«Թուրքիա Զինեալ Ահաբեկիչները Թունուզի Ճամբով Լիպիա Կը Փոխադրէ» Կ՛ըսէ Միսմարի
27 ԴԵԿՏԵՄԲԵՐ 2019 – ԱՆԴՐԱԴԱՐՁ – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:
Զօր. Խալիֆա Հաֆթարի ղեկավարած Լիպիական ազգային բանակի բանբեր Ահմատ Միսմարի յայտարարեց. «Թրքական գաղտնի սպասարկութիւնը ահաբեկչական ՏԱՀԵՇ եւ Ժապհաթ Նուսրա խմբաւորումներու անդամները Սուրիայէն Լիպիա կը փոխադրէ»:
«Այս հարցը շատ վտանգաւոր է, որովհետեւ այդ նպատակով կ՛օգտագործուի Թունուզի օդակայաններէն մէկը` Ժարպայի օդակայանը: Ահաբեկչական խմբաւորումները էջք կը կատարեն Թունուզ, ապա կը փոխադրուին Լիպիա: Միսրաթայի, Զաուարայի եւ Մուաայթաքայի օդակայանները մեծաթիւ ահաբեկիչներ հիւրընկալեցին», նշեց ան:
«Թունուզի նախկին խորհրդարանը իր նիստերէն մէկուն ընթացքին այդ մասին խօսեցաւ իսկ թունուզցի քաղաքագէտներ թիւերով անդրադարձան այս երեւոյթին: Թունուզեան պետութիւնը Իսլամ եղբայրներ միջազգային կազմակերպութեան պատկանող Նահտա կուսակցութեան վերահսկողութեան տակ է, եւ անոնք է, որ պետութիւնը կը կառավարեն», աւելցուց Միսմարի:
«Մայատին» կայանը երեքշաբթի օր հաղորդած էր, թէ Թուրքիա Սուրիոյ մէջ իրեն համակիր զինեալ խմբաւորումներէն պահանջած է պատրաստել զինեալներու ցանկ մը` զանոնք Լիպիա փոխադրելու համար:
Միւս կողմէ` Թուրքիոյ «Ռեսմի կազեթէ» օրաթերթը հաղորդեց, որ Թուրքիոյ նախագահ Ռեճեփ Թայիփ Էրտողան վաւերացուցած է Թուրքիոյ եւ Լիպիոյ ազգային համաձայնութեան կառավարութեան միջեւ զինուորական գործակցութեան վերաբերեալ յուշագիրը:
Այսպիսով` նշեալ փաստաթուղթը Թուրքիոյ կողմէ վերջնականապէս վաւերացուած է:
Յուշագիրը նախապէս վաւերացուած էր Թուրքիոյ խորհրդարանին եւ Թուրքիոյ արտաքին յարաբերութիւններու յանձնախումբին կողմէ:
Թուրքիոյ եւ Լիպիոյ ազգային համաձայնութեան կառավարութեան միջեւ զինուորական գործակցութեան վերաբերեալ համաձայնագիրը ստորագրուած էր 28 նոյեմբերին, Պոլսոյ մէջ: Ատիկա կը նախատեսէ զինուորներու վերապատրաստում եւ ուսուցում, իրաւական ենթահողի ձեւաւորում, ինչպէս նաեւ երկու երկիրներու զինուորներուն միջեւ յարաբերութիւններու ամրապնդում:
Երկու կողմերուն միջեւ ստորագրուած էր նաեւ ծովային սահմաններու վերաբերեալ փոխըմբռնման յուշագիր մը, որ արժանացած է Յունաստանի կտրուկ արձագանգին:
Լիպիոյ մէջ կը տիրէ երկիշխանութիւն` արեւելքի մէջ կ՛իշխէ ընտրուած խորհրդարանը, իսկ մայրաքաղաք Թրիփոլիի, այսինքն` արեւմուտքի մէջ` ՄԱԿ-ի եւ Եւրոպական Միութեան աջակցութեամբ կազմուած Ազգային համաձայնութեան կառավարութիւնը: Երկիրի արեւելեան հատուածի իշխանութիւնները կը գործեն Թրիփոլիէն անկախ եւ կը համագործակցին Լիպիական ազգային բանակին հետ:
Թուրքիոյ նախագահ Ռեճեփ Թայիփ Էրտողան երէկ յայտարարեց. «Թունուզի հետ համաձայնութիւն գոյացուցի Լիպիոյ մէջ Սարաժի կառավարութեան աջակցելու»` աւելցնելով, որ Անգարան պիտի ընդունի Լիպիա ուժեր ուղարկելու Լիպիոյ Ազգային համաձայնութեան կառավարութեան հրաւէրը եւ յառաջիկայ ամիս համապատասխան օրինագիծ մը պիտի ներկայացնէ խորհրդարանին, երբ յառաջիկայ ամիս վերսկսի իր նիստերուն:
«Լիպիան օսմանցիներուն եւ Մուսթաֆա Քեմալ Աթաթուրքին կողմէ մեր հոգատարութեան կտակուած է», ըսաւ Էրտողան` նշելով, որ իրենք ամէն տեսակի աջակցութիւն պիտի տրամադրեն Թրիփոլիի կառավարութեան` ընդդէմ «յեղաշրջական» Հաֆթարի, որ կը վայելէ տարբեր երկիրներու, ներառեալ` արաբական, աջակցութիւնը:
Նշենք, որ Էրտողան մէկ օր առաջ անակնկալօրէն այցելած էր Թունուզ:
Քրեմլին երէկ յայտարարեց. «Երրորդ երկիրի մը կողմէ Լիպիոյ ներքին հարցերուն որեւէ միջամտութիւն պիտի վնասէ լուծումին»:
Ռուսիոյ դաշնակցային խորհուրդի արտաքին յարաբերութիւններու յանձնախումբի նախագահը իր կարգին նշեց. «Լիպիական հարցերուն թրքական միջամտութիւնը կրնայ վատագոյն ընտրանքը ըլլալ»:
Լիպիական Ազգային համաձայնութեան կառավարութեան ներքին գործոց նախարարը երէկ յայտարարեց. «Թուրքիոյ, Թունուզի եւ Ալճերիոյ հետ մէկ դաշինքի մէջ պիտի ըլլանք»:
aztagdaily.com/archives/459227
