Թուրքիա Յատուկ Ջոկատներ Ուղարկած Է Լիպիա
18 ԴԵԿՏԵՄԲԵՐ 2019 – ԳԼԽԱՒՈՐ ԼՈՒՐԵՐ – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:
Թուրքիա Թրիփոլի ուղարկած է յատուկ ջոկատներ, զինուորական խորհրդականներ եւ սպառազինութիւն` աջակցելու համար Լիպիոյ Ազգային համաձայնութեան կառավարութեան: Այս մասին կը հաղորդէ «Սփութնիք»-ի թրքական ծառայութիւնը:
Թուրքիոյ նախագահ Ռեճեփ Թայիփ Էրտողան նախապէս յայտարարած էր, որ Անգարան պատրաստ է Լիպիոյ ազգային համաձայնութեան կառավարութեան տրամադրել որեւէ աջակցութիւն, ներառեալ իր զինուորները այնտեղ ուղարկել:
Տեղեկութիւններու համաձայն, Լիպիոյ ազգային համաձայնութեան կառավարութիւնը ինք օգնութիւն խնդրած է Թուրքիայէն:
Լիպիոյ ազգային բանակի հրամանատար զօր. Խալիֆա Հաֆթար Լիպիոյ մայրաքաղաք Թրիփոլիի համար «վճռական մարտ»-ի մասին յայտարարած է: Անոր ուժերը սկսած են աշխուժ յարձակումներ գործել Ֆայիզ Սարաժի գլխաւորած Ազգային համաձայնութեան կառավարութեան հաւատարիմ զինեալ խմբաւորումներուն դէմ եւ զանոնք ետ մղած մայրաքաղաքի ծայրամասերէն ու մուտք գործած Թրիփոլի:
Հաֆթարի յայտարարութենէն ետք արեւմտեան երկիրներուն դիւանագէտները սկսած են լքել Լիպիոյ մայրաքաղաքը:
Եգիպտոսի, Սէուտական Արաբիոյ, Արաբական Միացեալ Էմիրութիւններու եւ Ռուսիոյ աջակցութիւնը վայելող Հաֆթար ապրիլէն սկսեալ յարձակումներ կը գործէ մայրաքաղաքին դէմ: Ըստ ՄԱԿ-ի տուեալներուն, գործողութիւններու քանի մը ամսուան ընթացքին արդէն արձանագրուած է աւելի քան 1000 զոհ:
Նշենք, որ Թուրքիոյ Ազգայնական շարժում կուսակցութիւնը երէկ զօրակցութիւն յայտնեց Լիպիա թրքական ուժեր ուղարկելու Էրտողանի որոշումին:
aztagdaily.com/archives/457976
