինչո՞ւ ձերբակալութիւններ կը կատարեն: «Անոր համա՞ր է վարչապետը խուճապի մէջ, եւ ամէն օր պէտք է ձերբակալութիւններ ըլլան: Թող ձերբակալութիւններ ընեն, բայց ոչ թէ վարկանիշը բարձրացնել-իջեցնելու հաշւոյն»,- ըսաւ ան:
yerakouyn.com/2019/12/10/ամերիկեան-ծերակոյտը-անպայման-պիտի-ըն/
