Սկովտիան Լոնտոնէն Պաշտօնապէս Անկախութեան Շուրջ Հանրաքուէ Կատարելու Իրաւունք Կը Խնդրէ
21 ԴԵԿՏԵՄԲԵՐ 2019 – ԱՆԴՐԱԴԱՐՁ – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:
Սկովտիոյ առաջին նախարար, Սկովտիոյ Ազգային կուսակցութեան ղեկավար Նիքոլաս Սթըրճըն Լոնտոնէն պաշտօնապէս խնդրած է Էտինպըրկը օժտել շրջանի անկախութեան շուրջ հանրաքուէ կատարելու օրինական իրաւունքով:
«Մենք այսօր Բրիտանիոյ կառավարութեան կոչ կ՛ուղղենք քննարկելու (այդ հարցը) եւ համաձայնելու տալու լիազօրութիւնները, որոնք անտարակուսելի պիտի դարձնեն Սկովտիոյ խորհրդարանին իրաւունքը պատրաստելու անկախութեան հանրաքուէ կատարելու օրէնք», ըսած է ան:
«Ներկայիս այդ հանրաքուէն կատարելու սահմանադրական եւ ժողովրդավարական պատճառ գոյութիւն ունի», յայտնեց Սկովտիոյ առաջին նախարարը:
Նշենք, որ Սկովտիոյ Ազգային կուսակցութիւնը անցեալ շաբաթ կայացած բրիտանական խորհրդարանական ընտրութիւններուն ջախջախիչ յաղթանակ մը արձանագրեց` ապահովելով շրջանին յատկացուած 59 աթոռներէն 47-ը եւ քուէներուն շուրջ կէսը:
Վարչապետ Պորիս Ճոնսընի ղեկավարած Պահպանողական կուսակցութիւնը ընտրութիւններուն ջախջախիչ մեծամասնութիւն ապահովեց, սակայն կորսնցուց Սկովտիոյ մէջ իր ունեցած աթոռներուն կէսը:
Պահպանողական կուսակցութիւնը շրջանին մէջ իր ընտրարշաւը հիմնած էր Սկովտիոյ անկախութեան շուրջ նոր հանրաքուէի մերժման վրայ:
aztagdaily.com/archives/458266
