Խաղաղութեան մաղթանքները ապարդիւն – Խաղաղութեան մաղթանքները ապարդիւն – Խաղաղութեան մաղթանքները ապարդիւն
08.01.2020 – ԱՌՕՐԵԱՅ:
Իդէմ խաղաղութեան բնոյթով Ամանորեայ բարեմաղթութիւններու, նոր տարուայ առաջին օրերուն իսկ սկսած է հնչել պատերազմի փողը։ Արդարեւ Իրանի զինեալ ուժերու կարեւորագոյն հրամանատարներէն Ղասըմ Սուլէյմանի մահափորձի մը զոհ գնաց Պաղտատի օդակայանէն մեկնած պահուն։ Սուլէյմանի Պաղտատ գացած էր ընդառաջելով Իրաքի վարչապետի յատուկ հրաւէրին։
Մահափորձը մեծ աղմուկ պատճառեց Պարսկաստանի մէջ, ուր ամփոխներ փողոց իջան դատապարտելու համար կատարուածը։ Այս պայմաններու տակ սպաննուած զօրավարի թաղումը եւս արիւնոտ եղաւ, քանի որ թաղման թափորէն մօտ 60 անձեր զոհուեցան բազմութեան իրարանցումին մէջ։ Իրանի կառավարութիւնը խստօրէն դատապարտեց այս յարձակումը եւ ուխտեց վրէժ լուծել Ամերիկայէն։
Արդարեւ 7 Յունուար երեկոյեան ժամերուն հրթիռներով հարուածեցին Իրաքի մէջ գտնուող Ամերիկեան ռազմախարիսխները։
Զարգացումը իսկական վտանգ մը ըլլալով կը դիտուի քաղաքային դէտերու կողմէ եւ մտավախութիւնը կը յառաջանայ այս լարուած ընթացքին նոր զինեալ բախումներու պատճառ դառնալու վարկածով։
Միջին արեւելքը, ուր ջուրերը չեն հանդարտիր տասնամեակներէ ի վեր, այժմ դարձեալ ինկած է նոր փոթորիկներու գիրկը։ Մինչ այդ Հիւսիս Ատլանտեան Դաշինքը եւս իր կարգին սպառնալիքներ ուղղեց Իրանին ըսելով, թէ անպատասխան պիտի չթողուն Ամերիկայի դէմ որեւէ զինեալ գործողութիւն։
Իսկ Իրան իր կարգին ըրաւ դարձեալ ուշագրաւ յայտարարութիւն մը, ըսելով թէ այսուհետեւ նկատի պիտի չունենայ հիւլէական զէնքերու արտադրութիւնը սահմանափակելու համար արեւմտեան երկիրներու հետ կնքած համաձայնութիւնները։
Ինչպէս կը պարզուի, տեսարանը բաւականին մտահոգիչ է համայն մարդկութեան համար, յատկապէս ալ տարածաշրջանի ժողովուրդներու հաշւոյն, քանի որ գերպետութիւնները որդեգրած են պատերազմը իրենց սահմաններէն հեռու պահել եւ դաշնակիցներու շահագործումով յաղթանակներ տանիլ իրարու դէմ։
agos.com.tr/am/hvotvadzi/23443/khaghaghutyean-maghtanknyeri-abartiwn
