Իրան Մերժած Է Միացեալ Նահանգներու Համագործակցութեան Առաջարկը
11 ՅՈՒՆՈՒԱՐ 2020 – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:
ՄԱԿ-ի մէջ Իրանի մնայուն ներկայացուցիչ Մաժիտ Թախթ Ռաւանճի Ուաշինկթընի համագործակցութեան առաջարկը անկարելի կոչած է եւ յայտարարած, որ Թեհրան չի կրնար զայն ընդունիլ: Այս մասին կը հաղորդէ «ՌԻԱ Նովոստի» լրատու գործակալութիւնը:
«Այնքան ատեն որ Միացեալ Նահանգներ տակաւին կը շարունակեն թշնամութիւն հրահրել, բանակցութիւնները ոչ մէկ իմաստ ունին», ըսած է իրանցի դիւանագէտը:
Ան աւելցուցած է, որ Միացեալ Նահանգներու «աննախադէպ» պատժամիջոցները կը հակասեն միջազգային իրաւունքի արժեչափերուն:
Նախապէս ՄԱԿ-ի մէջ Միացեալ Նահանգներու մնայուն ներկայացուցիչ Քելլի Քրաֆթ ՄԱԿ-ի Ապահովութեան խորհուրդին ուղարկած էր նամակ մը, որուն մէջ յայտնած էր շրջանին մէջ լարուածութիւնը նուազեցնելու նպատակով առանց նախապայմաններու բանակցութիւններու պատրաստակամութեան մասին:
Ըստ Քրաֆթի, Միացեալ Նահանգներ կը ձգտին «կանխարգիլել միջազգային խաղաղութեան ու կայունութեան ուղղուած հետագայ սպառնալիքը կամ իրանեան վարչակարգին կողմէ մագլցումը»:
Ան նաեւ յայտնած է, որ իրանցի զօրավար Քասեմ Սիւլէյմանիի սպանութիւնը «արդարացուած է» ՄԱԿ-ի կանոնագրութեան 51-րդ յօդուածով, որ պետութեան ինքնապաշտպանութեան իրաւունք կու տայ:
aztagdaily.com/archives/460396
